Saṁyutta Nikāya
5. Mahā-Vagga
48. Indriya Saṁyutta
6. Sūkara-Khata Vagga

Sutta 51

Sālā Suttaṁ

 

---

[227]

[1][pts] Evam me sutaṁ:|| ||

Ekaṁ samayaṁ Bhagavā Kosalesu viharati Sālāyaṁ brāhmaṇa-gāme.|| ||

Tatra kho Bhagavā bhikkhū āmantesi|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ Bhagavā etad avoca.|| ||

Seyyathā pi bhikkhave, ye keci tiracchāna-gatā pāṇā,||
sīho tesaṇ miga-rājā aggamakkhāyati:||
yad idaṁ thāmena javena sūriyena||
evam eva kho, bhikkhave, ye keci bodhi-pakkhiyā dhammā,||
paññ'indriyaṁ tesaṇ aggamakkhāyati:||
yad idaṁ bodhāya.|| ||

Katame ca bhikkhave, bodhi-pakkhiyā dhammā?|| ||

Saddh'indriyaṁ bhikkhave, bodhi-pakkhiyo dhammo,||
taṁ bodhāya saṁvaṭṭati.|| ||

Viriy'indriyaṁ bodhi-pakkhiyo dhammo,||
taṁ bodhāya saṁvaṭṭati.|| ||

Sat'indriyaṁ bodhi-pakkhiyo dhammo,||
taṁ bodhāya saṁvaṭṭati.|| ||

Samādh'indriyaṁ bodhi-pakkhiyo dhammo,||
taṁ bodhāya saṁvaṭṭati.|| ||

Paññ'indriyaṁ bodhi-pakkhiyo dhammo,||
taṁ bodhāya saṁvaṭṭati.|| ||

[228] Seyyathā pi bhikkhave, ye keci tiracchāna-gatā pāṇā,||
sīho tesaṇ miga-rājā aggamakkhāyati:||
yad idaṁ thāmena javena sūriyena||
evam eva kho, bhikkhave, ye keci bodhi-pakkhiyā dhammā,||
paññ'indriyaṁ tesaṇ aggamakkhāyati:||
yad idaṁ bodhāyā" ti.