Saṁyutta Nikāya
5. Mahā-Vagga
47. Sati-Paṭṭhāna Saṁyutta
3. Sīla-ṭ-Ṭhiti Vagga

Sutta 29

Sirivaḍḍha Suttaṁ

 

---

[176]

[1][pts][bodh] Evam me sutaṁ:|| ||

Ekaṁ samayaṁ āyasmā Rājagahe viharati Veḷuvane Kalandakanivāpe.|| ||

Tena kho pana samayena Sirivaḍḍho gahapati ābādhiko hoti dukkhito bāḷha-gilāno.|| ||

Atha kho Sirivaḍḍho gahapati||
aññataraṁ purisaṇ āmantesi:|| ||

"Ehi tvaṁ ambho purisa,||
yenāsmato Ānando ten'upasaṅkama,||
upasaṅkamitvā mama vacanena āyasmato Ānandassa pāde sirasā vanda:|| ||

'Sirivaḍḍho bhante Ānandassa pāde sirasā vandatī' ti.|| ||

Evañ ca vadehi:|| ||

'Sādhu kira bhante,||
āyasmā Ānando yena ca Sirivaḍḍhassa gahapatino nivesanaṁ||
ten'upasaṅkamatu||
anukampaṁ upādāyā'" ti.|| ||

"Evaṁ bhante" ti kho so puriso Sirivaḍḍhassa gahapatissa paṭi-s-sutvā yen'āyasmā Ānando ten'upasaṅkami.|| ||

Upasaṅkamitvā āyasmantaṁ Ānandaṁ abhivādetvā eka-m-antaṁ nisīdi.|| ||

Eka-m-antaṁ nisinno kho so puriso āyasmantaṁ Ānandaṁ etad avoca:|| ||

"Sirivaḍḍho bhante, gahapati ābādhiko dukkhito bāḷha-gilāno,||
so āyasmato Ānandassa pāde sirasā vandati,||
evañ ca vadeti:|| ||

'Sādhu kira bhante,||
āyasmā Ānando yena Sirivaḍḍhassa gahapatissa nivesanaṁ,||
ten'upasaṅkamatu,||
anukampaṁ upādāyā' ti.|| ||

[177] Adhivāsesi kho āyasmā Ānando tuṇhī-bhāvena.|| ||

Atha kho āyasmā Ānando pubbaṇha-samayaṁ nivāsetvā patta-cīvaram ādāya yena Sirivaḍḍhassa gahapatissa nivesanaṁ ten'upasaṅkami.|| ||

Upasaṅkamitvā paññatena āsane nisīdi.|| ||

Nisajja kho āyasmā Ānando Sirivaḍḍhaṁ gahapatiṁ etad avoca:|| ||

"Kacci te gahapati khamanīyaṁ,||
kacci yāpanīyaṁ,||
kacci dukkhā vedanā paṭi-k-kamanti||
no abhi-k-kamanti,||
paṭikkamosānaṁ paññāyati||
no abhi-k-kamo" ti?|| ||

"Na me bhante khamanīyaṁ,||
na yāpanīyaṁ bāḷhā me dukkhā vedanā abhi-k-kamanti||
no paṭi-k-kamanti,||
abhi-k-kam'osānaṁ paññāyati||
no paṭikkamo" ti.|| ||

"Tasmātiha te gahapati,||
evaṁ sikkhitabbaṁ:|| ||

'Kāye kāy'ānupassī viharissāmi||
ātāpī sampajāno satimā||
vineyya loke abhijjhā-domanassaṁ.|| ||

Vedanāsu vedan'ānupassī viharissāmi||
ātāpī sampajāno satimā||
vineyya loke abhijjhā-domanassaṁ.|| ||

Citte citt'ānupassī viharissāmi||
ātāpī sampajāno satimā||
vineyya loke abhijjhā-domanassaṁ.|| ||

Dhammesu Dhamm'ānupassī viharissāmi||
ātāpī sampajāno satimā||
vineyya loke abhijjhā-domanassaṁ.'|| ||

Evaṁ hi te gahapati sikkhitabban" ti.|| ||

"Ye me bhante, Bhagavatā cattāro sati-paṭṭhānā desitā,||
saṁvijjanti te dhammā mayi.|| ||

Ahañ ca tesu dhammesu sandissāmi.|| ||

Ahaṁ bhante, kāye kāy'ānupassī viharāmi||
ātāpī sampajāno satimā||
vineyya loke abhijjhā-domanassaṁ.|| ||

Vedanāsu vedan'ānupassī viharāmi||
ātāpī sampajāno satimā||
vineyya loke abhijjhā-domanassaṁ.|| ||

Citte citt'ānupassī viharāmi||
ātāpī sampajāno satimā||
vineyya loke abhijjhā-domanassaṁ.|| ||

Dhammesu Dhamm'ānupassī viharāmi||
ātāpī sampajāno satimā||
vineyya loke abhijjhā-domanassaṁ.|| ||

Yāni c'imāni bhante, Bhagavatā pañc'oram-bhāgiyāni saṁyojanāni desitāni,||
n-ā-haṁ tesaṇ kiñci attani a-p-pahīnaṁ samanupassāmī" ti.|| ||

"Lābhā te gahapati,||
su-laddhaṁ te gahapati,||
Anāgāmi-phalaṁ tayā gahapati,||
vyākatantī" ti.|| ||