Saṁyutta Nikāya
5. Mahā-Vagga
51. Iddhi-Pāda Saṁyutta
2. Pāsāda-Kampana Vagga

Sutta 20

Vibhaṅga Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[276]

[1][pts][than][olds] Evam me sutaṁ:|| ||

2. "Cattāro me bhikkhave, iddhi-pādā bhāvitā bahulī-katā maha-p-phalā honti mahā-nisaṁsā.|| ||

Kathaṁ bhāvitā ca bhikkhave,||
cattāro iddhi-pādā||
kathaṁ bahulī-katā maha-p-phalā honti mahā-nisaṁsā?|| ||

3. Idha bhikkhave, bhikkhu||
chanda-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Iti me chando [277] na ca atilīno bhavissati,||
na ca atipaggahito bhavissati,||
na ca ajjhattaṁ saṅkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaṁ,||
yathā uddhaṁ tathā adho.|| ||

Yathā divā tathā rattiṁ,||
yathā rattiṁ tathā divā.|| ||

Iti vivaṭena cetasā apariyonaddhena cetasā sa-p-pabhāsaṁ cittaṁ bhāveti.|| ||

4. Viriya-samādhi-padhāna-saṅkhāra-samannāgataṁ iddhi-pādaṁ bhāveti:|| ||

Iti me viriya na ca atilīno bhavissati,||
na ca atipaggahito bhavissati,||
na ca ajjhattaṁ saṅkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaṁ,||
yathā uddhaṁ tathā adho.|| ||

Yathā divā tathā rattiṁ,||
yathā rattiṁ tathā divā.|| ||

Iti vivaṭena cetasā apariyonaddhena cetasā sa-p-pabhāsaṁ cittaṁ bhāveti.|| ||

5. Citta-samādhi-padhāna-saṅkhāra-samannāgataṁ iddhi-pādaṁ bhāveti:|| ||

Iti me citta na ca atilīno bhavissati,||
na ca atipaggahito bhavissati,||
na ca ajjhattaṁ saṅkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaṁ,||
yathā uddhaṁ tathā adho.|| ||

Yathā divā tathā rattiṁ,||
yathā rattiṁ tathā divā.|| ||

Iti vivaṭena cetasā apariyonaddhena cetasā sa-p-pabhāsaṁ cittaṁ bhāveti.|| ||

6. Vimaṁsā-samādhi-padhāna-saṅkhāra-samannāgataṁ iddhi-pādaṁ bhāveti:|| ||

Iti me chando na ca atilīno bhavissati,||
na ca atipaggahito bhavissati,||
na ca ajjhattaṁ saṅkhitto bhavissati,||
na ca bahiddhā vikkhitto bhavissati.|| ||

Pacchā-pure-saññī ca viharati.|| ||

Yathā pure tathā pacchā,||
yathā pacchā tathā pure.|| ||

Yathā adho tathā uddhaṁ,||
yathā uddhaṁ tathā adho.|| ||

Yathā divā tathā rattiṁ,||
yathā rattiṁ tathā divā.|| ||

Iti vivaṭena cetasā apariyonaddhena cetasā sa-p-pabhāsaṁ cittaṁ bhāveti.|| ||

 

§

 

7. Katamo ca bhikkhave, atilīno chando?|| ||

Yo bhikkhave, chando kosajja-saha-gato kosajja-sampayutto,||
ayaṁ vuccati bhikkhave atilīno chando.|| ||

8. Katamo ca bhikkhave, atipaggahito chando?|| ||

Yo bhikkhave, chando uddhaccasahagato uddhacca-sampayutto,||
ayaṁ vuccati bhikkhave, atipaggahito chando.|| ||

9. Katamo ca bhikkhave, ajjhattaṁ saṅkhitto chando?|| ||

Yo bhikkhave, chando thīna-middha-saha-gato thīna-middha-sampayutto,||
ayaṁ vuccati bhikkhave, ajjhattaṁ saṅkhitto chando.|| ||

