Dutiya Rukkha Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] Evam me sutaṁ:|| ||

Ekaṁ samayam Bhagavā Sāvatthiyaṁ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Seyyathā pi bhikkhave, ye keci devānaṁ Tāvatiṁsānaṁ rukkhā,||
pāricchattako tesaṇ aggam akkhāyati.|| ||

Evam eva kho bhikkhave, ye keci bodhi-pakkhikā dhammā,||
paññ'indriyaṁ tesaṇ aggam akkhāyati:||
yad idaṁ bodhāya.|| ||

Katame ca bhikkhave, bodhi-pakkhikā dhammā?|| ||

Saddh'indriyaṁ||
viriy'indriyaṁ||
sat'indriyaṁ||
samādh'indriyaṁ||
paññ'indriyaṁ.|| ||

"Seyyathā pi bhikkhave, ye keci devānaṁ Tāvatiṁsānaṁ rukkhā,||
pāricchattako tesaṇ aggam akkhāyati.|| ||

Evam eva kho bhikkhave, ye keci bodhi-pakkhikā dhammā,||
paññ'indriyaṁ tesaṇ aggam akkhāyati:||
yad idaṁ bodhāya" ti.|| ||