Saṁyutta Nikāya
5. Mahā-Vagga
56. Sacca Saṁyutta
4. Siṁsapā Vagga

Sutta 38

Dutiya Suriy'Upamā Suttaṁ

 

---

[442]

[1][pts][bodh] Evam me sutaṁ:|| ||

Ekaṁ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Yāva kīvañ ca me bhikkhave,||
candima-suriyā loke n'ūppajjanti,||
n'eva tāva mahato ālokassa pātu-bhāvo hoti||
mahato obhāsassa.|| ||

Andhantamaṁ tadā hoti||
andhakāratimisā.|| ||

N'eva tāva rattin-divā paññāyanti||
na māsaddhamāsā paññāyanti||
na utusaṁvaccharā paññāyanti.|| ||

Yato ca kho bhikkhave,||
candima-suriyā loke uppajjati,||
atha mahato ālokassa pātu-bhāvo hoti,||
mahato obhāsassa.|| ||

[443] N'eva andhantamaṁ tadā hoti,||
na andhakāratimisā.|| ||

Atha rattin-divā paññāyanti||
māsaddhamāsā paññāyanti||
utusaṁvaccharā paññāyanti.|| ||

Evam eva kho bhikkhave,||
yāva kīvañ ca Tathāgato loke n'ūppajjati||
arahaṁ Sammā Sambuddho,||
n'eva tāva mahato ālokassa pātu-bhāvo hoti||
mahato obhāsassa.|| ||

Andhantamaṁ tadā hoti||
andhakāratimisā.|| ||

N'eva tāva catunnaṁ ariya-saccānaṁ ācikkhanā hoti desanā||
paññā-panā||
paṭṭhapanā||
vivaraṇā||
vibhajanā||
uttānīkammaṁ.|| ||

Yato ca kho bhikkhave, Tathāgato loke uppajjati arahaṁ Sammā Sambuddho||
atha mahato ālokassa pātu-bhāvo hoti||
mahato obhāsassa.|| ||

N'eva andhantamaṁ tadā hoti||
na andhakāratimisā.|| ||

Atha kho catunnaṁ ariya-saccānaṁ ācikkhanā hoti desanā||
paññā-panā||
paṭṭhapanā||
vivaraṇā||
vibhajanā||
uttānīkammaṁ.|| ||

Katamesaṇ catunnaṁ?|| ||

Dukkhassa ariya-saccassa,||
dukkha-samudayassa ariya-saccassa,||
dukkha-nirodhassa ariya-saccassa,||
dukkha-nirodha-gāminī paṭipadāya ariya-saccassa.|| ||

Tasmātiha bhikkhave,||
'idaṁ dukkhan' ti yogo karaṇīyo,||
'ayaṁ dukkha-samudayo' ti yogo karaṇīyo,||
'ayaṁ dukkha-nirodho' ti yogo karaṇīyo,||
'ayaṁ dukkha-nirodha-gāminī paṭipadā' ti yogo karaṇīyo" ti.|| ||