10. Katamo ca bhikkhave, bahiddhā vikkhitto chando?|| ||

Yo bhikkhave, chando bahiddhā pañca kāma-guṇe ārabbha anuvikkhitto anuvisaṭo,||
ayaṁ vuccati bhikkhave, bahiddhā vikkhitto chando.|| ||

11. Kathañ ca bhikkhave, bhikkhu pacchā-pure-saññī ca viharati|| ||

"Yathā pure tathā pacchā||
yathā pacchā tathā pure"?|| ||

[278]Idha bhikkhave, bhikkhuno pacchā-pure saññā suggahitā hoti sumana-sikatā sūpadhāritā suppaṭi-viddhā paññāya.|| ||

Evaṁ kho bhikkhave, bhikkhu pacchā-pure-saññī viharati:|| ||

"Yathā pure tathā pacchā||
yathā pacchā tathā pure"|| ||.

12. Kathañ ca bhikkhave, bhikkhu||
yathā adho tathā uddhaṁ,||
yathā uddhaṁ tathā adho viharati?|| ||

Idha bhikkhave, bhikkhu imam eva kāyaṁ uddhaṁ pādatalā adho kesa-matthakā taca-pariyan taṁ pūraṁ nāna-p-pakārassa asucino pacc'avekkhati.|| ||

Atthi imasmiṁ kāye kesā lomā nakhā dantā taco maṁsaṁ nahārū aṭṭhi aṭṭhimiñjā vakkaṁ hadayaṁ yakanaṁ kilomakaṁ pihakaṁ pa-p-phāsaṁ antaṁ antaguṇaṁ udariyaṁ karīsaṁ pittaṁ semhaṁ pubbo lohitaṁ sedo medo assu vasā kheḷo singhāṇikā kasikā muttan ti.|| ||

Evaṁ kho bhikkhave, bhikkhu||
yathā adho tathā uddhaṁ,||
yathā uddhaṁ tathā adho viharati.|| ||

13. Kathañ ca bhikkhave, bhikkhu||
yathā divā tathā rattiṁ||
yathā rattiṁ tathā divā viharati?|| ||

Idha bhikkhave, bhikkhu||
yehi ākārehi yehi lingehi yehi nimittehi divā||
chanda-samādhi-padhāna-saṅkhāra-samannāgataṁ iddhi-pādaṁ bhāveti,||
so tehi ākārehi tehi lingehi tehi nimittehi rattiṁ||
chanda-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Ye hi vā pana ākārehi yehi lingehi yehi nimittehi rattiṁ||
chanda-samādhi-padhāna-saṅkhāra-samannāgataṁ iddhi-pādaṁ bhāveti,||
so tehi ākārehi tehi lingehi tehi nimittehi divā||
chanda-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Evaṁ kho bhikkhave, bhikkhu||
yathā divā tathā rattiṁ||
yathā rattiṁ tathā divā viharati.|| ||

14. Kathañ ca bhikkhave, bhikkhu vivaṭena cetasā apariyonaddhena sa-p-pabhāsaṁ cittaṁ bhāveti?|| ||

Idha bhikkhave, bhikkhuno āloka-saññā suggahitā hoti divā-saññā svādhiṭṭhitā.|| ||

Evaṁ kho bhikkhave, bhikkhu vivaṭena cetasā apariyonaddhena sa-p-pabhāsaṁ cittaṁ bhāveti.|| ||

[279]

§

 

