Saṁyutta Nikāya
5. Mahā-Vagga
48. Indriya Saṁyutta
2. Mudatara Vagga

Sutta 19

Upasama Suttaṁ

 

---

[202]

[1][pts] Evam me sutaṁ:|| ||

Ekaṁ samayam Bhagavā Sāvatthiyaṁ viharati.|| ||

Atha kho aññataro bhikkhu yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho so bhikkhu Bhagavantaṁ etad avoca:|| ||

"'Indriya-sampanno!|| ||

Indriya-sampanno!' ti bhante vuccati.|| ||

Kittāvatā nu kho bhante, indriya-sampanno hotī" ti?|| ||

[203] "Idha bhikkhu, bhikkhu saddh'indriyaṁ bhāveti||
upasama-gāmiṁ||
sambodha-gāmiṁ;|| ||

Viriy'indriyaṁ bhāveti||
upasama-gāmiṁ||
sambodha-gāmiṁ;|| ||

Sat'indriyaṁ bhāveti||
upasama-gāmiṁ||
sambodha-gāmiṁ;|| ||

Samādh'indriyaṁ bhāveti||
upasama-gāmiṁ||
sambodha-gāmiṁ;|| ||

Paññ'indriyaṁ bhāveti||
upasama-gāmiṁ||
sambodha-gāmiṁ.|| ||

Ettāvatā kho bhikkhu, indriya-sampanno hotī ti."|| ||