Loka Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh] Evam me sutaṁ:|| ||

Ekaṁ samayaṁ āyasmā ca Sāriputto||
āyasmā ca Mahā Moggallāno||
āyasmā ca Anuruddho||
Sākete viharanti,||
Kaṇṭakīvane.|| ||

Atha kho āyasmā ca Sāriputto||
āyasmā ca Mahā Moggallāno||
sāyanha-samayaṁ paṭisallāṇā vuṭṭhitā yen'āyasmā Anuruddho ten'upasaṅkamiṁsu.|| ||

Upasaṅkamitvā āyasmatā anuruddhena saddhiṁ sammodiṁsu.|| ||

Sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdiṁsu.

Eka-m-antaṁ nisinno kho āyasmā Sāriputto āyasmantaṁ Anuruddhaṁ etad avoca:|| ||

"Katamesaṇ āyasmā Anuruddha dhammānaṁ bhāvitattā bahulī-katattā mahābhiññataṁ patto" ti?|| ||

[176]"Catunnaṁ kho āvuso, sati-paṭṭhānānaṁ bhāvitattā bahulī-katattā mahābhiññataṁ patto.|| ||

Katamesaṇ catunnaṁ?|| ||

Idh'āvuso, bhikkhu kāye kāy'ānupassī viharati||
ātāpī||
sampajāno||
satimā||
vineyya loke abhijjhā-domanassaṁ.|| ||

Vedanāsu vedan'ānupassī viharati||
ātāpī||
sampajāno||
satimā||
vineyya loke abhijjhā-domanassaṁ.|| ||

Citte citt'ānupassī viharati||
ātāpī||
sampajāno||
satimā||
vineyya loke abhijjhā-domanassaṁ.|| ||

Dhammesu Dhamm'ānupassī viharati||
ātāpī||
sampajāno||
satimā||
vineyya loke abhijjhā-domanassaṁ.|| ||

Imesaṁ kho āvuso catunnaṁ sati-paṭṭhānānaṁ bhāvitattā bahulī-katattā mahābhiññataṁ patto.|| ||

Imesañ ca kho panāhaṁ āvuso catunnaṁ sati-paṭṭhānānaṁ bhāvitattā bahulī-katattā sahassaṇ lokaṁ abhijānāmī" ti.|| ||