15. Katamañ ca bhikkhave ati-līnaṁ viriyaṁ?|| ||

Yaṁ bhikkhave, viriyaṁ kosajja-saha-gataṁ kosajja-sampayuttaṁ.|| ||

Idaṁ vuccati bhikkhave, ati-līnaṁ viriyaṁ.|| ||

16. Katamañ ca bhikkhave, atipaggahitaṁ viriyaṁ?|| ||

Yaṁ bhikkhave, viriyaṁ uddhacca-saha-gataṁ uddhacca-sampayuttaṁ.|| ||

Idaṁ vuccati bhikkhave, atipaggahitaṁ viriyaṁ.|| ||

17. Katamañ ca bhikkhave, ajjhattaṁ saṅkhittaṁ viriyaṁ?|| ||

Yaṁ bhikkhave, viriyaṁ thīna-middha-saha-gataṁ thīna-middha-sampayuttaṁ.|| ||

Idaṁ vuccati bhikkhave, ajjhattaṁ saṅkhittaṁ viriyaṁ.|| ||

18. Katamañ ca bhikkhave, bahiddhā vikkhittaṁ viriyaṁ?|| ||

Yaṁ bhikkhave, viriyaṁ bahiddhā pañca kāma-guṇe ārabbha anuvikkhittaṁ anuvisaṭaṁ.|| ||

Idaṁ vuccati bhikkhave, bahiddhā vikkhittaṁ viriyaṁ.|| ||

19. Kathañ ca bhikkhave, bhikkhu pacchā-pure-saññī ca viharati?|| ||

Yathā pure tathā pacchā||
yathā pacchā tathā pure?|| ||

Idha bhikkhave, bhikkhuno pacchā-pure saññā suggahitā hoti sumana-sikatā sūpadhāritā suppaṭi-viddhā paññāya.|| ||

Evaṁ kho bhikkhave, bhikkhu pacchā-pure-saññī viharati:|| ||

Yathā pure tathā pacchā||
yathā pacchā tathā pure.|| ||.

20. Kathañ ca bhikkhave, bhikkhu||
yathā adho tathā uddhaṁ,||
yathā uddhaṁ tathā adho viharati?|| ||

Idha bhikkhave, bhikkhu imam eva kāyaṁ uddhaṁ pādatalā adho kesa-matthakā taca-pariyan taṁ pūraṁ nāna-p-pakārassa asucino pacc'avekkhati:|| ||

Atthi imasmiṁ kāye kesā lomā nakhā dantā taco maṁsaṁ nahārū aṭṭhi aṭṭhimiñjā vakkaṁ hadayaṁ yakanaṁ kilomakaṁ pihakaṁ pa-p-phāsaṁ antaṁ antaguṇaṁ udariyaṁ karīsaṁ pittaṁ semhaṁ pubbo lohitaṁ sedo medo assu vasā khelo siṅghānikā kasikā muttan ti.|| ||

Evaṁ kho bhikkhave, bhikkhu||
yathā adho tathā uddhaṁ,||
yathā uddhaṁ tathā adho viharati.|| ||

21. Kathañ ca bhikkhave, bhikkhu||
yathā divā tathā rattiṁ||
yathā rattiṁ tathā divā viharati?|| ||

Idha bhikkhave, bhikkhu||
yehi ākārehi yehi lingehi yehi nimittehi divā||
viriya-samādhi-padhāna-saṅkhāra-samannāgataṁ iddhi-pādaṁ bhāveti,||
so tehi ākārehi tehi lingehi tehi nimittehi rattiṁ||
viriya-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Ye hi vā pana ākārehi yehi lingehi yehi nimittehi rattiṁ||
viriya-samādhi-padhāna-saṅkhāra-samannāgataṁ iddhi-pādaṁ bhāveti,||
so tehi ākārehi tehi lingehi tehi nimittehi divā||
viriya-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Evaṁ kho bhikkhave, bhikkhu||
yathā divā tathā rattiṁ||
yathā rattiṁ tathā divā viharati.|| ||

22. Kathañ ca bhikkhave, bhikkhu vivaṭena cetasā apariyonaddhena sa-p-pabhāsaṁ cittaṁ bhāveti?|| ||

Idha bhikkhave, bhikkhuno āloka-saññā suggahitā hoti divā-saññā svādhiṭṭhitā.|| ||

Evaṁ kho bhikkhave, bhikkhu vivaṭena cetasā apariyonaddhena sa-p-pabhāsaṁ cittaṁ bhāveti.|| ||

 

§

 

