Viraddha Suttaṃ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts][olds] Evam me sutaṃ:|| ||

Ekaṃ samayam Bhagavā Sāvatthiyaṃ viharati||
Jetavane Anāthapindikassa ārāme.|| ||

2. "Yesaṅ kesañci bhikkhave,||
cattāro iddhi-pādā viraddhā,||
viraddho tesaṅ ariyo Maggo||
sammā-dukkha-k-khaya-gāmī.|| ||

Yesaṅ kesañci bhikkhave,||
cattāro iddhi-pādā āraddhā,||
āraddho tesaṅ ariyo Maggo||
sammā-dukkha-k-khaya-gāmī.|| ||

Katame cattāro?|| ||

3. Idha, bhikkhave, bhikkhu||
chanda-samādhi-padhāna-saṅkhāra-samannāgataṃ||
iddhi-pādaṃ bhāveti.|| ||

Viriya-samādhi-padhāna-saṅkhāra-samannāgataṃ||
iddhi-pādaṃ bhāveti.|| ||

Citta-samādhi-padhāna-saṅkhāra-samannāgataṃ||
iddhi-pādaṃ bhāveti.|| ||

Vīmaṃsā-samādhi-padhāna-saṅkhāra-samannāgataṃ||
iddhi-pādaṃ bhāveti.|| ||

[255] 4. Yesaṅ kesañci bhikkhave,||
ime cattāro iddhi-pādā viraddhā,||
viraddho tesaṅ ariyo Maggo||
sammā-dukkha-k-khaya-gāmī.|| ||

Yesaṅ kesañci bhikkhave,||
ime cattāro iddhi-pādā āraddhā,||
āraddho tesaṅ ariyo Maggo||
sammā-dukkha-k-khaya-gāmī" ti.|| ||