Saṁyutta Nikāya
5. Mahā-Vagga
56. Sacca Saṁyutta
5. Papāta Vagga

Sutta 48

Tatiya Chiggaḷa Suttaṁ

 

---

[450]

[1][pts][bodh][than] Evam me sutaṁ:|| ||

Ekaṁ samayam Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṁ.|| ||

Bhagavā etad avoca:|| ||

"Seyyathā pi bhikkhave, ayaṁ mahā-paṭhavī ekodikā assa.|| ||

Tatra puriso ekacchigga'aṁ yugaṁ pakkhipeyya.|| ||

Tam enaṁ puratthimo vāto pacchimena saṁhareyya.

Pacchimo vāto puratthimena saṁhareyya.

Uttaro vāto dakkhiṇena saṁhareyya.|| ||

Dakkhiṇo vāto uttarena saṁhareyya.|| ||

Tatr'assa kāṇo kacchapo.|| ||

So vassa-satassa vassa-satassa accayena sakiṁ sakiṁ ummujjeyya.|| ||

3. Taṁ kiṁ maññatha bhikkhave,||
api nu so kāṇo kacchapo||
vassa-satassa vassa-satassa||
accayena sakiṁ sakiṁ||
[457] ummujjanto amusmiṁ eka-c-chiggaḷe yūge gīvaṁ paveseyyā" ti?|| ||

"Adhiccam idaṁ bhante,||
yaṁ so kāṇo kacchapo||
vassa-satassa vassa-satassa||
accayena sakiṁ sakiṁ||
ummujjanto amusmiṁ eka-c-chiggaḷe yuge gīvaṁ paveseyyā" ti.|| ||

4. Evaṁ adhiccam idaṁ bhikkhave,||
yaṁ manussattaṁ labhati.|| ||

Evaṁ adhiccam idaṁ bhikkhave,||
yaṁ Tathāgato loke uppajjati arahaṁ Sammā Sambuddho.|| ||

Evaṁ adhiccam idaṁ bhikkhave,||
yaṁ Tathāgata-p-pavedito Dhamma-Vinayo loke dippati.|| ||

5. Tass'idaṁ bhikkhave, manussattaṁ laddhaṁ.|| ||

Tathāgato ca loke uppanno arahaṁ Sammā Sambuddho.|| ||

Tathāgata-p-pavedito ca Dhamma-Vinayo loke dippati.|| ||

Tasmātiha bhikkhu,||
'idaṁ dukkhan' ti yogo karaṇīyo||
'ayaṁ dukkha-samudayo' ti yogo karaṇīyo||
'ayaṁ dukkha-nirodho' ti yogo karaṇīyo||
'ayaṁ dukkha-nirodha-gāminī paṭipadā' ti yogo karaṇīyo" ti.|| ||