Saṁyutta Nikāya
5. Mahā-Vagga
56. Sacca Saṁyutta
1. Samādhi Vagga

Sutta 9

Viggāhikā-Kathā Suttaṁ

 

---

[419]

[1][pts][bodh] Evaṁ me sutaṁ:|| ||

Ekaṁ samayaṁ Bhagavā Sāvatthiyaṁ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Mā bhikkhave, viggāhika-kathaṁ katheyyātha:|| ||

'Na tvaṁ imaṁ Dhamma-Vinayaṁ ājānāsi,||
ahaṁ imaṁ Dhamma-Vinayaṁ ājānāmi.|| ||

Kiṁ tvaṁ imaṁ Dhamma-Vinayaṁ ājānissasi?|| ||

Micchā-paṭipanno tvam asi.|| ||

Aham asmi sammā-paṭipanno.|| ||

Pure vacanīyaṁ pacchā avaca,||
pacchā vacanīyaṁ pure avaca.|| ||

Sahitaṁ me,||
asahitaṁ te.|| ||

Āciṇṇaṁ te viparāvattaṁ.|| ||

Āropito te vādo.|| ||

Cara vāda-p-pamokkhāya,||
niggahito si,||
nibbaṭhehi sace pahosī' ti.|| ||

Taṁ kissa hetu?|| ||

N'esā bhikkhave, kathā attha-saṇhitā,||
nādiBrahma-cariyakā,||
na nibbidāya||
na virāgāya||
na nirodhāya||
na upamāya||
na abhiññāya||
na sambodhāya||
na Nibbānāya saṁvaṭṭati.|| ||

 

§

 

Kathentā ca kho tumhe bhikkhave:||
'idaṁ dukkhan' ti cinteyyātha,||
'ayaṁ dukkha-samudayo' ti cinteyyātha,||
'ayaṁ dukkha-nirodho' ti cinteyyātha,||
'ayaṁ dukkha-nirodha-gāminī paṭipadā' ti cinteyyātha.|| ||

Taṁ kissa hetu?|| ||

Esā bhikkhave, cintā attha-saṇhitā,||
esā ādiBrahma-cariyakā,||
esā nibbidāya||
virāgāya||
nirodhāya||
upasamāya||
abhiññāya||
sambodhāya||
Nibbānāya saṁvaṭṭati.|| ||

Tasmātiha bhikkhave,||
'idaṁ dukkhan' ti yogo karaṇīyo,||
'ayaṁ dukkha-samudayo' ti yogo karaṇīyo,||
'ayaṁ dukkha-nirodho' ti yogo karaṇīyo,||
'ayaṁ dukkha-nirodha-gāminī paṭipadā' ti yogo karaṇīyo" ti.|| ||