Saṁyutta Nikāya
5. Mahā-Vagga
56. Sacca Saṁyutta
3. Koṭigāma Vagga

Sutta 28

Pariññeyyaṁ or Abhiññeyya Suttaṁ

 

---

[436]

[1][pts][bodh] Evam me sutaṁ:|| ||

Ekaṁ samayam Bhagavā Sāvatthiyaṁ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Cattār'imāni bhikkhave, ariya-saccāni.|| ||

Katamāni cattāri?|| ||

Dukkhaṁ ariya-saccaṁ,||
dukkha-samudayo ariya-saccaṁ||
dukkha-nirodho ariya-saccaṁ||
dukkha-nirodha-gāminī paṭipadā ariya-saccaṁ.|| ||

Imesaṁ kho bhikkhave, catunnaṁ ariya-saccānaṁ||
atthi ariya-saccaṁ pariññeyyaṁ,||
atthi ariya-saccaṁ pahātabbaṁ,||
atthi ariya-saccaṁ sacchikātabbaṁ,||
atthi ariya-saccaṁ bhāvetabbaṁ.|| ||

Katamañ ca bhikkhave,||
ariya-saccaṁ pariññeyyaṁ?|| ||

Dukkhaṁ bhikkhave,||
ariya-saccaṁ pariññeyyaṁ.|| ||

Katamañ ca bhikkhave,||
ariya-saccaṁ pahātabbaṁ?|| ||

Dukkha-samudayo||
ariya-saccaṁ pahātabbaṁ.|| ||

Katamañ ca bhikkhave,||
ariya-saccaṁ sacchikātabbaṁ?|| ||

Dukkha-nirodho||
ariya-saccaṁ sacchikātabbaṁ,|| ||

Katamañ ca bhikkhave,||
ariya-saccaṁ bhāvetabbaṁ?|| ||

Dukkha-nirodha-gāminī paṭipadā||
ariya-saccaṁ bhāvetabbaṁ.|| ||

Tasmātiha bhikkhave,||
'idaṁ dukkhan' ti yogo karaṇīyo,||
'ayaṁ dukkha-samudayo' ti yogo karaṇīyo,||
'ayaṁ dukkha-nirodho' ti yogo karaṇīyo,||
'ayaṁ dukkha-nirodha-gāmin paṭipadā' ti yogo karaṇīyo" ti.|| ||