Saṃyutta Nikāya
5. Mahā-Vagga
55. Sot'Āpatti Saṃyutta
6. Sappañña Vagga
Sutta 52
Vassa-Vuttha Suttaṃ
Adapted from the 1995 edition of the digital version of the Sri Lanka Buddha Jayanti Tripitaka Series.
Ekaṃ samayam Bhagavā Sāvatthiyaṃ viharati Jetavane Anāthapiṇḍikassa ārāme.|| ||
Tena kho pana samayena aññataro bhikkhu||
Sāvatthiyaṃ vassaṇ vuttho||
Kapilavatthuṃ anuppatto hoti||
kenacid'eva karaṇīyena.|| ||
Assosuṃ kho Kāpilavatthavā Sakkā:|| ||
"Aññataro kira bhikkhu Sāvatthiyaṃ vassaṇ vuttho||
Kapilavatthuṃ anuppatto" ti.|| ||
Atha kho Kāpilavatthavā Sakkā yena so bhikkhu ten'upasaṇkamiṃsu.|| ||
Upasaṇkamitvā taṃ bhikkhuṃ abhivādetvā eka-m-antaṃ nisīdiṃsu.|| ||
Eka-m-antaṃ nisinnā kho Kāpilavatthavā Sakkā taṃ bhikkhuṃ etad avocuṃ:|| ||
"Kacci bhante, Bhagavā||
arogo c'eva balavā cā" ti?|| ||
"Arogā c'āvuso Bhagavā balava cā" ti.|| ||
[406] "Kacci pan bhante Sāriputta-Moggallānā arogā c'eva balavanto cā" ti.|| ||
"Sāriputta-Moggallānā pi kho avuso arogā c'eva balavanto cā" ti.|| ||
"Kacci pana bhante, bhikkhu-saṇgho||
arogo ca balavā cā" ti?|| ||
"Bhikkhu-saṇgho pi kho āvuso||
arogo ca balavā cā" ti.|| ||
"Atthi pana bhante,||
kiñci iminā antaravassena Bhagavato sammukhā sutaṃ sammukhā paṭiggahitan" ti?|| ||
"Sammukhā me taṃ āvuso, Bhagavato sutaṃ||
sammukhā paṭiggahitaṃ:|| ||
'Appakā te bhikkhave,||
bhikkhū ye āsavānaṃ khayā||
anāsavaṃ ceto vimuttiṃ||
paññā-vimuttiṃ||
diṭṭhe'va dhamme||
sayaṃ abhiññā sacchi-katvā||
upasampajja viharanti.|| ||
Atha kho ete va bahutarā bhikkhū||
ye pañcannaṃ oram-bhāgiyānaṃ saṃyojanānaṃ parikkhayā||
opapātikā tattha parinibbāyino||
anāvatti-dhammā asmā lokā' ti.|| ||
Aparam pi kho me āvuso Bhagavato||
sammukhā sutaṃ||
sammukhā paṭiggahitaṃ:|| ||
'Appakā te bhikkhave, bhikkhū||
ye pañcannaṃ oram-bhāgiyānaṃ saṃyojanānaṃ parikkhayā||
opapātikā tattha paranibbāyino anāvatti-dhammā asmā lokā.|| ||
Atha kho ete bahutarā bhikkhū ye tiṇṇaṃ saṃyojanānaṃ parikkhayā||
rāga-dosa-mohānaṃ tanuttā||
Sakad-āgāmino sakid eva||
imaṃ lokaṃ āgantvā dukkhassantaṃ karissantī' ti.|| ||
Aparam pi kho me āvuso Bhagavato||
sammukhā sutaṃ||
sammukhā paṭiggahitaṃ:|| ||
'Appakā te bhikkhave, bhikkhū ye tiṇṇaṃ saṃyojanānaṃ parikkhayā||
rāga-dosa-mohānaṃ tanuttā||
Sakad-āgāmino sakid eva||
imaṃ lokaṃ āgantvā dukkhassantaṃ karissanti,||
atha kho ete va bahutarā bhikkhū ye tiṇṇaṃ saṃyojanānaṃ parikkhayā||
Sot'āpannā||
avinipāta-dhammā||
niyatā||
sambodhi-parāyanā'" ti.|| ||
