Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
III. Mahā Vagga

Sutta 30

Dutiya Kosala Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


[65]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayena rājā Pasenadī Kosalo uyyodhikāya nivatto hoti vijitasaŋgāmo laddhādhippāyo.|| ||

Atha kho rājā Pasenadi Kosalo yena ārāmo tena pāyāsi.|| ||

Yāvatikā yānassa bhūmi,||
yānena gantvā yānā paccārohitvā pattiko va ārāmaɱ pāvisi.|| ||

2. Tena kho pana samayena sambahulā bhikkhu abbhokāse caŋkamanti.|| ||

Atha kho rājā Pasenadī Kosalo yeta te bhikkhu ten'upasaɱkami.|| ||

Upasaɱkamitvā te bhikkhu etad avoca:|| ||

'Kahaɱ nu kho bhante Bhagavā etarahi viharati arahaɱ sammāsambuddho?|| ||

Dassanakāmā hi mayaɱ bhante taɱ Bhagavantaɱ arahantaɱ sammāsambuddhan' ti.|| ||

'Eso mahārāja vihāro saɱvutadvāro.|| ||

Tena appasaddo upasaŋkamitvā ataramāno ālindaɱ pavisitvā ukkāsitvā aggaḷaɱ ākoṭehi.|| ||

Vivarissati te Bhagavā dvāran' ti.|| ||

3. Atha kho rājā Pasenadī Kosalo yena so vihāro saɱvutadvāro,||
tena appasaddo upasakamitvā ataramāno ālindaɱ pavisitvā ukkāsitvā aggaḷaɱ ākoṭesi.|| ||

Vivari Bhagavā dvāraɱ.|| ||

Atha kho rājā Pasenadi Kosalo vihāraɱ pavisitvā Bhagavato pādesu sirasā nipatitvā Bhagavato pādāni mukhena ca paricumbati,||
pāṇīhi ca parisambhāhati,||
nāmañ ca sāveti:|| ||

'Rājāhaɱ bhante Pasenadī Kosalo,||
rājāhaɱ [66] bhante Pasenadī Kosalo' ti.|| ||

Kam pana tvaɱ mahārāja atthavasaɱ sampassamāno imasmiɱ sarīre evarūpaɱ paramanipaccākāraɱ karosi,||
mettupahāraɱ upadaɱsesī' ti?|| ||

4. Kataññutaɱ kho ahaɱ bhante kataveditaɱ sampassamāno Bhagavati evarūpaɱ paramanipaccākāraɱ karomi,||
mettupahārāɱ upadaɱsemi.|| ||

Bhagavā hi bhante bahujanahitāya paṭipanno bahujanasukhāya,||
bahuno janassa ariye ñāye patiṭṭhāpitā,||
yad idaɱ kalyāṇadhammatāya kusaladhammatāya.|| ||

Yam pi bhante Bhagavā bahujanahitāya paṭipanno bahujana sukhāya bahuno janassa ariye ñāye patiṭṭhāpitā,||
yad idaɱ kalyāṇadhammatāya kusaladhammatāya:|| ||

Idam pi kho ahaɱ bhante atthavasaɱ sampassamāno Bhagavatī evarūpaɱ paramanipaccākāraɱ karomi,||
mettupahāraɱ upadaɱsemi.|| ||

5. Puna ca paraɱ bhante Bhagavā sīlavā buddhasīlo ariyasīlo kusalasīlo kusalasīlena samannāgato.|| ||

Yam pi bhante Bhagavā sīlavā vuddhasīlo ariyasīlo kusalasīlo kusalasīlena samananāgato:|| ||

Imam pi kho ahaɱ bhante atthavasaɱ sampassamāno Bhagavati evarūpaɱ paramanipaccākāraɱ karomi,
mettupahāraɱ upadaɱsemi.|| ||

6. Puna ca paraɱ bhante Bhagavā dīgha-rattaɱ āraññako arañña ko araññvanapatthāni pantāni senāsanāni paṭisevati.|| ||

Yam pi bhante Bhagavā dīgha-rattaɱ arañña ko araññvanapatthāni pantāni senāsanāni paṭisevati:|| ||

