Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 42

Pañcāla Suttaɱ aka Sambādha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][ati] Evaɱ me sutaɱ:|| ||

Ekaɱ samayaɱ āyasmā Ānando Kosambiyaɱ viharati Ghositārāme.|| ||

Atha kho āyasmā Udāyī yenāyasmā Ānando ten'upasaŋkami.|| ||

Upasaŋkamitvā āyasmatā Ānandena saddhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho āyasmā Udāyī āyasmantaɱ Ānandaɱ etad avoca:||
vuttamidaɱ āvuso, Pañcālacaṇḍena devaputtena:|| ||

 

Sambāde gataɱ okāsaɱ avidā bhūrimedhaso
yo jhānam abujjhi buddho paṭilīnanisabho munī ti.|| ||

 

Katamo nu kho āvuso sambodho katamo sambodhe okāsādhigamo vutto Bhagavatā ti:|| ||

Pañc'ime āvuso kāmaguṇā sambādho vutto Bhagavatā.|| ||

Katame pañca?|| ||

Cakkhuviññeyyā rūpā iṭṭhā kantā manāpā piyarūpā kāmūpasaɱhitā rajanīyā.|| ||

Sotaviññeyyā saddā iṭṭhā kantā manāpā piyarūpā kāmūsaɱhitā rajanīyā.|| ||

Ghānaviññeyyā gandhā iṭṭhā kantā manāpā piyarūpā kāmūpasaɱhitā rajanīyā.|| ||

Jivhāviññeyyā rasā iṭṭhā kantā manāpā piyarūpā kāmūpasaɱhitā rajanīyā.|| ||

Kāyaviññeyyā poṭṭhabbā iṭṭhā kantā manāpā piyarūpā kāmūpasaɱhitā rajanīyā.|| ||

Ime kho āvuso pañcakāmaguṇā sambādho vutto Bhagavatā.|| ||

Idh'āvuso bhikkhu vivicc'eva kāmehi||
vivicca akusalehi dhammehi||
savitakkaɱ savicāraɱ||
vivekajaɱ pīti-sukhaɱ||
paṭhamaɱ-jhānaɱ upasampajja viharati.|| ||

Ettāvatā pi kho āvuso sambādhe okāsādhigamo vutto Bhagavatā.|| ||

Pariyāyena tattha p'atthi sambādho,||
kiñ ca tattha sambādho?|| ||

Yad eva [450] tattha vitakkavicārā aniruddhā honti ayamettha sambādho.|| ||

Puna ca paraɱ āvuso bhikkhu||
vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ avicāraɱ||
samādhijaɱ pīti-sukhaɱ||
dutiyaɱ-jhānaɱ upasampajja viharati.|| ||

Ettāvatā pi kho āvuso sambādhe okāsādhigamo vutto Bhagavatā pariyāyena.|| ||

Tattha patthi sambādho.|| ||

Kiñ ca tattha sambādho?|| ||

Yad eva tattha:||
pīti aniruddhā hoti,||
ayamettha sambādho.|| ||

Puna ca paraɱ āvuso pītiyā ca virāgā upekkhako ca viharati||
sato ca sampajāno sukhañ ca kāyena paṭisaŋvedeti||
yan taɱ ariyā āvikkhanti:||
'upekkhako satimā sukhavihārī' ti taɱ||
tatiyaɱ-jhānaɱ upasampajja viharati.|| ||

Ettāvatā pi kho āvuso sambodhe okāsādhigamo vutto Bhagavatā pariyāyena.|| ||

Tattha p'atthi sambādho,||
kiñ ca tattha sambādho:||
yad eva tattha upekkhāsukhaɱ.|| ||

Aniruddhaɱ hoti,||
ayamettha sambādho.|| ||

Puna ca paraɱ āvuso bhikkhu||
sukhassa ca pahānā||
pubb'eva somanassa-domanassānaɱ atthaŋgamā||
adukkha-m-asukhaɱ upekkhā-sati-pārisuddhiɱ||
catutthaɱ-jhānaɱ upasampajja viharati.|| ||

Ettāvatā pi kho āvuso,||
sambādhe okāsādhigamo vutto Bhagavatā.|| ||

Tattha p'atthi sambādho.|| ||

Kiñ ca tattha sambādho?|| ||

Yad eva tattha rūpasaññā aniruddhā hoti,||
ayamettha sambādho.|| ||

Puna ca paraɱ āvuso bhikkhu sabbaso rūpa-saññānaɱ samatikkamā||
paṭigha-saññānaɱ atthaŋgamā||
nānattasaññānaɱ amanasi-kārā 'anatto ākāso' ti||
ākāsānañcāyatanaɱ upasampajja viharati.|| ||

Ettāvatā pi kho āvuso sambādhe okāsādhigamo vutto Bhagavatā pariyāyena,||
tattha p'atthi sambādho.|| ||

Kiñ ca tattha sambādho?|| ||

Yad eva tattha ākāsānañcāyatanasaññā aniruddhā hoti.|| ||

Ayamettha sambādho.|| ||

Puna ca paraɱ āvuso,||
bhikkhu sabbaso ākāsānañcāyatanaɱ samatikkamma||
'anantaɱ viññāṇan' ti||
viññāṇañcāyatanaɱ [451] upasampajja viharati.|| ||

Ettāvatā pi kho āvuso sambodhe okāsādhigamo vutto Bhagavatā pariyāyena tattha p'atthi sambādho.|| ||

Kiñ ca tattha sambādho?|| ||

Yad eva tattha viññāṇañcāyatanasaññā aniruddhā hoti.|| ||

Ayamettha sambādho.|| ||

Puna ca paraɱ āvuso bhikkhu sabbaso viññāṇañcāyatanaɱ samatikkamma||
'n'atthi kiñci' ti||
ākiñcaññāyatanaɱ upasampajja viharati.|| ||

Ettāvatā pi kho āvuso sambādhe okāsādigamo vutto Bhagavatā pariyāyena,||
tattha p'atthi sambādho.|| ||

Kiñ ca tattha sambādho?|| ||

Yad eva tattha ākiñcaññāyatanasaññā aniruddhā hoti,||
ayamettha sambādho.|| ||

Puna ca paraɱ āvuso bhikkhu sabbaso ākiñcaññāyatanaɱ samatikkamma||
n'eva-saññā-nāsaññāyatanaɱ upasampajja viharati.|| ||

Ettāvatā pi kho āvuso sambādhe okāsādhigamo vutto Bhagavatā pariyāyena,||
tatta patthi sambādho.|| ||

Kiñ ca tattha sambādho?|| ||

Yad eva tattha n'eva-saññā-nāsaññāyatanasaññā aniruddhā hoti,||
ayamettha sambādho.|| ||

Puna ca paraɱ āvuso bhikkhu sabbaso n'eva-saññā-nāsaññāyatanaɱ samatikkamma||
saññāvedayitanirodhaɱ upasampajja viharati.|| ||

Paññāya c'assa disvā āsavā parikkhīṇā honti.|| ||

Ettāvatā pi kho āvuso sambodhe okāsādhigamo vutto Bhagavatā nippariyāyenā ti.|| ||

 


Contact:
E-mail
Copyright Statement   Webmaster's Page