Khadira Suttaṁ

Adapted from the 1995 edition of the digital version of the Sri Lanka Buddha Jayanti Tripitaka Series.

[438]

[1][pts][bodh][than] Evam me sutaṁ:|| ||

Ekaṁ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Yo bhikkhave, evaṁ vadeyya:|| ||

'Ahaṁ dukkhaṁ ariya-saccaṁ||
yathā-bhūtaṁ anabhisamecca,||
dukkha-samudayaṁ ariya-saccaṁ||
yathā-bhūtaṁ anabhisamecca,||
dukkha-nirodhaṁ ariya-saccaṁ||
yathā-bhūtaṁ anabhisamecca,||
dukkha-nirodha-gāminī-paṭipadaṁ ariya-saccaṁ||
yathā-bhūtaṁ anabhisamecca||
sammā dukkhassantaṁ karissāmī' ti.|| ||

N'etaṁ ṭhānaṁ vijjati.|| ||

Seyyathā pi bhikkhave, yo evaṁ vadeyya:|| ||

'Ahaṁ khadira-pattāṇaṁ vā||
salala-pattāṇaṁ vā||
āmalaka-pattāṇaṁ vā||
[439] puṭaṁ karitvā udakaṁ vā||
tālapakkaṁ vā harissāmī' ti.|| ||

Netaṁ ṭhānaṁ vijjati.|| ||

Evam eva kho bhikkhave, yo evaṁ vadeyya:|| ||

N'etaṁ ṭhānaṁ vijjati.|| ||

Yo ca kho bhikkhave, evaṁ vadeyya:|| ||

'Ahaṁ dukkhaṁ ariya-saccaṁ||
yathā-bhūtaṁ abhisamecca,||
dukkha-samudayaṁ ariya-saccaṁ||
yathā-bhūtaṁ abhisamecca,||
dukkha-nirodhaṁ ariya-saccaṁ||
yathā-bhūtaṁ abhisamecca,||
dukkha-nirodha-gāminī-paṭipadaṁ ariya-saccaṁ||
yathā-bhūtaṁ abhisamecca||
sammā dukkhassantaṁ karissāmī" ti.|| ||

Ṭhāname taṁ vijjati.|| ||

Seyyathā pi bhikkhave, yo evaṁ vadeyya:|| ||

'Ahaṁ paduma-pattāṇaṁ vā||
palāsa-pattāṇaṁ vā||
māluvā-pattāṇaṁ vā||
puṭaṁ karitvā udakaṁ vā||
tālapakkaṁ vā harissāmī" ti||
ṭhāname taṁ vijjati.|| ||

Evam eva kho, bhikkhave, yo evaṁ vadeyya:|| ||

Tasmātiha bhikkhave,||
'idaṁ dukkhan' ti yogo karaṇīyo,||
'ayaṁ dukkha-samudayo' ti yogo karaṇīyo,||
'ayaṁ dukkha-nirodho' ti yogo karaṇīyo,||
'ayaṁ dukkha-nirodha-gāminī paṭipadā' ti yogo karaṇīyo" ti.|| ||

Saṁyutta Nikāya 5. Mahā-Vagga 56. Sacca Saṁyutta 4. Siṁsapā Vagga

Sutta 32

Khadira Suttaṁ

Saṁyutta Nikāya
5. Mahā-Vagga
56. Sacca Saṁyutta
4. Siṁsapā Vagga