Saṃyutta Nikāya
5. Mahā-Vagga
46. Bojjhaṇga Saṃyutta
5. Cakka-Vatti Vagga

Sutta 45

Paññavā Suttaṃ

 

---

[100]

[1][pts][bodh] Evam me sutaṃ:|| ||

Ekaṃ samayam Bhagavā Sāvatthiyaṃ viharati Jetavane Anāthapindikassa ārāme.|| ||

Atha kho aññataro bhikkhu yena Bhagavā ten'upasaṇkami.|| ||

Upasaṇkamitvā Bhagavantaṃ abhivādetvā eka-m-antaṃ nisīdi.|| ||

Eka-m-antaṃ nisinno kho so bhikkhu Bhagavantaṃ etad avoca:|| ||

"'Paññavā aneḷa-mūgo!|| ||

Paññavā aneḷa-mūgo!' ti bhante, vuccati.|| ||

Kittāvatā nu kho bhante,||
'Paññavā aneḷa-mūgo' ti vuccatī" ti?|| ||

"Sattannaṃ kho bhikkhu,||
bojjh'aṇgānaṃ bhāvitattā||
bahulī-katattā||
'Paññavā aneḷa-mūgo' ti vuccati.|| ||

Katamesaṇ sattannaṃ?|| ||

Sati-sambojjh'aṇgassa||
dhamma-vicaya-sambojjh'aṇgassa||
viriya-sambojjh'aṇgassa||
pīti-sambojjh'aṇgassa||
passaddhi-sambojjh'aṇgassa||
samādhi-sambojjh'aṇgassa||
upekhā-sambojjh'aṇgassa.|| ||

Imesaṃ kho bhikkhu, sattannaṃ bojjh'aṇgānaṃ||
bhāvitattā||
bahulī-katattā||
'Paññavā aneḷa-mūgo' ti vuccatī" ti.|| ||