Imam pi kho ahaɱ bhante atthavasaɱ sampassamāno Bhagavati evarūpaɱ paramanipaccākāraɱ karomi,||
mettupahāraɱ upadaɱsemi.|| ||

7. Puna ca paraɱ bhante Bhagavā santuṭṭho itarītara-cīvara-piṇḍapāta-sayanāsanagilāna-paccayaya-bhesajja-parikkhārena.|| ||

Yam pi bhante Bhagavā santuṭṭho itarītara-cīvara-piṇḍapāta-sayanāsanagilāna-paccayaya-bhesajja-parikkhārena:|| ||

Imam pi kho ahaɱ bhante atthavasaɱ sampassamāno Bhagavati evarūpaɱ paramanipaccākāraɱ karomi,||
mettupahāraɱ upadaɱsemi.|| ||

8. Puna ca paraɱ bhante Bhagavā āhuneyyo pāhuneyyo dakkhiṇeyyo añjalikaraṇiyo anuttaraɱ puññakkhettaɱ lokassa.|| ||

Yam pi bhante Bhagavā āhuneyyo pāhuneyyā dakkhiṇeyyā añjalikaraṇīyo anuttaraɱ puññakkhettaɱ lokassa:|| ||

Imam pi kho ahaɱ bhanto atthavasaɱ sampassamāno Bhagavati evarūpaɱ paramanipaccākāraɱ karomi,||
mettupahāraɱ upadaɱsemi.|| ||

9. Puna ca paraɱ bhante Bhagavā yāyaɱ kathā abhisallekhikā cetovivaraṇasappāyā,||
seyyath'idaɱ:|| ||

Appiccha-kathā,||
santuṭṭhi-kathā,||
paviveka-kathā,||
asaɱsagga-kathā,||
viriyārambha-kathā,||
sīla-kathā,||
samādhi-kathā,||
paññā-kathā,||
vimutti-kathā,||
vimutti-ṇadassana-kathā||
evarūpiyā kathāya nikāmalābhī akicchalābhī akasiralābhī.|| ||

Yam pi bhante Bhagavā yāyaɱ kathā abhisallekhikā ceto vivaraṇasappāyā||
seyyathīdaɱ:|| ||

Appiccha-kathā,||
santuṭṭhi-kathā,||
paviveka-kathā,||
asaɱsagga-kathā,||
viriyārambha-kathā,||
sīla-kathā,||
samādhi-kathā,||
paññā-kathā,||
vimutti-kathā,||
vimutti-ṇadassana-kathā||
evarūpiyā kathāya nikāmalābhī akicchalābhī akasiralābhī:|| ||

Imam pi kho ahaɱ bhante atthavasaɱ sampassamāno Bhagavatī evarūpaɱ parama nipaccākāraɱ karomi,||
mettupahāraɱ upadaɱsemi.|| ||

10. Puna ca paraɱ bhante Bhagavā catunnaɱ jhānānaɱ ābhicetasikānaɱ diṭṭha-dhamma-sukha-vihārānaɱ nikāma- [68] lābhī akicchalābhī akasiralābhī.|| ||

Yam pi bhante Bhagavā catunnaɱ jhānānaɱ ābhicetasikānaɱ diṭṭha-dhamma-sukha-vihārānaɱ nikāmalābhī akicchalābhī akasiralābhī:|| ||

Imam pi kho ahaɱ bhante atthavasaɱ sampassamāno Bhagavatī evarūpaɱ parama nipaccākāraɱ karomi,||
mettupahāraɱ upadaɱsemi.|| ||

11. Puna ca paraɱ bhante Bhagavā aneka-vihitaɱ pubbenivāsaɱ anussarati,||
seyyathīdaɱ:|| ||

Ekam pijātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo||
dasa pi jātiyo,||
visam pi jātiyo||
tiɱsam pi jātiyo||
cattārisam pi jātiyo||
paññāsam pi jātiyo||
jāti-satam pi,||
jāti-sahassam pi,||
jāti-sata-sahassam pi,||
aneke pi vivaṭṭakappe||
aneke pi saɱvaṭṭa-vivaṭṭakappe,||
amutrāsiɱ evaɱ-nāmo||
evaɱ gotto||
evaɱ-vaṇṇo||
evam-āhāro||
evaɱ sukhadukkhapaṭisaŋvedī||
evam-āyu-pariyanto.|| ||

