Samudaya Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][bodh][than][olds] Evam me sutaṁ:|| ||

2. Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Catunnaṁ bhikkhave, sati-paṭṭhānānaṁ samudayañ ca||
attha-gamañ ca desissāmi.|| ||

Taṁ suṇātha.|| ||

Ko ca bhikkhave, kāyassa samudayo?|| ||

Āhāra-samudayā kāyassa samudayo.|| ||

Āhāra-nirodhā kāyassa attha-gamo.|| ||

Ko ca bhikkhave, vedanānaṁ samudayo?|| ||

Phassa-samudayā vedanānaṁ samudayo.|| ||

Phassa-nirodhā vedanānaṁ attha-gamo.|| ||

Ko ca bhikkhave, cittassa samudayo?|| ||

Nāma-rūpa-samudayā cittassa samudayo.|| ||

Nāma-rūpa-nirodhā cittassa attha-gamo.|| ||

Ko ca bhikkhave, dhammānaṁ samudayo?|| ||

Manasikāra-samudayā dhammānaṁ samudayo.|| ||

Manasikāra-nirodhā dhammānaṁ attha-gamo" ti.|| ||