Saṁyutta Nikāya
5. Mahā-Vagga
47. Sati-Paṭṭhāna Saṁyutta
2. Nālandā Vagga

Sutta 12

Nālandā Suttaṁ

 

---

[159]

[1][pts][bodh] Evam me sutaṁ:|| ||

Ekaṁ samayaṁ Bhagavā Nāḷandāyaṁ viharati Pāvārikambavane.|| ||

Atha kho āyasmā Sāriputto yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho āyasmā Sāriputto Bhagavantaṁ etad avoca:|| ||

"Evaṁ pasanno'haṁ bhante, Bhagavati:|| ||

Na cāhu||
na ca bhavissati,||
na c'etarahi vijjati,||
añño samaṇo vā brāhmaṇo vā||
Bhagavatā bhiyyo'bhiññataro||
yad idaṁ sambodhiyan" ti.|| ||

■

"Uḷārā kho tyāyaṁ Sāriputta,||
āsabhī vācā bhāsitā,||
ekaṁso gahito,||
sīhanādo nadito:|| ||

'Evaṁ pasanno'haṁ bhante, Bhagavati:|| ||

Na cāhu||
na ca bhavissati,||
na c'etarahi vijjati,||
añño samaṇo vā brāhmaṇo vā||
Bhagavatā bhiyyo'bhiññataro||
yad idaṁ sambodhiyan' ti.|| ||

Kin nu te Sāriputta,||
ye te ahesuṁ atītam addhānaṁ||
Arahanto Sammā Sambuddhā,||
sabbe te Bhagavanto||
cetasā ceto paricca viditā:|| ||

'Evaṁ sīlā te Bhagavanto ahesuṁ iti vā,||
evaṁ dhammā te Bhagavanto ahesuṁ iti vā,||
evaṁ paññā te Bhagavanto ahesuṁ iti vā,||
evaṁ vihārino te Bhagavanto ahesuṁ iti vā,||
evaṁ vimuttā te Bhagavanto ahesuṁ iti vā' ti" ti?|| ||

[160] "No h'etaṁ bhante."|| ||

■

"Kim pana te Sāriputta,||
ye te bhavissanti anāgatam addhānaṁ||
Arahanto Sammā Sambuddhā,||
sabbe te Bhagavanto||
cetasā ceto paricca viditā:|| ||

'Evaṁ sīlā te Bhagavanto bhavissanti iti vā,||
evaṁ dhammā te Bhagavanto bhavissanti iti vā,||
evaṁ paññā te Bhagavanto bhavissanti iti vā,||
evaṁ vihārino te Bhagavanto, bhavissanti iti vā,||
evaṁ vimuttā te Bhagavanto bhavissanti iti vā' ti" ti?|| ||

"No h'etaṁ bhante"|| ||

■

"Kiṁ pana te Sāriputta, etarahi||
arahaṁ Sammā Sambuddho||
cetasā ceto paricca vidito:|| ||

'Evaṁ sīlo Bhagavā iti vā,||
evaṁ dhammo Bhagavā iti vā,||
evaṁ pañño Bhagavā iti vā,||
evaṁ vihārī Bhagavā iti vā,||
evaṁ vimutto Bhagavā iti vā' ti" ti?|| ||

"No h'etaṁ bhante."|| ||

■

"Ettha ca te Sāriputta,||
atīt-ā-nāgata-paccupannesu Arahantesu||
Sammā Sambuddhesu||
ceto-pariya-ñāṇaṁ n'atthi.|| ||

Atha kiñ carahi tayā Sāriputta,||
uḷārā āsabhī vācā bhāsitā||
ekaṁso gahito,||
sīhanādo nadito:|| ||

'Evaṁ pasanno'haṁ bhante, Bhagavati:|| ||

Na cāhu||
na ca bhavissati,||
na c'etarahi vijjati,||
añño samaṇo vā brāhmaṇo vā||
Bhagavatā bhiyyo'bhiññataro||
yad idaṁ sambodhiyan' ti" ti?|| ||

■

"Na kho me bhante,||
atīt-ā-nāgatapacc'uppannesu||
Arahantesu Sammā Sambuddhesu||
ceto-pariya-ñāṇaṁ atthi.|| ||

Api ca Dhammanvayo vidito.|| ||

Seyyathā pi, bhante, rañño paccantimaṁ nagaraṁ||
daḷhuddāpaṁ||
daḷhapākāratoraṇaṁ||
ekadvāraṁ.|| ||

Tatr'assa dovāriko paṇḍito vyatto medhāvī aññātānaṁ nivāretā,||
ñātānaṁ pavesetā,||
so tassa nagarassa samantā anupariyāya pathaṁ anukkama-māno||
na passeyya pākāra-sandhiṁ vā||
pākāra-vivaraṁ vā||
antamaso biḷālanissakkhanamattam pi.|| ||

Tassa evam assa.|| ||

'Ye kho keci olārikā pāṇā imaṁ nagaraṁ pavisanti vā||
ni-k-khamanti vā||
sabbe te iminā va||
dvārena pavisanti vā||
ni-k-khamanti vā' ti.|| ||

Evam eva kho me bhante, Dhammanvayo vidito:|| ||

'Ye pi te bhante ahesuṁ atītam addhānaṁ||
Arahanto Sammā Sambuddhā||
sabbe te Bhagavanto pañca nīvaraṇe pahāya||
cetaso upakkilese paññāya||
dubbalī-karaṇe catusu sati-paṭṭhānesu sūpatthika-cittā||
satta-bojjh'aṅge [161] yathā-bhūtaṁ bhāvetvā||
anuttaraṁ sammā-sambodhiṁ abhisambujjhiṁsu.|| ||

Ye pi te bhante bhavissanti anāgatam addhānaṁ||
Arahanto Sammā Sambuddhā||
sabbe te Bhagavanto pañca-nīvaraṇe pahāya||
cetaso upakkilese paññāya||
dubbalī-karaṇe catusu sati-paṭṭhānesu s-ū-patthika-cittā||
satta-bojjh'aṅge yathā-bhūtaṁ bhāvetvā||
anuttaraṁ sammā-sambodhiṁ abhisambujjhissanti.|| ||

Bhagavā pi bhante, etarahi arahaṁ Sammā Sambuddho pañca-nīvaraṇe pahāya||
cetaso upakkilese paññāya||
dubbalī-karaṇe catusu sati-paṭṭhānesu s'ūpatthika-citto||
satta-bojjh'aṅge yathā-bhūtaṁ bhāvetvā||
anuttaraṁ sammā-sambodhiṁ abhisambuddho" ti.|| ||

"Sādhu sādhu Sāriputta, tasmā ti ha tvaṁ Sāriputta,||
imaṁ dhamma-pariyāyaṁ abhikkhaṇaṁ bhāseyyāsi,||
bhikkhūnaṁ bhikkhunīnaṁ upāsakānaṁ upāsikānaṁ.|| ||

Yesam pi hi Sāriputta, mogha-purisānaṁ bhavissati Tathāgate kaṅkhā vā vimati vā tesam pimaṁ dhamma-pariyāyaṁ sutvā yā Tathāgate kaṅkhā vā vimati vā sā pahīyissatī" ti.|| ||