Mahā-Purisa Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][olds][bodh] Evam me sutaṁ:|| ||

Ekaṁ samayaṁ Bhagavā Sāvatthiyaṁ viharati
Jetavane Anāthapiṇḍikassa ārāme.|| ||

2. Atha kho āyasmā Sāriputto yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho āyasmā Sāriputto Bhagavantaṁ etad avoca:|| ||

3. "'Mahā-puriso mahā-puriso' ti bhante, vuccati.|| ||

Kittāvatā nu kho:||
bhante, 'mahā-puriso' hotī" ti?|| ||

"Vimutta-cittattā kho'haṁ Sāriputta||
'mahā-puriso' ti vadāmi.|| ||

Avimutta-cittttā||
no 'mahā-puriso' ti vadāmi.|| ||

Kathañ ca Sāriputta,||
vimutta-citto hoti?|| ||

4. Idha Sāriputta, bhikkhu kāye kāy'ānupassī viharati||
atāpī sampajāno satimā vineyya loke abhijjhā-domanassaṁ.|| ||

Tassa kāye kāy'ānupassino viharato cittaṁ virajjati,||
vimuccati,||
anupādāya āsavehi.|| ||

■

Vedanāsu vedan'ānupassī viharati||
atāpī sampajāno satimā vineyya loke abhijjhā-domanassaṁ.|| ||

Tassa vedanāsu vedan'ānupassino viharato cittaṁ virajjati,||
vimuccati,||
anupādāya āsavehi.|| ||

■

Citte citt'ānupassī viharati||
atāpī sampajāno satimā vineyya loke abhijjhā-domanassaṁ.|| ||

Tassa citte citt'ānupassino viharato cittaṁ virajjati,||
vimuccati,||
anupādāya āsavehi.|| ||

■

Dhammesu Dhamm'ānupassī viharati||
atāpī sampajāno satimā vineyya loke abhijjhā-domanassaṁ.|| ||

Tassa dhammesu Dhamm'ānupassino viharato cittaṁ virajjati,||
vimuccati,||
anupādāya āsavehi.|| ||

Evaṁ kho Sāriputta, vimutta-citto hoti,||
vimutta-cittttā kho'haṁ Sāriputta,||
'mahā-puriso' ti vadāmi.|| ||

Avimutta-cittttā||
no 'mahā-puriso' ti vadāmī" ti.|| ||