23. Katamañ ca bhikkhave, ati-līnaṁ cittaṁ?|| ||

Yaṁ bhikkhave, cittaṁ kosajja-saha-gataṁ kosajja-sampayuttaṁ.|| ||

Idaṁ vuccati bhikkhave, ati-līnaṁ cittaṁ.|| ||

24. Katamañ ca bhikkhave, atipaggahitaṁ cittaṁ?|| ||

Yaṁ bhikkhave, cittaṁ uddhacca-saha-gataṁ uddhacca-sampayuttaṁ.|| ||

Idaṁ vuccati bhikkhave, atipaggahitaṁ cittaṁ.|| ||

25. Katamañ ca bhikkhave, ajjhattaṁ saṅkhittaṁ cittaṁ?|| ||

Yaṁ bhikkhave cittaṁ thīna-middha-saha-gataṁ thīna-middha-sampayuttaṁ.|| ||

Idaṁ vuccati bhikkhave, ajjhattaṁ saṅkhittaṁ cittaṁ.|| ||

[280] 26. Katamañ ca bhikkhave, bahiddhā vikkhittaṁ cittaṁ?|| ||

Yaṁ bhikkhave cittaṁ bahiddhā pañca kāma-guṇe ārabbha anuvikkhittaṁ anuvisaṭaṁ.|| ||

Idaṁ vuccati bhikkhave bahiddhā vikkhittaṁ cittaṁ.|| ||

26. Kathañ ca bhikkhave, bhikkhu pacchā-pure-saññī ca viharati?|| ||

Yathā pure tathā pacchā||
yathā pacchā tathā pure?|| ||

Idha bhikkhave, bhikkhuno pacchā-pure saññā suggahitā hoti sumana-sikatā sūpadhāritā suppaṭi-viddhā paññāya.|| ||

Evaṁ kho bhikkhave, bhikkhu pacchā-pure-saññī viharati:|| ||

Yathā pure tathā pacchā||
yathā pacchā tathā pure.|| ||.

27. Kathañ ca bhikkhave, bhikkhu||
yathā adho tathā uddhaṁ,||
yathā uddhaṁ tathā adho viharati?|| ||

Idha bhikkhave, bhikkhu imam eva kāyaṁ uddhaṁ pādatalā adho kesa-matthakā taca-pariyan taṁ pūraṁ nāna-p-pakārassa asucino pacc'avekkhati:|| ||

Atthi imasmiṁ kāye kesā lomā nakhā dantā taco maṁsaṁ nahārū aṭṭhi aṭṭhimiñjā vakkaṁ hadayaṁ yakanaṁ kilomakaṁ pihakaṁ pa-p-phāsaṁ antaṁ antaguṇaṁ udariyaṁ karīsaṁ pittaṁ semhaṁ pubbo lohitaṁ sedo medo assu vasā khelo siṅghānikā kasikā muttanti.|| ||

Evaṁ kho bhikkhave, bhikkhu||
yathā adho tathā uddhaṁ,||
yathā uddhaṁ tathā adho viharati.|| ||

28. Kathañ ca bhikkhave, bhikkhu||
yathā divā tathā rattiṁ||
yathā rattiṁ tathā divā viharati?|| ||

Idha bhikkhave, bhikkhu||
yehi ākārehi yehi lingehi yehi nimittehi divā||
citta-samādhi-padhāna-saṅkhāra-samannāgataṁ iddhi-pādaṁ bhāveti,||
so tehi ākārehi tehi lingehi tehi nimittehi rattiṁ||
citta-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Ye hi vā pana ākārehi yehi lingehi yehi nimittehi rattiṁ||
citta-samādhi-padhāna-saṅkhāra-samannāgataṁ iddhi-pādaṁ bhāveti,||
so tehi ākārehi tehi lingehi tehi nimittehi divā||
citta-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Evaṁ kho bhikkhave, bhikkhu||
yathā divā tathā rattiṁ||
yathā rattiṁ tathā divā viharati.|| ||

29. Kathañ ca bhikkhave, bhikkhu vivaṭena cetasā apariyonaddhena sa-p-pabhāsaṁ cittaṁ bhāveti?|| ||

Idha bhikkhave, bhikkhuno āloka-saññā suggahitā hoti divā-saññā svādhiṭṭhitā.|| ||

