Saṁyutta Nikāya
5. Mahā-Vagga
54. Ānāpāna Saṁyutta
1. Eka-Dhamma Vagga

Sutta 9

Vesālī or Asubha Suttaṁ

 

---

[320]

[1-2][pts][bodh][olds][than] Evam me sutaṁ:|| ||

Ekaṁ samayam Bhagavā Vesāliyaṁ viharati||
Mahāvane||
Kūṭāgāra-sālāyaṁ.|| ||

[2] Tena kho pana samayena Bhagavā bhikkhūnaṁ||
aneka-pariyāyena asubhakathaṁ katheti||
asubhāya vaṇṇaṁ bhāsati,||
asubha-bhāvanāya vaṇṇaṁ bhāsati.|| ||

[3] Atha kho Bhagavā bhikkhū āmantesi:|| ||

"Icchām'ahaṁ bhikkhave,||
addhamāsaṁ paṭisallīyituṁ.|| ||

Namhi kenaci upasaṅkamitabbo aññatra ekena piṇḍa-pātanīhārakenā" ti.|| ||

"Evaṁ bhante" ti||
kho te bhikkhū Bhagavāto paṭi-s-sutvā nāssudha koci Bhagavāntaṁ upasaṅkamati aññatra ekena piṇḍa-pātanīhārakena.|| ||

[4] Atha kho te bhikkhū:|| ||

"Bhagavā aneka-pariyāyena||
asubhakathaṁ kathesi||
asubhāya vaṇṇaṁ bhāsati||
asubha-bhāvanāya vaṇṇaṁ bhāsatī" ti|| ||

anekākāra-vokāraṁ asubha-bhāvan-ā-nuyogam anuyuttā viharanti.|| ||

Te iminā kāyena aṭṭīya-mānā||
harāya-mānā||
jiguccha-mānā||
satthahārakaṁ pariyesanti.|| ||

Dasa pi bhikkhū ekāhena satthaṁ āharanti.|| ||

Vīsatim pi bhikkhū ekāhena satthaṁ āharanti.|| ||

Tiṁsam pi bhikkhū ekāhena satthaṁ āharanti.|| ||

[5] Atha kho Bhagavā tassa uḍḍhamāsassa accayena paṭisallānā vuṭṭhito āyasmantaṁ Ānandaṁ āmantesi:|| ||

"Kiṁ nu kho Ānanda,||
tan ubhūto viya bhikkhū-saṅgho" ti.|| ||

[6] "Tathā hi pana bhante Bhagavā bhikkhūnaṁ||
aneka-pariyāyena asubhakathaṁ kathesi||
asubhāya vaṇṇaṁ [321] bhāsati,||
asubha-bhāvanāya vaṇṇaṁ bhāsati.|| ||

Te ca bhante, bhikkhū:|| ||

"Bhagavā kho aneka-pariyāyena asubhakathaṁ kathesi,||
asubhāya vaṇṇaṁ bhāsati,||
asubha-bhāvanāya vaṇṇaṁ bhāsatī" ti|| ||

anekākāravokāraṁ asubha-bhāvan-ā-nuyogam anuyuttā viharanti.|| ||

Te iminā kāyena aṭṭīya-mānā harāya-mānā satthahārakaṁ pariyesanti dasa pi bhikkhū||
vīsam pi||
tiṇsam pi bhikkhū||
ekāhena satthaṁ āharanti.|| ||

Sādhu bhante,||
Bhagavā aññam pariyāyaṁ||
ācikkhatu tathā yathā-yaṁ bhikkhū-saṅgho||
aññāya saṇṭhaheyyā" ti.|| ||

[7] "Tena h'Ānanda yāvatikā bhikkhū Vesāliṁ upanissāya viharanti,||
te sabbe upaṭṭhāna-sālāyaṁ sannipātehī" ti.|| ||

"Evaṁ bhante" ti kho āyasmā Ānando Bhagavāto paṭi-s-sutvā||
yāvatikā bhikkhū Vesāliṁ upanissāya viharanti,||
te sabbe upaṭṭhāna-sālāyaṁ sannipātetvā yena Bhagavā ten'upasaṅkami.|| ||

Upasaṅkamitvā Bhagavāntaṁ etad avoca:|| ||

"Sannipatito bhante bhikkhū-saṅgho||
yassa dāni Bhagavā kālaṁ maññatī" ti.|| ||

[8] Atha kho Bhagavā yena upaṭṭhānasālā ten'upasaṅkami.|| ||

Upasaṅkamitvā paññatte āsane nisīdi.|| ||

Nisajja kho Bhagavā bhikkhū āmantesi:|| ||

[9] "Ayam pi kho bhikkhave,||
ānāpāna-sati-samādhi||
bhāvito||
bahulī-kato||
santo c'eva paṇīto ca||
asecanako sukho ca||
vihāro uppannuppanne ca||
pāpake akusale dhamme ṭhānaso antaradhāpeti vūpasameti.|| ||

