Saṁyutta Nikāya
5. Mahā-Vagga
47. Sati-Paṭṭhāna Saṁyutta
1. Ambapāli Vagga

Sutta 10

Bhikkhuni-Vāsaka Suttaṁ

 

---

[154]

[1][pts][bodh][olen][olds] Evam me sutaṁ:|| ||

Ekaṁ samayam Bhagavā Sāvatthiyaṁ viharati||
Jetavane Anāthapindikassa ārāme.|| ||

Atha kho āyasmā Ānando pubbaṇha-samayaṁ nivāsetvā patta-cīvaram ādāya yena aññataro bhikkhun'ūpassayo ten'upasaṅkami.|| ||

Upasaṅkamitvā paññatte āsane nisīdi.|| ||

Atha kho sambahulā bhikkhuniyo yen'āyasmā Ānando ten'upasaṅkamiṁsu.|| ||

Upasaṅkamitvā āyasmattaṁ Ānandaṁ abhivādetvā eka-m-antaṁ nisīdiṁsu.|| ||

Eka-m-antaṁ nisinnā kho tā bhikkhuniyo āyasmantaṁ Ānandaṁ etad avocuṁ:|| ||

"Idha bhante, Ānanda, sambahulā bhikkhuniyo catusu sati-paṭṭhānesu sūpati-ṭ-ṭhita-cittā viharantiyo||
uḷāraṁ pubbenāparaṁ visesaṁ sañpajānantī" ti.|| ||

[155] "Evam etaṁ bhaginiyo!|| ||

Evam etaṁ bhaginiyo!|| ||

Yo hi koci bhaginiyo,||
bhikkhu vā bhikkhunī vā||
catusu sati-paṭṭhānesu||
sūpati-ṭ-ṭhita-citto viharati,||
tass'etaṁ pāṭikaṅkhaṁ||
uḷāraṁ pubbenāparaṁ visesaṁ sañjānissatī" ti.|| ||

Atha kho āyasmā Ānando tā bhikkhuniyo dhammiyā kathāya sanda-s-setvā samāda-petvā samutte-chetvā sampahaṁ-setvā uṭṭhāy'āsanā pakkami.|| ||

Atha kho āyasmā Ānando Sāvatthiyaṁ piṇḍāya caritvā pacchā-bhattaṁ piṇḍa-pāta-paṭikkanto yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho āyasmā Ānando Bhagavantaṁ etad avoca:|| ||

"Idh'āhaṁ bhante, pubbaṇha-samayaṁ nivāsetvā patta-cīvaram ādāya yena aññataro bhikkhun'ūpassayo ten'upasaṅkamiṁ.|| ||

Upasaṅkamitvā paññatena āsane nisīdiṁ.|| ||

Atha kho bhante, sambahulā bhikkhuniyo yenāhaṁ ten'upasaṅkamiṁsu.|| ||

Upasaṅkamitvā maṁ abhivādetvā eka-m-antaṁ nisīdiṁsu.|| ||

Eka-m-antaṁ nisinnā kho bhante, tā bhikkhuniyo maṁ etad avocuṁ:|| ||

'Idha bhante Ānanda, sambahulā bhikkhuniyo catusu sati-paṭṭhānesu sūpati-ṭ-ṭhita-cittā viharantiyo uḷāraṁ pubbenāparaṁ visesaṁ sañjānantī' ti.|| ||

Evaṁ vuttāhaṁ bhante, tā bhikkhuniyo etad avocaṁ:|| ||

'Evam etaṁ bhaginiyo!|| ||

Evam etaṁ bhaginiyo!|| ||

Yo hi koci bhaginiyo,||
bhikkhu vā bhikkhunī vā||
catusu sati-paṭṭhānesu sūpati-ṭ-ṭhita-citto viharati,||
tass'etaṁ pāṭikaṅkhaṁ||
uḷāraṁ pubbenāparaṁ visesaṁ sañjānissatī'" ti.|| ||

 

§

 

"Evam etaṁ Ānanda.|| ||

Evam etaṁ Ānanda.|| ||

Yo hi koci Ānanda,||
bhikkhu vā bhikkhunī vā||
catusu sati-paṭṭhānesu sūpati-ṭ-ṭhita-citto viharati,||
tass'etaṁ pāṭikaṅkhaṁ||
uḷāraṁ pubbenāparaṁ visesaṁ sañjānissatī.|| ||

Katamesu catusu?|| ||

Idh'Ānanda, bhikkhu||
kāye kāy'ānupassī viharati,||
ātāpī||
sampajāno||
satimā||
vineyya loke abhijjhā-domanassaṁ.|| ||

