Saṁyutta Nikāya
5. Mahā-Vagga
48. Indriya Saṁyutta
3. Chaḷ-Indriya Vagga

Sutta 28

Dutiya Arahatā or Buddha Suttaṁ

 

---

[205]

[1][pts] Evam me sutaṁ:|| ||

Ekaṁ samayam Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuṁ.|| ||

Bhagavā etad avoca:|| ||

"Cha'y'imāni bhikkhave, indriyāni.|| ||

Katamāni cha?|| ||

Cakkhu'ndriyaṁ||
sot'indriyaṁ||
ghān'indriyaṁ||
jivh'indriyaṁ||
kāy'indriyaṁ||
man'indriyaṁ.|| ||

Imāni kho bhikkhave, cha indriyāni.|| ||

 

§

 

[206] Yāva kīvāñcahaṁ bhikkhave, imesaṇ channaṁ indriyānaṁ samudayañ ca||
attha-gamañ ca||
assādañ ca||
ādīnavañ ca||
nissaraṇañ ca||
yathā-bhūtaṁ na abhaññāsiṁ,||
n'eva tāvāhaṁ bhikkhave,||
sa-devake loke sa-Mārake sa-brahmake||
sa-s-samaṇa-brāhmaṇiyā pajāya||
sadeva-manussāya||
anuttaraṁ sammā-sambodhiṁ||
abhisambuddho paccaññāsiṁ.|| ||

Yato ca kho'haṁ bhikkhave, imesaṇ channaṁ indriyānaṁ samudayañ ca||
attha-gamañ ca||
assādañ ca||
ādīnavañ ca||
nissaraṇañ ca||
yathā-bhūtaṁ abbhaññāsiṁ,||
ath'āhaṁ bhikkhave,||
sa-devake loke sa-Mārake sa-brahmake||
sa-s-samaṇa-brāhmaṇiyā pajāya||
sadeva-manussāya||
anuttaraṁ sammā-sambodhiṁ||
abhisambuddho paccaññāsiṁ.|| ||

Ñāṇañ ca pana me dassanaṁ udapādi:|| ||

'Akuppā me ceto-vimutti,||
ayam antimā jāti,||
n'atthi dāni puna-b-bhavo' ti" ti.|| ||