Saṁyutta Nikāya
5. Mahā-Vagga
56. Sacca Saṁyutta
4. Siṁsapā Vagga

Sutta 31

Siṁsapā Suttaṁ

 

---

[437]

[1][pts][bodh][than] Evam me sutaṁ:|| ||

Ekaṁ samayaṁ Bhagavā Kosambīyaṁ viharati Siṁsapā-vane.|| ||

Atha kho Bhagavā parittāni siṁsapā-paṇṇāni pāṇinā gahetvā||
bhikkhū āmantesi:|| ||

"Taṁ kiṁ maññatha bhikkhave?|| ||

Katamaṁ nu kho bahutaraṁ||
yāni vā mayā parittāni siṁsapāpaṇṇāni pāṇinā gahitāni||
yad idam upari siṁsapā-vane" ti?|| ||

[438] Appamattakāni bhante,||
Bhagavatā parittāni siṁsapāpaṇṇāni pāṇinā gahitāni.|| ||

Atha kho etān'eva bahutarāni||
yad idaṁ upari siṁsapāvane" ti.|| ||

"Evam eva kho, bhikkhave,||
etad eva bahutaraṁ||
yaṁ vo mayā abhiññā anakkhātaṁ.|| ||

Appa-mattakaṁ akkhātaṁ.|| ||

Kasmā c'etaṁ bhikkhave,||
mayā anakkhātaṁ?|| ||

Na h'etaṁ bhikkhave, attha-saṁhitaṁ||
n'ādibrahma-cariyakaṁ||
na nibbidāya||
na virāgāya||
na nirodhāya||
na upasamāya||
na abhiññāya||
na sambodhāya||
na Nibbānāya saṁvaṭṭati.|| ||

Tasmā taṁ mayā anakkhātaṁ.|| ||

Kiñ ca bhikkhave,||
mayā akkhātaṁ?|| ||

'Idaṁ dukkhan' ti bhikkhave,||
mayā akkhātaṁ,||
'ayaṁ dukkha-samudayo' ti,||
mayā akkhātaṁ,||
'ayaṁ dukkha-nirodho' ti,||
mayā akkhataṁ,||
'ayaṁ dukkha-nirodha-gāminī paṭipadā' ti,||
mayā akkhātaṁ.|| ||

Kasmā c'etaṁ bhikkhave mayā akkhātaṁ?|| ||

Etaṁ hi bhikkhave, attha-saṁhitaṁ,||
etaṁ ādibrahma-cariyakaṁ,||
etaṁ nibbidāya||
virāgāya||
nirodhāya||
upasamāya||
abhiññāya||
sambodhāya||
Nibbānāya saṁvaṭṭati,||
tasmā taṁ mayā akkhātaṁ.|| ||

Tasmātiha bhikkhave,||
'idaṁ dukkhan' ti yogo karaṇīyo,||
'ayaṁ dukkha-samudayo' ti yogo karaṇīyo,||
'ayaṁ dukkha-nirodho' ti yogo karaṇīyo,||
'ayaṁ dukkha-nirodha-gāminī paṭipadā' ti yogo karaṇīyo" ti.|| ||