[156] Tassa kāye kāy'ānupassino viharato||
kāyārammaṇo vā||
uppajjati kāyasmiṁ||
pariḷāho cetaso vā||
līnattaṁ bahiddhā vā cittaṁ vikkhipati.|| ||

Ten'Ānanda, bhikkhunā kismiñci'd'eva pasādanīye nimitte cittaṁ paṇidahitabbaṁ.|| ||

Tassa kismiñci'd'eva pasādanīye nimitte cittaṁ paṇidahato pāmujjaṁ jāyati.|| ||

Pamuditassa pīti jāyati.|| ||

Pīti-manassa kāyo passambhati.|| ||

Pa-s-saddha-kāyo sukhaṁ vedayati.|| ||

Sukhino cittaṁ samādhiyati.|| ||

So iti paṭisañcikkhati.|| ||

'Yassa khv'āhaṁ atthāya cittaṁ paṇidahiṁ||
so me attho abhinipphanno.|| ||

Handa dāni paṭisaṁharāmī' ti.|| ||

So paṭisaṁharati c'eva||
na ca vitakketi,||
na ca vicāreti.|| ||

'Avitakkho'mhi||
avicāro||
ajjhattaṁ satimā sukhitasmī' ti pajānāti.|| ||

■

Puna ca paraṁ Ānanda, bhikkhu||
vedanāsu vedan'ānupassī viharati,||
ātāpī||
sampajāno||
satimā,||
vineyya loke abhijjhā-domanassaṁ.|| ||

Tassa vedanāsu vedan'ānupassino viharato||
vedanārammaṇo vā||
uppajjati kāyasmiṁ||
pariḷāho cetaso vā||
līnattaṁ bahiddhā vā cittaṁ vikkhipati.|| ||

Ten'Ānanda, bhikkhunā kismiñci'd'eva pasādanīye nimitte cittaṁ paṇidahitabbaṁ.|| ||

Tassa kismiñci'd'eva pasādanīye nimitte cittaṁ paṇidahato pāmujjaṁ jāyati.|| ||

Pamuditassa pīti jāyati.|| ||

Pīti-manassa kāyo passambhati.|| ||

Pa-s-saddha-kāyo sukhaṁ vedayati.|| ||

Sukhino cittaṁ samādhiyati.|| ||

So iti paṭisañcikkhati.|| ||

'Yassa khv'āhaṁ atthāya cittaṁ paṇidahiṁ||
so me attho abhinipphanno.|| ||

Handa dāni paṭisaṁharāmī' ti.|| ||

So paṭisaṁharati c'eva||
na ca vitakketi,||
na ca vicāreti.|| ||

'Avitakkho'mhi||
avicāro||
ajjhattaṁ satimā sukhitasmī' ti pajānāti.|| ||

■

Puna ca paraṁ Ānanda, bhikkhu citte citt'ānupassī viharati,||
ātāpī||
sampajāno||
satimā||
vineyya loke abhijjhā-domanassaṁ.|| ||

Tassa citte citt'ānupassino viharato||
cittārammaṇo vā||
uppajjati kāyasmiṁ||
pariḷāho cetaso vā||
līnattaṁ bahiddhā vā cittaṁ vikkhipati.|| ||

Ten'Ānanda, bhikkhunā kismiñci'd'eva pasādanīye nimitte cittaṁ paṇidahitabbaṁ.|| ||

Tassa kismiñci'd'eva pasādanīye nimitte cittaṁ paṇidahato pāmujjaṁ jāyati.|| ||

Pamuditassa pīti jāyati.|| ||

Pīti-manassa kāyo passambhati.|| ||

Pa-s-saddha-kāyo sukhaṁ vedayati.|| ||

Sukhino cittaṁ samādhiyati.|| ||

So iti paṭisañcikkhati.|| ||

'Yassa khv'āhaṁ atthāya cittaṁ paṇidahiṁ||
so me attho abhinipphanno.|| ||

Handa dāni paṭisaṁharāmī' ti.|| ||

So paṭisaṁharati c'eva||
na ca vitakketi,||
na ca vicāreti.|| ||

'Avitakkho'mhi||
avicāro||
ajjhattaṁ satimā sukhitasmī' ti pajānāti.|| ||

■

Puna ca paraṁ Ānanda, bhikkhu dhammesu Dhamm'ānupassī viharati,||
ātāpī||
sampajāno||
satimā||
vineyya loke abhijjhā-domanassaṁ.|| ||

