Saṁyutta Nikāya
5. Mahā-Vagga
55. Sot'Āpatti Saṁyutta
1. Veḷu-Dvāra Vagga

Sutta 5

Dutiya Sāriputta Suttaṁ

 

---

[347]

[1][pts][than] Evam me sutaṁ:|| ||

Ekaṁ samayam Bhagavā Sāvatthiyaṁ viharati Jetavane Anāthapindikassa ārāme.|| ||

Atha kho āyasmā Sāriputto yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinnaṁ kho āyasmantaṁ Sāriputtaṁ Bhagavā etad avoca:|| ||

"'Sot'āpattiyaṅgaṁ! sot'āpatti-y-aṅgan! ti'||
h'idaṁ Sāriputta, vuccati.|| ||

Katamannukho Sāriputta, sot'āpatti-y-aṅgan" ti?|| ||

"Sappurisa-saṁ-sevo hi bhante, sot'āpatti-y-aṅgaṁ,||
sad'Dhamma-savanaṁ sot'āpatti-y-aṅgaṁ,||
yoniso-mana-sikāro sot'āpatti-y-aṅgaṁ,||
Dhammānudhamma-paṭipatti sot'āpatti-y-aṅgan" ti.|| ||

Sādhu sādhu Sāriputta,||
sappurisa-saṇsevo hi Sāriputta, sot'āpatti-y-aṅgaṁ,||
sad'Dhamma-savanaṁ sot'āpatti-y-aṅgaṁ,||
yoniso-mana-sikāro sot'āpatti-y-aṅgaṁ,||
Dhammānudhamma-paṭipatti sot'āpatti-y-aṅgaṁ.|| ||

'Soto soto' ti||
h'idaṁ Sāriputta, vuccati.|| ||

Katamo nukho Sāriputta, soto" ti?|| ||

"Ayam eva hi bhante, Ariyo Aṭṭhaṅgiko Maggo soto.|| ||

Seyyath'īdaṁ:|| ||

Sammā-diṭṭhi||
sammā-saṅkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhī" ti.|| ||

"Sādhu sādhu Sāriputta,||
ayam eva hi Sāriputta Ariyo Aṭṭhaṅgiko Maggo soto.|| ||

Seyyath'īdaṁ:|| ||

Sammā-diṭṭhi||
sammā-saṅkappo||
sammā-vācā||
sammā-kammanto||
sammā-ājīvo||
sammā-vāyāmo||
sammā-sati||
sammā-samādhī" ti.|| ||

[348] "'Sotāpanno sot'āpanno' ti||
h'idaṁ Sāriputta, vuccati.|| ||

Katamo nukho Sāriputta, Sotāpanno" ti?|| ||

"Yo hi bhante, iminā ariyena aṭṭhaṅgikena maggena samannāgato,||
ayaṁ vuccati Sotāpanno||
yo'yaṁ āyasmā evaṁ nāmo||
evaṁ gotto" ti.|| ||

"Sādhu sādhu Sāriputta,||
yo hi Sāriputta,||
iminā ariyena aṭṭhaṅgikena maggena samannāgato||
ayaṁ vuccati Sotāpanno||
yo'yaṁ āyasmā evaṁ-nāmo||
evaṁ-gotto" ti.|| ||