[10] Seyyathā pi, bhikkhave,||
gimhānaṁ pacchime māse ūhataṁ rajojallaṁ,||
tam enaṁ mahā akālamegho ṭhānaso antaradhāpeti vūpasameti.|| ||

Evam eva kho bhikkhave||
ānāpāna-sati-samādhi||
bhāvito||
bahulī-kato||
santo c'eva paṇīto [322] ca||
asecanako ca||
sukho ca||
vihāro uppannuppanne ca||
pāpake akusale dhamme ṭhānaso antaradhāpeti vūpasameti.|| ||

[11] Kathaṁ bhāvito bhikkhave,||
ānāpāna-sati-samādhi||
kathaṁ bahulī-kato||
santo c'eva paṇīto ca||
asecanako ca||
sukho ca||
vihāro uppannuppanne ca||
pāpake akusale dhamme ṭhānaso antaradhāpeti vūpasameti?|| ||

[12] Idha, bhikkhave, bhikkhū arañña-gato||
rukkha-mūla-gato vā||
suññāta-gato vā||
nisīdati pallaṅkaṁ ābhujitvā ujuṁ kāyaṁ paṇidhāya||
parimukhaṁ satiṁ upaṭṭha-petvā||
so sato va assasati||
sato va passasati.|| ||

Dīghaṁ vā assasanto dīghaṁ assasāmī' ti pajānāti.|| ||

Dīghaṁ vā passasanto 'dīghaṁ passasāmī' ti pajānāti.|| ||

Rassaṁ vā assasanto 'rassaṁ assasāmī' ti pajānāti.|| ||

Rassaṁ vā passasanto 'rassaṁ passasāmī' ti pajānāti.|| ||

'Sabba-kāya-paṭisaṁvedī assasissāmī' ti sikkhati.|| ||

'Sabba-kāya-paṭisaṁvedī passissāmī' ti sikkhati.|| ||

'Passam-bhayaṁ kāya-saṅkhāraṁ assasissāmī' ti sikkhati.|| ||

'Passam-bhayaṁ kāya-saṅkhāraṁ passasissāmī' ti sikkhati.|| ||

'Pīti-paṭisaṁvedī assasissāmī' ti sikkhati.|| ||

'Pīti-paṭisaṁvedī passasissāmī' ti sikkhati.|| ||

'Sukha-paṭisaṁvedī assasissāmī' ti sikkhati.|| ||

'Sukha-paṭisaṁvedī passasissāmī' ti sikkhati.|| ||

'Citta-saṅkhāra-paṭisaṁvedī assasissāmī' ti sikkhati.|| ||

'Citta-saṅkhāra-paṭisaṁvedī passasissāmī' ti sikkhati.|| ||

'Passam-bhayaṁ citta-saṅkhāraṁ assasissāmī' ti sikkhati.|| ||

'Passam-bhayaṁ citta-saṅkhāraṁ passasissāmī' ti sikkhati.|| ||

'Citta-saṅkhāra-paṭisaṁvedī assasissāmī' ti sikkhati.|| ||

'Citta-saṅkhāra-paṭisaṁvedī passasissāmī' ti sikkhati.|| ||

'Passam-bhayaṁ citta-saṅkhāraṁ assasissāmī' ti sikkhati.|| ||

'Passam-bhayaṁ citta-saṅkhāraṁ passasissāmī' ti sikkhati.|| ||

'Citta-paṭisaṁvedī assasissāmī' ti sikkhati.|| ||

'Citta-paṭisaṁvedī passasissāmī' ti sikkhati.|| ||

'Abhi-p-pamodayaṁ cittaṁ assasissāmī' ti sikkhati.|| ||

'Abhi-p-pamodayaṁ cittaṁ passasissāmī' ti sikkhati.|| ||

'Samādahaṁ cittaṁ assasissāmī' ti sikkhati.|| ||

'Samādahaṁ cittaṁ passasissāmī' ti sikkhati.|| ||

'Vimocayaṁ cittaṁ assasissāmī' ti sikkhati.|| ||

'Vimocayaṁ cittaṁ passasissāmī' ti sikkhati.|| ||

'Anicc-ā-nupassī assasissāmī' ti sikkhati.|| ||

'Anicc-ā-nupassī passasissāmī' ti sikkhati.|| ||

Virāg-ā-nupassī assasissāmī' ti sikkhati.|| ||

Virāg-ā-nupassī passasissāmī' ti sikkhati.|| ||

Nirodh-ā-nupassī assasissāmī' ti sikkhati.|| ||

Nirodh-ā-nupassī passasissāmī' ti sikkhati.|| ||

Paṭinissagg-ā-nupassī passasissāmī' ti sikkhati.|| ||

Paṭinissagg-ā-nupassī passasissāmī' ti sikkhati.|| ||

[19] Evaṁ bhāvito kho bhikkhave,||
ānāpāna-sati-samādhi||
evaṁ bahulī-kato||
santo c'eva paṇīto ca||
asecanako ca||
sukho ca||
vihāro uppannuppanne ca||
pāpake akusale dhamme ṭhānaso antaradhāpeti vūpasametī" ti.|| ||