Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
14. Rāja Vaggo

Sutta 135

Paṭhama Patthanā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Pañcahi bhikkhave aŋgehi samannāgato rañño khattiyassa muddhāvasittassa jeṭṭho putto rajjaɱ pattheti.|| ||

Katamehi pañcahi?|| ||

3. Idha, bhikkhave, rañño khattiyassa muddhāvasittassa jeṭṭho putto ubhato sujāto hoti mātito ca pitito ca, saɱsuddhagahaṇiko yāva sattamā pitāmahayugā,||
akkhitto anupakkuṭṭho jātivādena;|| ||

abhirūpo hoti dassanīyo pāsādiko,||
paramāya vaṇṇapokkharatāya samannāgato;|| ||

mātā-pitunnaɱ piyo hoti manāpo;|| ||

negamajānapadassa piyo hoti manāpo;|| ||

yāni tāni raññaɱ khattiyānaɱ muddhāvasittānaɱ sippaṭṭhānāni hatthismiɱ vā assasmiɱ vā rathasmiɱ vā dhanusmiɱ vā tharusmiɱ vā tattha sikkhito hoti anavayo.|| ||

[153] Tassa evaɱ hoti:|| ||

"Ahaɱ kho'mhi ubhato sujāto mātito ca pitito ca, saɱsuddhagahaṇiko, yāva sattamā pitāmahayugā, akkhitto anupakkuṭṭho jātivādena.|| ||

Kasmāhaɱ rajjaɱ na pattheyyaɱ?|| ||

Ahaɱ kho'mhi abhirūpo dassanīyo pāsādiko paramāya vaṇṇapokkharatāya samannāgato.|| ||

Kasmāhaɱ rajjaɱ na pattheyyaɱ?|| ||

Ahaɱ kho'mhi mātā-pitunnaɱ piyo manāpo.|| ||

Kasmāhaɱ rajjaɱ na pattheyyaɱ?|| ||

Ahaɱ kho'mhi negamajānapadassa piyo manāpo.|| ||

Kasmāhaɱ rajjaɱ na pattheyyaɱ?|| ||

Ahaɱ kho'mhi yāni tāni raññaɱ khattiyānaɱ muddhāvasittānaɱ sippaṭṭhānāni hatthismiɱ vā assasmiɱ vā rathasmiɱ vā dhanusmīɱ vā tharūsmiɱ vā,||
tattha sikkhito anavayo.|| ||

Kasmāhaɱ rajjaɱ na pattheyyan" ti?|| ||

Imehi kho bhikkhave pañcahi dhammehi aŋgehi samannāgato rañño khattiyassa muddhāvasittassa jeṭṭho putto rajjaɱ pattheti.|| ||

 


 

4. Evam eva kho bhikkhave pañcahi dhammehi samannāgato bhikkhu āsavānaɱ khayaɱ pattheti.|| ||

Kamehi pañcahi?|| ||

Idha, bhikkhave, bhikkhu saddho hoti saddahati Tathāgatassa bodhiɱ:|| ||

"Iti pi so Bhagavā arahaɱ sammāsambuddho vijjācaraṇasampanno sugato lokavidū anuttaro purisadammasārathi Satthā deva-manussānaɱ buddho Bhagavā" ti;|| ||

appābādho hoti appātaŋko,
samavepākiniyā gahaṇiyā samannāgato nātisitāya nāccuṇhāya majjhimāya padhānakkhamāya;|| ||

asaṭho hoti amāyāvī,
yathābhutaɱ attānaɱ āvīkattā Satthari vā viññūsu vā sabrahmcārisu;|| ||

āraddhaviriyo viharati akusalānaɱ dhammānaɱ pahānāya,
kusalānaɱ dhammānaɱ upasampadāya,
thāmavā daḷhaparakkamo anikkhittadhuro kusalesu dhammesu;|| ||

Paññavā hoti,
udayatthagāminiyā paññāya samannāgato ariyāya nibbedhikāya sammādukkhakkhayagāminiyā.|| ||

 

 

Tassa evaɱ hoti:|| ||

'Ahaɱ kho'mhi saddho,
saddahāmi Tathāgatassa bodhiɱ:
"Iti pi so Bhagavā arahaɱ sammāsambuddho vijjācaraṇa sampanṇo sugato lokavidū anuttaro purisadmmasārathi satthā deva-manussānaɱ buddho Bhagavā" ti.|| ||

Kasmāhaɱ [154] āsavānaɱ khayaɱ na pattheyyaɱ?|| ||

Ahaɱ kho'mhi appābādho appātaŋko samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya.|| ||

Kasmāhāɱ āsavānaɱ khayaɱ na pattheyyaɱ?|| ||

Ahaɱ kho'mhi asaṭho amāyāvī yathābhutaɱ attānaɱ āvīkattā3satthari vā viññūsu vā sabrahmacārisu.|| ||

Kasmāhaɱ āsavānaɱ khayaɱ na pattheyyaɱ?|| ||

Ahaɱ kho'mhi āraddhaviriyo viharāmi akusalānaɱ dhammānaɱ pahānāya kusalānaɱ dhammānaɱ upasampadāya, thāmavā daḷhaparakkamo anikkhittadhuro kusalesu dhammesu.|| ||

Kasmāhaɱ āsavānaɱ khayaɱ na pattheyyaɱ?|| ||

Ahaɱ kho'mhi paññavā udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.|| ||

Kasmāhaɱ asavānaɱ khayaɱ na pattheyyanti?'|| ||

Imehi kho bhikkhave pañcahi dhammehi samannāgato bhikkhu āsavānaɱ khayaɱ patthetī ti.|| ||


Contact:
E-mail
Copyright Statement   Webmaster's Page