Saṁyutta Nikāya
5. Mahā-Vagga
48. Indriya Saṁyutta
6. Sūkara-Khata Vagga

Sutta 52

Mallikā Suttaṁ

 

---

[228]

[1][pts][than] Evam me sutaṁ:|| ||

Ekaṁ samayaṁ Bhagavā Mallakesu viharati Uruveḷakappaṁ nāma Mallakānaṁ nigamo.|| ||

Tatra kho Bhagavā bhikkhū āmantesi|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ Bhagavā etad avoca.|| ||

"Yāva kīvañ ca bhikkhave, ariya-sāvakassa ariyaṁ ñāṇaṁ nuppannaṁ hoti||
n'eva tāva catunnaṁ indriyānaṁ saṇṭhiti hoti,||
n'eva tāva catunnaṁ indriyānaṁ avaṭṭhiti hoti,||
yato ca kho bhikkhave, ariya-sāvakassa ariya ñāṇaṁ uppannaṁ hoti,||
atha catunnaṁ indriyānaṁ saṇṭhiti hoti,||
atha catunnaṁ indriyānaṁ avaṭṭhiti hoti.|| ||

Seyyathā pi bhikkhave, yāva kīvañ ca kūṭā-gārassa kūṭaṁ na ussitaṁ hoti,||
n'eva tāva gopānasīnaṁ saṇṭhiti hoti,||
n'eva tāva gopānasīnaṁ avaṭṭhiti hoti||
yato ca kho bhikkhave, kūṭā-gārassa kūṭaṁ ussitaṁ hoti,||
atha kho gopānasīnaṁ saṇṭhiti hoti,||
atha kho gopānasīnaṁ avaṭṭhiti hoti.|| ||

Evam eva kho bhikkhave,||
yāva kīvañ ca ariya-sāvakassa ariya-ñāṇaṁ na uppannaṁ hoti,||
n'eva tāva catunnaṁ indriyānaṁ saṇṭhiti hoti,||
n'eva tāva catunnaṁ indirayānaṁ avaṭṭhiti hoti,||
yato ca kho bhikkhave, ariya-sāvakassa ariya-ñāṇaṁ uppannaṁ hoti,||
atha catunnaṁ indriyānaṁ saṇṭhiti hoti,||
atha catunnaṁ indriyānaṁ avaṭṭhiti hoti.|| ||

Katamesaṇ catunnaṁ?|| ||

[229] Saddh'indriyassa||
viriy'indriyassa||
sat'indriyassa||
samādh'indriyassa.|| ||

Paññavato bhikkhave, ariya-sāvakassa tadanvayā saddhā saṇṭhāti,||
tadanv'ayaṁ viriyaṁ saṇṭhāti,||
tadanvayā sati saṇṭhāti,||
tadanvayo samādhi saṇṭhātī" ti.|| ||