Saṃyutta Nikāya
5. Mahā-Vagga
55. Sot'Āpatti Saṃyutta
2. Sahassaka or Rājakārama Vagga
Sutta 12
Brāhmaṇā Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayaṃ Bhagavā Sāvatthiyaṃ viharati.|| ||
Tatra kho Bhagavā bhikkhū āmantesi:|| ||
"Bhikkhavo" ti.|| ||
"Bhadante" ti te bhikkhū Bhagavato paccassosuṃ.|| ||
Bhagavā etad avoca:|| ||
"Brāhmaṇā bhikkhave, udayagāminiṃ nāma paṭipadaṃ paññāpenti.|| ||
Te sāvakaṃ evaṃ sam-ā-dapeti:|| ||
'Ehi tvaṃ ambho purisa, kālasseva uṭṭhāya pācīnamukho yāhi.|| ||
So tvaṃ mā sobbhaṃ parivajjehi,||
mā papātaṃ,||
mā khāṇuṃ,||
mā kaṇṭakādhānaṃ,||
mā candanikaṃ,||
mā oligallaṃ.|| ||
Yattha pateyyāsi,||
tatth'eva māraṇaṃ āgaccheyyāsi.|| ||
Evaṃ tvaṃ ambho purisa,||
kāyassa bhedā param māraṇā sugatiṃ saggaṃ lokaṃ uppajjissasī' ti.|| ||
Taṃ kho pan'etaṃ bhikkhave,||
brāhmaṇānaṃ bāla gamaname taṃ.|| ||
Mūḷhagamaname taṃ,||
na nibbidāya,||
na virāgāya,||
na nirodhāya,||
na upasamāya,||
na abhiññāya,||
na sambodhāya,||
na Nibbānāya saṃvaṭṭati.|| ||
Ahañ ca kho bhikkhave, ariyassa vinaye udayagāminiṃ paṭipadaṃ paññā-pemi,||
yā ekanta-nibbidāya||
virāgāya||
nirodhāya||
upasamāya||
abhiññāya||
sambodhāya||
Nibbānāya saṃvaṭṭati.|| ||
Katamā ca sā bhikkhave,||
udayagāminī paṭipadā||
yā ekanta-nibbidāya||
virāgāya||
nirodhāya||
upasamāya||
abhiññāya||
sambodhāya||
Nibbānāya saṃvaṭṭati?|| ||
[362] Idha bhikkhave, ariya-sāvako Buddhe avecca pasādena samannāgato hoti:
'Iti pi so Bhagavā||
arahaṃ||
Sammā Sambuddho||
vijjā-caraṇa-sampanno||
Sugato||
loka-vidu||
anuttaro purisa-damma-sārathī||
Satthā deva-manussānaṃ||
Buddho||
Bhagavā' ti.|| ||
Dhamme avecca pasādena samannāgato hoti:|| ||
'Svākkhāto Bhagavatā dhammo||
sandiṭṭhiko||
akāliko||
ehi passiko||
opanayiko||
paccattaṃ veditabbo viññūhī' ti.|| ||
Saṅghe avecca pasādena samannāgato hoti:|| ||
'Su-paṭipanno Bhagavato sāvaka-saṅgho,||
uju-paṭipanno Bhagavato sāvaka-saṅgho,||
ñāya-paṭipanno Bhagavato sāvaka-saṅgho,||
sāmīci-paṭipanno Bhagavato sāvaka-saṅgho,||
yad idaṃ cattāri purisa-yugāni||
aṭṭhapurisa-puggalā,||
esa Bhagavato sāvaka-saṅgho.|| ||
Āhuneyyo||
pāhuneyyo||
dakkhiṇeyyo||
añjali-karaṇīyo||
anuttaraṃ puññakettaṃ lokassā' ti.|| ||
Ariya-kantehi sīlehi samannāgato hoti||
akhaṇḍehi||
acchiddehi||
asabalehi||
akammāsehi||
bhujissehi||
viññ'uppasatthehi||
aparām-aṭṭhehi||
samādhi-saṃvaṭṭa-nikehi.|| ||
Ayaṃ kho sā bhikkhave,||
udayagāminī paṭipadā,||
yā ekanta-nibbidāya||
virāgāya||
nirodhāya||
upasamāya||
abhiññāya||
sambodhāya||
Nibbānāya saṃvaṭṭatī" ti.
