Saṁyutta Nikāya
5. Mahā-Vagga
51. Iddhi-Pāda Saṁyutta
2. Pāsāda-Kampana Vagga

Sutta 15

Brāhmaṇa Suttaṁ

 

---

[271]

[1][pts][than][olds] Evam me sutaṁ:|| ||

Ekaṁ samayaṁ āyasmā Ānando Kosambīyaṁ viharati Ghositārāme.|| ||

[272] 2. Atha kho Uṇṇābho brāhmaṇo yen'āyasmā Ānando ten'upasaṅkami.|| ||

Upasaṅkamitvā āyasmatā Ānandena saddhiṁ sammodi.|| ||

Sammodanīyaṁ kathaṁ sārāṇīyaṁ vīti-sāretvā eka-m-antaṁ nisīdi.|| ||

Eka-m-antaṁ nisinno kho Uṇṇābho brāhmaṇo āyasmantaṁ Ānandaṁ etad avoca:|| ||

3. "Kim atthi yaṁ nu kho bho Ānanda,||
samaṇe Gotame Brahma-cariyaṁ vussatī" ti?|| ||

"Chanda-pahānatthaṁ kho brāhmaṇa Bhagavati Brahma-cariyaṁ vussatī" ti.|| ||

4. "Atthi pana bho Ānanda,||
Maggo atthi paṭipadā etassa chandassa pahānāyā" ti?|| ||

"Atthi kho brāhmaṇa,||
Maggo atthi paṭipadā etassa chandassa pahānāyā" ti.|| ||

5. "Katamo pana bho Ānanda,||
Maggo katamā paṭipadā etassa pahānāyā" ti?|| ||

"Idha brāhmaṇa bhikkhu||
chanda-samādhi-padhāna-saṅkhāra-samannāgataṁ iddhi-pādaṁ bhāveti,||
viriya-samādhi-padhāna-saṅkhāra-samannāgataṁ iddhi-pādaṁ bhāveti,||
citta-samādhi-padhāna-saṅkhāra-samannāgataṁ iddhi-pādaṁ bhāveti,||
vīmaṁsā-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Ayaṁ kho brāhmaṇa Maggo||
ayaṁ paṭipadā etassa chandassa pahānāyā" ti.|| ||

6. "Evaṁ sante kho Ānanda santakaṁ hoti||
no asantakaṁ,||
chandena ca chandaṁ pajahi'satī ti||
n'etaṁ ṭhānaṁ vijjatī" ti.|| ||

"Tena hi brāhmaṇa,||
taññevettha paṭipucchissāmi||
yathā te khameyya tathā taṁ vyākareyyāsi.|| ||

7. Taṁ kiṁ maññasi brāhmaṇa,||
ahosi te pubbe chando 'ārāmaṁ gamissāmī' ti?|| ||

Tassa te ārāma-gatassa yo tajjo chando so paṭi-p-passaddho" ti?|| ||

"Evaṁ bho".|| ||

"Ahosi te pubbe viriyaṁ 'ārāmaṁ gamissāmī' ti||
tassa te ārāma-gatassa yaṁ tajjaṁ viriyaṁ taṁ paṭi-p-passaddhan" ti?|| ||

[273] "Evaṁ bho".|| ||

"Ahosi te pubbe cittaṁ 'ārāmaṁ gamissāmī' ti.|| ||

Tassa te ārāma-gatassa yaṁ tajjaṁ cittaṁ taṁ paṭi-p-passaddhan" ti?|| ||

"Evaṁ bho".|| ||

"Ahosi te pubbe vīmaṁsā 'ārāmaṁ gamissāmī' ti.|| ||

Tassa te ārāma-gatassa yā tajjā vīmaṁsā sā paṭippassaddhā" ti.|| ||

"Evaṁ bho".|| ||

8. Evam eva kho brāhmaṇa,||
yo so bhikkhu arahaṁ khīṇ'āsavo vusitavā kata-karaṇīyo ohita-bhāro anuppattasadattho pari-k-khīṇa-bhava-saṁyojano samma-d-aññā vimutto.|| ||

Tassa yo pubbe chando ahosi Arahatta-pattiyā||
arahatte patte yo tajjo chando so paṭi-p-passaddho.|| ||

Yaṁ pubbe viriyaṁ ahosi Arahatta-pattiyā||
arahatte patte yaṁ tajjaṁ viriyaṁ taṁ paṭi-p-passaddhaṁ.|| ||

Yaṁ pubbe cittaṁ ahosi Arahatta-pattiyā,||
arahatte patte yaṁ tajjaṁ cittaṁ taṁ paṭi-p-passaddhaṁ.|| ||

Yā pubbe vīmaṁsā ahosi Arahatta-pattiyā||
arahatte patte yā tajjā vīmaṁsā sā paṭipipassaddhā.|| ||

9. Taṁ kiṁ maññasi brāhmaṇa,||
iti evaṁ sante santakaṁ vā hoti no asantakaṁ vā" ti?|| ||

"Addhā bho Ānanda,||
evaṁ sante santakaṁ hoti no asantakaṁ.|| ||

10. Abhikkantaṁ bho Ānanda,||
abhikkantaṁ bho Ānanda,||
seyyathā pi bho Ānanda nikkujjitaṁ vā ukkujjeyya,||
paṭi-c-channaṁ vā vivareyya,||
mūḷhassa vā Maggaṁ ācikkheyya' andha-kāre vā tela-pajjotaṁ dhāreyya,||
'cakkhu-manto rapāni dakkhintī' ti,||
evam eva bhotā Ānandena aneka pariyāyena dhammo pakāsito.|| ||

Es'āhaṁ bho Ānanda,||
bhavantaṁ Gotamaṁ saraṇaṁ gacchāmi||
Dhammañ ca||
bhikkhu-saṅghañ ca.|| ||

Upāsakaṁ maṁ bhavaṁ Ānando dhāretu ajja-t-agge pāṇupetaṁ saraṇaṁ gatanti" ti.|| ||