Evaṁ kho bhikkhave, bhikkhu vivaṭena cetasā apariyonaddhena sa-p-pabhāsaṁ cittaṁ bhāveti.|| ||

 

§

 

30. Katamā ca bhikkhave, atilīnā vīmaṁsā?|| ||

Yā bhikkhave, vīmaṁsā kosajja-saha-gatā kosajja-sampayuttā.|| ||

Ayaṁ vuccati bhikkhave, atilīnā vīmaṁsā.|| ||

31. Katamā ca bhikkhave, atipaggahitā vīmaṁsā?|| ||

Yā bhikkhave, vīmaṁsā uddhaccasahagatā uddhacca-sampayuttā.|| ||

Ayaṁ vuccati bhikkhave,||
atipaggahitā vīmaṁsā.|| ||

32. Katamā ca bhikkhave, ajjhattaṁ saṅkhittā vīmaṁsā?|| ||

Yā bhikkhave, vīmaṁsā thīna-middha-saha-gatā thīna-middha-sampayuttā.|| ||

Ayaṁ vuccati bhikkhave, ajjhattaṁ saṅkhittā vīmaṁsā.|| ||

33. Katamā ca bhikkhave, bahiddhā vikkhittā vīmaṁsā?|| ||

Yā bhikkhave, vīmaṁsā bahiddhā pañca kāma-guṇe ārabbha anuvikkhittā anuvisaṭā.|| ||

Ayaṁ vuccati bhikkhave, bahiddhā vikkhittā vīmaṁsā.|| ||

34. Kathañ ca bhikkhave, bhikkhu pacchā-pure-saññī ca viharati:|| ||

Yathā pure tathā pacchā||
yathā pacchā tathā pure?|| ||

Idha bhikkhave, bhikkhuno pacchā-pure saññā suggahitā hoti sumana-sikatā sūpadhāritā suppaṭi-viddhā paññāya.|| ||

Evaṁ kho bhikkhave, bhikkhu pacchā-pure-saññī viharati:|| ||

Yathā pure tathā pacchā||
yathā pacchā tathā pure.|| ||.

35. Kathañ ca bhikkhave, bhikkhu||
yathā adho tathā uddhaṁ,||
yathā uddhaṁ tathā adho viharati?|| ||

Idha bhikkhave, bhikkhu imam eva kāyaṁ uddhaṁ pādatalā adho kesa-matthakā taca-pariyan taṁ pūraṁ nāna-p-pakārassa asucino pacc'avekkhati:|| ||

Atthi imasmiṁ kāye kesā lomā nakhā dantā taco maṁsaṁ nahārū aṭṭhi aṭṭhimiñjā vakkaṁ hadayaṁ yakanaṁ kilomakaṁ pihakaṁ pa-p-phāsaṁ antaṁ antaguṇaṁ udariyaṁ karīsaṁ pittaṁ semhaṁ pubbo lohitaṁ sedo medo assu vasā khelo siṅghānikā kasikā muttan ti.|| ||

Evaṁ kho bhikkhave, bhikkhu||
yathā adho tathā uddhaṁ,||
yathā uddhaṁ tathā adho viharati.|| ||

36. Kathañ ca bhikkhave, bhikkhu||
yathā divā tathā rattiṁ||
yathā rattiṁ tathā divā viharati?|| ||

Idha bhikkhave, bhikkhu||
yehi ākārehi yehi lingehi yehi nimittehi divā||
vīmaṁsā-samādhi-padhāna-saṅkhāra-samannāgataṁ iddhi-pādaṁ bhāveti,||
so tehi ākārehi tehi lingehi tehi nimittehi rattiṁ||
vīmaṁsā-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Ye hi vā pana ākārehi yehi lingehi yehi nimittehi rattiṁ||
vīmaṁsā-samādhi-padhāna-saṅkhāra-samannāgataṁ iddhi-pādaṁ bhāveti,||
so tehi ākārehi tehi lingehi tehi nimittehi divā||
vīmaṁsā-samādhi-padhāna-saṅkhāra-samannāgataṁ iddhi-pādaṁ bhāveti.|| ||

