Saṁyutta Nikāya
5. Mahā-Vagga
55. Sot'Āpatti Saṁyutta
3. Saraṇāni (or Sarakāni) Vagga

Sutta 21

Paṭhama Mahānāma Suttaṁ

 

---

[369]

[1][pts][than][olds] Evam me sutaṁ:|| ||

Ekaṁ samayaṁ Bhagavā Sakkesu viharati Kapilavatthusmiṁ Nigrodhārāme.|| ||

2. Atha kho Mahānāmo Sakko yena Bhagavā ten'upasaṅkami.|| ||

Upasaṅkamitvā Bhagavantaṁ abhivādetvā eka-m-antaṁ nisīdi.|| ||

Eka-m-antaṁ nisinno kho Mahānāmo Sakko Bhagavantaṁ etad avoca:|| ||

3. "Idaṁ bhante, Kapilavatthu iddhañ c'eva phītañ ca bāhu-jaññaṁ ākiṇṇa-manussaṁ sambādha-vyuhaṁ.|| ||

So khv'āhaṁ bhante, Bhagavantaṁ payirupāsitvā mano-bhāvanīyaṁ vā bhikkhuṁ,||
sāyaṇha-samayaṁ Kapilavatthuṁ pavisanto,||
bhantena pi hatthinā samāgacchāmi,||
bhantena pi assena samāgacchāmi,||
bhantena pi rathena samāgacchāmi,||
bhantena pi sakaṭena samāgacchāmi,||
bhantena pi purisena samāgacchāmi.|| ||

Tassa mayhaṁ bhante, tasmiṁ samaye||
mussat'eva Bhagavantaṁ ārabbha sati||
mussati dhammaṁ ārabbha sati||
mussati Saṅghaṁ ārabbha sati.|| ||

Tassa mayhaṁ bhante, evaṁ hoti:|| ||

'Imehi c'āhaṁ samaye kālaṁ kareyyaṁ kā mayhaṁ gati,||
ko abhisamparāyo'" ti?|| ||

 

§

 

4. "Mā bhāyi Mahānāma!|| ||

Mā bhāyi Mahānāma!|| ||

Apāpakaṁ te maraṇaṁ bhavissati,||
apāpikā kālaṁ-kiriyā.|| ||

Yassa kassaci Mahānāma, dīgha-rattaṁ||
saddhā-paribhāvitaṁ cittaṁ,||
sīla-paribhāvitaṁ cittaṁ,||
suta-paribhāvitaṁ cittaṁ,||
cāga-paribhāvitaṁ cittaṁ,||
paññā-paribhāvitaṁ cittaṁ —||
tassa yo hi khvāyaṁ kāyo||
rūpī cātum-mahā-bhūtiko||
mātā- [370] pettika-sambhavo||
odana-kummās-ūpacayo||
anicc'ucchādana-parimaddana-bhedana-viddhaṁsana-dhammo,||
taṁ idh'eva kākā vā khādanti,||
gijjhā vā khādanti,||
kulalā vā khādanti,||
supānā vā khādanti,||
sigālā vā khādanti,||
vividhā vā pāṇakajātā khādanti,||
yañ ca khvassa cittaṁ dīgha-rattaṁ||
saddhā-paribhāvitaṁ,||
sīla-paribhāvitaṁ,||
suta-paribhāvitaṁ,||
cāga-paribhāvitaṁ,||
paññā-paribhāvitaṁ,||
taṁ uddhaṁ-gāmī hoti visesa-gāmī.|| ||

■

Seyyathā pi Mahānāma, balavā puriso sappikumbhaṁ vā telakumbhaṁ vā gambhīraṁ udaka-rahadaṁ ogāhetvā bhindeyya,||
tatra yāssa sakkharā vā||
kaṭhalā vā sā adhogāmī assa.|| ||

Yaṇ ca khvassa tatra||
sappi vā telaṁ vā||
taṁ uddhaṇ-gāmī assa visesa-gāmi.|| ||

■

Evam eva kho Mahānāma, yassa kassaci Mahānāma, dīgha-rattaṁ||
saddhā-paribhāvitaṁ cittaṁ,||
sīla-paribhāvitaṁ cittaṁ,||
suta-paribhāvitaṁ cittaṁ,||
cāga-paribhāvitaṁ cittaṁ,||
paññā-paribhāvitaṁ cittaṁ —||
tassa yo hi khvāyaṁ kāyo||
rūpī cātum-mahā-bhūtiko||
mātā-pettika-sambhavo||
odana-kummās-ūpacayo||
anicc'ucchādana-parimaddana-bhedana-viddhaṁsana-dhammo,||
taṁ idh'eva kākā vā khādanti,||
gijjhā vā khādanti,||
kulalā vā khādanti,||
supānā vā khādanti,||
sigālā vā khādanti,||
vividhā vā pāṇakajātā khādanti,||
yañ ca khvassa cittaṁ dīgha-rattaṁ||
saddhā-paribhāvitaṁ,||
sīla-paribhāvitaṁ,||
suta-paribhāvitaṁ,||
cāga-paribhāvitaṁ,||
paññā-paribhāvitaṁ,||
taṁ uddhaṁ-gāmī hoti visesa-gāmī.|| ||

■

Tuyhaṁ kho pana Mahānāma, dīgha-rattaṁ||
saddhā-paribhāvitaṁ,||
sīla-paribhāvitaṁ,||
suta-paribhāvitaṁ,||
cāga-paribhāvitaṁ,||
paññā-paribhāvitaṁ.|| ||

Mā bhāyi Mahānāma!|| ||

Mā bhāyi Mahānāma!|| ||

Apāpakaṁ te maraṇaṁ bhavissati.|| ||

Apāpikā kāla-kiriyā" ti.|| ||