Tassa dhammesu Dhamm'ānupassino viharato||
dhammārammaṇo vā||
uppajjati kāyasmiṁ||
pariḷāho cetaso vā||
līnattaṁ bahiddhā vā cittaṁ vikkhipati.|| ||

Ten'Ānanda, bhikkhunā kismiñci'd'eva pasādanīye nimitte cittaṁ paṇidahitabbaṁ.|| ||

Tassa kismiñci'd'eva pasādanīye nimitte cittaṁ paṇidahato pāmujjaṁ jāyati.|| ||

Pamuditassa pīti jāyati.|| ||

Pīti-manassa kāyo passambhati.|| ||

Pa-s-saddha-kāyo sukhaṁ vedayati.|| ||

Sukhino cittaṁ samādhiyati.|| ||

So iti paṭisañcikkhati.|| ||

'Yassa khv'āhaṁ atthāya cittaṁ paṇidahiṁ||
so me attho abhinipphanno.|| ||

Handa dāni paṭisaṁharāmī' ti.|| ||

So paṭisaṁharati c'eva||
na ca vitakketi,||
na ca vicāreti.|| ||

'Avitakkho'mhi||
avicāro||
ajjhattaṁ satimā sukhitasmī' ti pajānāti.|| ||

Evaṁ kho Ānanda paṇidhāya bhāvanā hoti.|| ||

 

§

 

Kathañ c'Ānanda, appaṇidhāya bhāvanā hoti?|| ||

[157] Bahiddhā Ānanda, bhikkhu cittaṁ appaṇidhāya,|| ||

'Appaṇihitaṁ me bahiddhā cittan' ti pajānāti.|| ||

'Atha pacchāpure asaṅkhittaṁ vimuttaṁ,||
appaṇihitan' ti pajānāti.|| ||

Atha ca pana|| ||

'Kāye kāy'ānupassī viharāmi||
ātāpī||
sampajāno||
satimā||
sukham'asmī' ti pajānāti.|| ||

■

Bahiddhā Ānanda, bhikkhu cittaṁ appaṇihāya|| ||

'Appaṇihitaṁ me bahiddhā cittan' ti pajānāti.|| ||

'Atha pacchāpure asaṅkhittaṁ vimuttaṁ,||
appaṇihitan' ti pajānāti.|| ||

Atha ca pana|| ||

'Vedanāsu vedan'ānupassī viharāmi||
ātāpī||
sampajāno||
satimā||
sukham'asmī' ti pajānāti.|| ||

■

Bahiddhā Ānanda, bhikkhu cittaṁ appaṇihāya|| ||

'Appaṇihitaṁ me bahiddhā cittan' ti pajānāti.|| ||

'Atha pacchāpure asaṅkhittaṁ vimuttaṁ,||
appaṇihitan' ti pajānāti.|| ||

Atha ca pana|| ||

'Cittesu citt'ānupassī viharāmi||
ātāpī||
sampajāno||
satimā||
sukham'asmī' ti pajānāti.|| ||

■

Bahiddhā Ānanda, bhikkhu cittaṁ appaṇihāya|| ||

'Appaṇihitaṁ me bahiddhā cittan' ti pajānāti.|| ||

'Atha pacchāpure asaṅkhittaṁ vimuttaṁ,||
appaṇihitan' ti pajānāti.|| ||

Atha ca pana|| ||

'Dhammesu Dhamm'ānupassī viharāmi||
ātāpī||
sampajāno||
satimā||
sukham'asmī' ti pajānāti.|| ||

Evaṁ kho Ānanda, appaṇidhāya bhāvanā hoti.|| ||

Iti kho Ānanda, desitā mayā paṇidhāya bhāvanā,||
desitā appaṇidhāya bhāvanā.|| ||

Yaṁ Ānanda, Satthārā karaṇīyaṁ sāvakānaṁ||
hitesinā||
anukampa-kena||
anukampaṁ||
upādāya.|| ||

Kataṁ vo taṁ mayā.|| ||

Etāni Ānanda, rukkha-mūlāni,||
etāni suññ-ā-gārāni,||
nijjhāyath Ānanda,||
mā pamādattha,||
mā pacchā-vippaṭi-sārino ahuvattha.|| ||

Ayaṁ vo amhākaṁ anusāsanī" ti.|| ||

Idam avoca Bhagavā.|| ||

Attamano āyasmā Ānando Bhagavato bhāsitam abhinandi.|| ||

 

Ambapāli Vagga Paṭhama