Evaṁ kho bhikkhave, bhikkhu||
yathā divā tathā rattiṁ||
yathā rattiṁ tathā divā viharati.|| ||

37. Kathañ ca bhikkhave, bhikkhu vivaṭena cetasā apariyonaddhena sa-p-pabhāsaṁ cittaṁ bhāveti?|| ||

Idha bhikkhave, bhikkhuno āloka-saññā suggahitā hoti divā-saññā svādhiṭṭhitā.|| ||

Evaṁ kho bhikkhave, bhikkhu vivaṭena cetasā apariyonaddhena sa-p-pabhāsaṁ cittaṁ bhāveti.|| ||

 

§

 

38. Evaṁ bhāvitā kho bhikkhave,||
cattāro iddhi-pādā evaṁ bahulī-katā maha-p-phalā honti mahā-nisaṁsā.|| ||

Evaṁ bhāvitesu kho bhikkhave,||
bhikkhu catusu iddhi-pādesu evaṁ bahulī-katesu aneka-vihitaṁ iddhi-vidhaṁ pacc'anubhoti.|| ||

Eko pi hutvā bahudhā hoti bahudhā pi hutvā eko hoti.|| ||

Āvībhāvaṁ tiro-bhāvaṁ tiro-kuḍḍaṁ tiro-pākāraṁ tiro-pabbataṁ asajja-mānova gacchati, seyyathā pi ākāse.|| ||

Paṭhaviyā pi ummujjani-mujjaṁ karoti seyyathā pi udake.|| ||

Udake pi abhijjamāno gacchati seyyathā pi paṭhaviyaṁ.|| ||

Ākāse pi pallaṅkena kamati seyyathā pi pakkhī sakuṇo.|| ||

Ime pi candima-suriye evaṁ mahiddhike evaṁ mah-ā-nubhāve pāṇinā parāma-sati, parimajjati.|| ||

Yāva Brahma-lokā pi kāyena vasaṁ vatteti.|| ||

39. Evaṁ bhāvitesu kho bhikkhave,||
bhikkhu catusu iddhi-pādesu evaṁ bahulī-katesu||
dibbāya sota-dhātuyā visuddhāya atikkanta mānusikāya ubho sadde suṇāti dibbe ca mānuse ca ye dūre santike vāti.|| ||

40. Evaṁ bhāvitesu kho bhikkhave,||
bhikkhu catusu iddhi-pādesu evaṁ bahulī-katesu||
para-sattāṇaṁ para-puggalānaṁ cetasā ceto paricca pajānāti.|| ||

