Ṭhiti Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh] Evam me sutaṁ:|| ||

Ekaṁ samayaṁ āyasmā ca Ānando āyasmā ca Bhaddo Pāṭaliputte viharanti Kukkuṭ'ārāme.|| ||

Atha kho āyasmā Bhaddo sāyanha-samayaṁ paṭisallāṇā vuṭṭhito yen'āyasmā Ānando ten'upasaṅkami.|| ||

Upasaṅkamitvā āyasmatā Ānandena saddhiṁ sammodi.|| ||

Sammodaṇīyaṁ kathaṁ sārāṇīyaṁ vīti-sāretvā eka-m-antaṁ nisīdi.|| ||

Eka-m-antaṁ nisinno kho āyasmā Bhaddo||
āyasmantaṁ Ānandaṁ etad avoca:|| ||

"Ko nu kho āvuso Ānanda, hetu||
ko paccayo||
yena Tathāgate parinibbute||
Sad'Dhammo na cira-ṭ-ṭhitiko hoti?|| ||

Ko pan'āvuso Ānanda, hetu||
ko paccayo||
yena Tathāgate parinibbute||
Sad'Dhammo cira-ṭ-ṭhitiko hotī" ti?|| ||

"Sādhu sādhu āvuso Bhadda!|| ||

Bhaddako kho te āvuso Bhadda!|| ||

Ummaggo, bhaddakaṁ paṭibhānaṁ,||
kalyāṇī paripucchā.|| ||

Evaṁ hi tvaṁ āvuso Bhadda, pucchasi:|| ||

"Ko nu kho āvuso Ānanda, hetu||
ko paccayo||
yena Tathāgate parinibbute||
Sad'Dhammo na cira-ṭ-ṭhitiko hoti?|| ||

Ko pan'āvuso Ānanda, hetu||
ko paccayo||
yena Tathāgate parinibbute||
Sad'Dhammo cira-ṭ-ṭhitiko hotī' ti" ti?|| ||

"Evam āvuso" ti.|| ||

"Catunnaṁ kho āvuso, sati-paṭṭhānānaṁ abhāvitattā abahulī-katattā Tathāgate parinibbute Sad'Dhammo na cira-ṭ-ṭhitiko hoti.|| ||

Catukkañ ca āvuso sati-paṭṭhānānaṁ bhāvitattā bahulī-katattā Tathāgate parinibbute Sad'Dhammo cira-ṭ-ṭhitiko hoti.|| ||

Katamesaṁ catunnaṁ?

Idh'āvuso, bhikkhu kāye kāy'ānupassī viharati||
ātāpī||
sampajāno||
satimā||
vineyya loke abhijjhā-domanassaṁ.|| ||

Vedanāsu vedan'ānupassī viharati||
ātāpī||
sampajāno||
satimā||
vineyya loke abhijjhā-domanassaṁ.|| ||

Citte citt'ānupassī viharati||
ātāpī||
sampajāno||
satimā||
vineyya loke abhijjhā-domanassaṁ.|| ||

Dhammesu Dhamm'ānupassī viharati||
ātāpī||
sampajāno||
satimā||
vineyya loke abhijjhā-domanassaṁ.|| ||

Imesaṁ kho āvuso catunnaṁ sati-paṭṭhānānaṁ abhāvitattā abahulī-katattā Tathāgate parinibbute Sad'Dhammo na cira-ṭ-ṭhitiko hoti.|| ||

Imesañ ca kho āvuso catunnaṁ sati-paṭṭhānānaṁ bhāvitattā bahulī-katattā Tathāgate parinibbute Sad'Dhammo cira-ṭ-ṭhitiko hotī" ti.