Dutiya Pubb'Ārama Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][than] Evam me sutaṁ:|| ||

Ekaṁ samayaṁ Bhagavā Sāvatthiyaṁ viharati Pubbārāme Migāra-mātu pāsāde.|| ||

Tatra kho Bhagavā bhikkhū āmantesi "bhikkhavo" ti.|| ||

"Bhadante" ti te bhikkhū Bhagavato pacchassosuṁ Bhagavā etad avoca:|| ||

Katinnaṁ nu kho bhikkhave indriyānaṁ||
bhāvitattā||
bahulī-katattā||
khīṇ'āsavo bhikkhu aññaṁ vyākaroti:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānāmī" ti?"|| ||

"Bhagavaṁ-mūlakā no bhante, dhammā,||
Bhagavaṁ-nettikā||
Bhagavaṁ-paṭisaraṇā.|| ||

Sādhu vata bhante,||
Bhagavantaṁ yeva paṭibhātu etassa bhāsitassa attho.|| ||

Bhagavato sutvā bhikkhū dhāressantī" ti.|| ||

[223] Dvinnaṁ kho bhikkhave, indriyassa||
bhāvitattā||
bahulī-katattā||
khīṇ'āsavo bhikkhu aññaṁ vyākaroti:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānāmī.|| ||

Katamesaṇ dvinnaṁ?|| ||

Ariyā ca paññāya,||
ariyāya ca vimuttiyā.|| ||

Yā hissa bhikkhave,||
ariyā paññā tadassa paññ'indriyaṁ,||
yā hissa bhikkhave,||
ariyā vimutti tadassa samādh'indriyaṁ.|| ||

Imesaṁ kho bhikkhave, dvinnaṁ indriyānaṁ||
bhāvitattā||
bahulī-katattā||
khīṇ'āsavo bhikkhu aññaṁ vyākaroti:|| ||

'Khīṇā jāti||
vusitaṁ Brahma-cariyaṁ||
kataṁ karaṇīyaṁ||
nāparaṁ itthattāyā' ti pajānāmī" ti.|| ||