Sarāgaṁ vā cittaṁ 'sarāgaṁ cittan' ti pajānāti.|| ||

Vīta-rāgaṁ vā cittaṁ 'vīta-rāgaṁ cittan' ti pajānāti.|| ||

Sadosaṁ vā cittaṁ 'sadosaṁ cittan' ti pajānāti.|| ||

Vīta-dosaṁ vā cittaṁ 'vīta-dosaṁ cittan' ti pajānāti.|| ||

Samohaṁ vā cittaṁ 'samohaṁ cittan' ti pajānāti.|| ||

Vīta-mohaṁ vā cittaṁ 'vīta-mohaṁ cittan' ti pajānāti.|| ||

Saṅkhittaṁ vā cittaṁ 'saṅkhittaṁ cittan' ti pajānāti.|| ||

Vikkhittaṁ vā cittaṁ 'vikkhittaṁ cittan' ti pajānāti.|| ||

Amahaggataṁ vā cittaṁ 'amahaggataṁ cittan' ti pajānāti.|| ||

Mahaggataṁ vā cittaṁ 'mahaggataṁ cittan' ti pajānāti.|| ||

Sauttaraṁ vā cittaṁ 'sa-uttaraṁ cittan' ti pajānāti.|| ||

Anuttaraṁ vā cittaṁ 'anuttaraṁ cittan' ti pajānāti.|| ||

Asamāhitaṁ vā cittaṁ 'asamāhitaṁ cittan' ti pajānāti.|| ||

Samāhitaṁ vā cittaṁ 'samāhitaṁ cittan' ti pajānāti.|| ||

Avimuttaṁ vā cittaṁ 'avimuttaṁ cittan' ti pajānāti.|| ||

Vimuttaṁ vā cittaṁ 'vimuttaṁ cittan' ti pajānāti.|| ||

41. Evaṁ bhāvitesu kho bhikkhave,||
bhikkhu catusu iddhi-pādesu evaṁ bahulī-katesu||
aneka-vihitaṁ pubbe nivāsaṁ anussarati.|| ||

Seyyath'īdaṁ:|| ||

Ekam pi jātiṁ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo,||
dasa pi jātiyo,||
vīsampi1 jātiyo,||
tiṁsam pi jātiyo,||
cattārīsam pi jātiyo,||
paññāsam pi jātiyo,||
jāti satam pi||
jāti-sahassam pi||
jāti-sata-sahassam pi||
aneke pi saṁvaṭṭakappe||
aneke pi vivaṭṭa-kappe||
aneke pi saṁvaṭṭa-vivaṭṭa-kappe.|| ||

Amutrāsiṁ:|| ||

'Evaṁ nāmo||
evaṁ gotto||
evaṁ vaṇṇo||
evam āhāro||
evaṁ sukha-dukkha-paṭisaṁvedī||
evam āyu-pariyanto.|| ||

So tato cuto amutra udapādiṁ.|| ||

Tatrāvāsiṁ:|| ||

Evaṁ nāmo||
evaṁ gotto||
evaṁ vaṇṇo||
evam āhāro||
evaṁ sukha-dukkha-paṭisaṁvedī||
evam āyu-pariyanto.|| ||

So tato cuto idh'ūpapanno' ti.|| ||

Iti sākāraṁ sauddesaṁ aneka-vihitaṁ pubbe nivāsaṁ anussarati.|| ||

42. Evaṁ bhāvitesu kho bhikkhave,||
bhikkhu catusu iddhi-pādesu evaṁ bahulī-katesu||
dibbena cakkhunā visuddhena atikkanta-mānusakena satte passati:|| ||

Cavamāne uppajjamāne hīne paṇīte suvaṇṇe dubbaṇṇe sugate duggate yathā-kammupage satte pajānāti:|| ||

'Ime vata bhonto sattā||
kāya-du-c-caritena samantāgatā||
vacī-du-c-caritena samannāgatā||
mano-du-c-caritena samannāgatā||
ariyānaṁ upavādakā||
micchā-diṭṭhikā||
micchā-diṭṭhi-kamma-samādānā.|| ||

Te kāyassa bhedā param maraṇā apāyaṁ duggatiṁ vinipātaṁ Nirayaṁ upapannā.|| ||

Ime kho pana bhonto sattā||
kāya-sucaritena samannāgatā||
vacī-sucaritena samannāgatā||
mano-sucaritena samannāgatā||
ariyānaṁ anupavādakā||
sammā-diṭṭhikā||
sammā-diṭṭhi-kamma-samādānā.|| ||

Te kāyassa bhedā param maraṇā sugatiṁ saggaṁ lokaṁ upapannā' ti.|| ||

Iti dibbena cakkhunā visuddhena atikkanta-mānusakena satte passati:|| ||

'Cavamāne uppajjamāne hīne paṇīte suvaṇṇe dubbaṇṇe sugate duggate yathā-kamm'ūpage satte pajānātī' ti.|| ||

43. Evaṁ bhāvitesu kho bhikkhave,||
bhikkhu catusu iddhi-pādesu evaṁ bahulī-katesu āsavānaṁ khayā anāsavaṁ [281] ceto-vimuttiṁ paññā-vimuttiṁ diṭṭhe'va dhamme sayaṁ abhiññā sacchi-katvā upasampajja viharatī" ti.|| ||

 

Pāsāda-Kampana Vagga