So tato cuto idhūpapanno ti.|| ||

Iti sākāraɱ sa-uddesaɱ aneka-vihitaɱ pubbenivāsaɱ anussarati.|| ||

Yam pi bhante Bhagavā aneka-vihitaɱ pubbenivāsaɱ anussarati, seyyathīdaɱ:|| ||

Ekam pijātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo||
dasa pi jātiyo,||
visam pi jātiyo||
tiɱsam pi jātiyo||
cattārisam pi jātiyo||
paññāsam pi jātiyo||
jāti-satam pi,||
jāti-sahassam pi,||
jāti-sata-sahassam pi,||
aneke pi vivaṭṭakappe||
aneke pi saɱvaṭṭa-vivaṭṭakappe,||
amutrāsiɱ evaɱ-nāmo||
evaɱ gotto||
evaɱ-vaṇṇo||
evam-āhāro||
evaɱ sukhadukkhapaṭisaŋvedī||
evam-āyu-pariyanto.|| ||

So tato cuto idhūpapanno ti.|| ||

Iti sākāraɱ sa-uddesaɱ aneka-vihitaɱ pubbenivāsaɱ anussarati:|| ||

Imam pi kho ahaɱ bhante atthavasaɱ sampassamāno Bhagavati evarūpaɱ paramanipaccākāraɱ karomi,||
mettupahāraɱ upadaɱsemi.|| ||

12. Puna ca paraɱ bhante Bhagavā dibbena cakkhunā visuddhena atikkantamānusakena satte passati cavamāne uppajjamāne hīne paṇīte suvaṇṇe dubbaṇṇe sugate duggate yathā kammūpage satte pajānāti.|| ||

"Ime vata bhonto sattā kāyaduccaritena samannāgatā||
vacīduccaritena samannāgatā||
manoduccaritena samannāgatā ariyānaɱ upavādakā [69] micchādiṭṭhakā micchādiṭṭhakammasamādānā,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.|| ||

Ime vā pana bhonto sattā kāya sucaritena samannāgatā||
vacī sucaritena samannāgatā||
mano sucaritena samannāgatā||
ariyānaɱ anupavādakā sammādiṭṭhakā sammādiṭṭhakammasamādānā,||
te kāyassa bhedā param maraṇā sugatiɱ saggaɱ lokaɱ upapannā' ti.|| ||

Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti.|| ||

Yam pi bhante Bhagavā dibbena cakkhunā visuddhena atikkantamānusakena satte passati cavamāne uppajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti:|| ||

Imam pi kho ahaɱ bhante atthavasaɱ sampassamāno Bhagavati eva rūpaɱ paramanipaccākāraɱ karomi,||
mettupahāraɱ upadaɱsemi.|| ||

13. Puna ca paraɱ bhante Bhagavā āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe va dhamme sayaɱ abhiññā sacchikatvā upasampajja viharati.|| ||

Yam pi bhante Bhagavā āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe va dhamme sayaɱ abhiññā sacchikatvā upasampajja viharati:|| ||

Imam pi kho ahaɱ bhante atthavasaɱ sampassamāno Bhagavati evarūpaɱ paramanipaccākāraɱ karomi,||
mettupahāraɱ upadaɱsemi.|| ||

14. 'Handa dāni mayaɱ bhante gacchāma bahukiccā mayaɱ bahukaraṇīyā' ti.|| ||

'Yassa dāni tvavaɱ mahārāja kālaɱ maññasī' ti.|| ||

Atha kho rājā Pasenadi Kosalo uṭṭhāy āsanā Bhagavantaɱ abhivādetvā padakkhiṇaɱ katvā pakkāmī ti.|| ||

Mahāvaggo tatiyo.|| ||

 


Contact:
E-mail
Copyright Statement   Webmaster's Page