Saṁyutta Nikāya
5. Mahā-Vagga
47. Sati-Paṭṭhāna Saṁyutta
5. Amata Vagga

Sutta 43

Magga Suttaṁ

 

---

[185]

[1][pts][bodh] Evam me sutaṁ:|| ||

2. Ekaṁ samayaṁ Bhagavā Sāvatthiyaṁ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Ekam idāhaṁ bhikkhave, samayaṁ Uruvelāyaṁ viharāmi,||
najjā Nerañjarāya tīre Ajapālanigrodhe paṭhamābhi-sammuddho.|| ||

Tassa mayhaṁ bhikkhave, raho-gatassa patisallīnassa||
evaṁ cetaso parivitakko udapādi:|| ||

'Ekāyano'yaṁ Maggo sattāṇaṁ visuddhiyā||
soka-pari-d-davānaṁ||
samatikkamāya||
dukkha-domanassānaṁ attha-gamāya||
ñāyassa adhigamāya||
Nibbānassa sacchi-kiriyāya||
yad idaṁ cattāro sati-paṭṭhānā.|| ||

Katame cattāro?|| ||

Kāye vā bhikkhu kāye kāy'ānupassī vihareyya||
ātāpī||
sampajāno||
satimā||
vineyya loke abhijjhā-domanassaṁ.|| ||

Vedanāsu vā bhikkhu vedan'ānupassī vihareyya||
ātāpī||
sampajāno||
satimā||
vineyya loke abhijjhā-domanassaṁ.|| ||

Citte vā bhikkhu citt'ānupassī vihareyya||
ātāpī||
sampajāno||
satimā||
vineyya loke abhijjhā-domanassaṁ.|| ||

Dhammesu vā bhikkhu Dhamm'ānupassī vihareyya||
ātāpī||
sampajāno||
satimā||
vineyya loke abhijjhā-domanassaṁ.|| ||

Ekāyano'yaṁ Maggo sattāṇaṁ visuddhiyā||
soka-pari-d-davānaṁ||
samatikkamāya||
dukkha-domanassānaṁ attha-gamāya||
ñāyassa adhigamāya||
Nibbānassa sacchi-kiriyāya||
yad idaṁ cattāro sati-paṭṭhānā.'|| ||

■

Atha kho bhikkhave, Brahmā Sahampati||
mama cetasā ceto parivitakka-maññāya||
seyyathā pi nāma balavā puriso sammiñjitaṁ vā bāhaṁ pasāreyya,||
pasāritaṁ vā bāhaṁ sammiñjeyya.|| ||

Evam evaṁ Brahma-loke antara-hito mama purato pātur ahosi:|| ||

Atha kho bhikkhave, Brahmā Sahampati ekaṁsaṇ uttarā-saṅgaṁ karitvā yenāhaṁ ten'añjaliṁ panāmetvā maṁ etad avoca:|| ||

'Evam etaṁ Bhagavā,||
evam etaṁ Sugata,||
ekāyano'yaṁ Maggo sattāṇaṁ visuddhiyā||
soka-pari-d-davānaṁ||
samatikkamāya||
dukkha-domanassānaṁ attha-gamāya||
ñāyassa adhigamāya||
Nibbānassa sacchi-kiriyāya||
yad idaṁ [186] cattāro sati-paṭṭhānā.|| ||

Katame cattāro?|| ||

Kāye vā bhikkhu kāye kāy'ānupassī vihareyya||
ātāpī||
sampajāno||
satimā||
vineyya loke abhijjhā-domanassaṁ.|| ||

Vedanāsu vā bhikkhu vedan'ānupassī vihareyya||
ātāpī||
sampajāno||
satimā||
vineyya loke abhijjhā-domanassaṁ.|| ||

Citte vā bhikkhu citt'ānupassī vihareyya||
ātāpī||
sampajāno||
satimā||
vineyya loke abhijjhā-domanassaṁ.|| ||

Dhammesu vā bhikkhu Dhamm'ānupassī vihareyya||
ātāpī||
sampajāno||
satimā||
vineyya loke abhijjhā-domanassaṁ.|| ||

Ekāyano'yaṁ Maggo sattāṇaṁ visuddhiyā||
soka-pari-d-davānaṁ||
samatikkamāya||
dukkha-domanassānaṁ attha-gamāya||
ñāyassa adhigamāya||
Nibbānassa sacchi-kiriyāya||
yad idaṁ cattāro sati-paṭṭhānā' ti.

Idam avoca Bhikkhave Brahmā Sahampati.|| ||

Idaṁ vatvā athāparaṁ etad avoca:|| ||

'Ekāyanaṁ jātikhayantadassī||
Maggaṁ pajānāti hit-ā-nukampī||
Etena maggena ataṁsu pubbe||
Tarissanti ye ca taranti oghan' ti" ti.|| ||