Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
VI. Sacitta Vagga

Sutta 60

Girimānanda Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


[108]

[1][pts][piya][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayena āyasmā Girimānando ābādhiko hoti dukkhito bāḷhagilāno.|| ||

Atha kho āyasmā Ānando yena Bhagavā ten'upasaɱkami,||
upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

Āyasmā bhante Girimānando ābādhiko hoti dukkhino bāḷhagilāno.|| ||

Sādhu bhante Bhagavā yenāyasmā Girimānando ten'upasaɱkamatu anukampaɱ upādāyāti.|| ||

Sace kho tvaɱ Ānanda Girimānandassa bhikkhuno upasaɱkamitvā dasasaññā bhāseyyāsi,||
ṭhānaɱ kho pan'etaɱ vijjati yaɱ Girimānandassa bhikkhuno dasasaññā sutvā so ābādho ṭhānaso paṭippassambheyya.|| ||

Katamā dasa?|| ||

[109] Anicca-saññā,||
anatta-saññā,||
asubha-saññā,||
ādīnava-saññā,||
pahāna-saññā,||
virāga-saññā,||
nirodha-saññā,||
sabbaloke anabhirata-saññā,||
sabbasankhāresu anicca-saññā,||
ānāpānasati.|| ||

1. Katamā c'Ānanda anicca-saññā?|| ||

Idh'Ānanda bhikkhu araññagato vā rukkhamūlagato vā suññāgāragato vā iti paṭisaɱcikkhati:|| ||

'Rūpaɱ aniccaɱ vedanā aniccā saññā aniccā sankhārā aniccā viññāṇaɱ aniccan' ti.|| ||

Iti imesu pañca supādānakkhandhesu aniccānupassī viharati.|| ||

Ayaɱ vuccat'Ānanda anicca-saññā.|| ||

2. Katamā c'Ānanda anatta-saññā?|| ||

Idhā nanda bhikkhu araññagato vā rukkhamūlagato vā suññāgāragato vā iti paṭisaɱcikkhati:||
'cakkhuɱ1 anattā,||
rūpā anattā sotaɱ anattā,||
saddā anattā,||
ghānāɱ anattā,||
gandhā anattā,||
jivhā anattā,||
rasā anattā,||
kāyo anattā,||
phoṭṭhabbā anattā,||
mano anattā,||
dhammā anattā'ti.|| ||

Iti imesu chasu ajjhattika bāhiresu āyatanesu anattānupassī viharati.|| ||

Ayaɱ vuccat'Ānanda anatta-saññā.|| ||

3. Katamā c'Ānanda asubha-saññā?|| ||

Idh'Ānanda bhikkhu imameva kāyaɱ uddhaɱ pādatalā adho kesamatthakā tacapariyan taɱ pūraɱ nānappakārassa asucino paccavekkhati:||
'atthi imasmiɱ kāye kesā lomā nakhā dantā taco maɱsaɱ nahāru aṭṭhi aṭṭhimiñjā vakkaɱ hadayaɱ yakanaɱ kilomakaɱ pihakaɱ papphāsaɱ antaɱ antaguṇaɱ udariyaɱ karīsaɱ pittaɱ semhaɱ pubbo lohitaɱ sedo medo assu vasā khelo siŋghānikā lasikā muttan' ti.|
iti imasmiɱ kāye asubhānupassī viharati.|| ||

Ayaɱ vuccat'Ānanda asubha-saññā.|| ||

2. Katamā c'Ānanda ādīnava-saññā?|| ||

Idh'Ānanda bhikkhu araññagato vā rukkhamūlagato vā suññāgāragato vā itipaṭisañcikkhati: 'bahu dukkho kho [110] ayaɱ kāyo bahu ādīnavo,||
iti imasmiɱ kāye vividhā ābādhā uppajjanti,||
seyyathīda:||
cakkhurogo sotarogo ghānarogo jivhārogo kāyarogo sīsarogo kaṇṇarogo mukharogo|| ||

Dantarogo kāso sāso pināso ḍaho jaro kucchirogo mucchā pakkhandikā sūlā visūcikā kuṭṭhaɱ gaṇḍo kilāso soso apamāro daddū kaṇḍu kacchu rakhasā vitacchikā lohitapittaɱ madhumeho aɱsā pi'akā bhagandalā pittasamuṭṭhānā ābādhā semhasamuṭṭhānā ābādhā,||
vātasamuṭṭhānā ābādhā sannipātikā ābādhā utupariṇāmajā ābādhā visamaparihārajā ābādhā opakkamikā ābādhā kammavipākajā ābādhā sītaɱ uṇhaɱ jighacchā pipāsā uccāro passāvo' ti.|| ||

Iti imasmiɱ kāye ādīnavānupassī viharati.|| ||

Ayaɱ vuccat'Ānanda ādīnava-saññā.|| ||

5. Katamā c'Ānanda pahāna-saññā?|| ||

Idh'Ānanda bhikkhu uppannaɱ kāma-vitakkaɱ nādhivāseti pajahati vinodeti byantīkaroti anabhāvaɱ gameti.|| ||

Uppannaɱ vyāpāda vitakkaɱ nādhivāseti pajahati vinodeti byantīkaroti anabhāvaɱ gameti.|| ||

Uppannaɱ vihiɱsā vitakkaɱ nādhivāseti pajahati vinodeti byantīkaroti anabhāvaɱ gameti.|| ||

Uppannūppanne pāpake akusale dhamme nādhivāseti pajahati vinodeti byantīkaroti anabhāvaɱ gameti.|| ||

Ayaɱ vuccat'Ānanda pahāna-saññā.|| ||

6. Katamā c'Ānanda virāga-saññā?|| ||

Idh'Ānanda bhikkhu araññagato vā rukkhamūlagato vā suññāgāragato vā iti paṭisañcikkhati: 'etaɱ santaɱ etaɱ paṇītaɱ yad idaɱ sabbasankhārasamatho sabbūpadhipaṭinissaggo,||
taṇhakkhayo virāgo nibbānanti.|| ||

Ayaɱ vuccat'Ānanda virāga-saññā.|| ||

7. Katamā c'Ānanda nirodha-saññā?|| ||

Idh'Ānanda bhikkhu araññagato vā rukkhamūlagato vā suññāgāragato vā iti paṭisañcikkhati: 'etaɱ santaɱ [111] etaɱ paṇītaɱ yad idaɱ sabbasankhārasamatho sabbūpadhipaṭinissaggo,||
taṇhakkhayo virāgo nirodho nibbānan' ti.|| ||

Ayaɱ vuccat'Ānanda nirodha-saññā.|| ||

8. Katamā c'Ānanda sabbaloke anabhirata-saññā?|| ||

Idh'Ānanda bhikkhu ye loke upāyūpādānā cetaso adhiṭṭhānābhinivesānusayā,||
te pajahanto viramati na upādiyanto.|| ||

Ayaɱ vuccat'Ānanda sabbaloke anabhirata-saññā.|| ||

9. Katamā c'Ānanda sabbasankhāresu anicca-saññā?|| ||

Idh'Ānanda bhikkhu sabbasankhārehi aṭṭīyati harāyati jigucchati.|| ||

Ayaɱ vuccat'Ānanda sabbasankhāresu anicca-saññā.|| ||

10. Katamā c'Ānanda ānāpānasati?|| ||

Idh'Ānanda bhikkhu araññagato vā rukkhamūlagato vā suññāgāragato vā nisīdati pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭhapetvā.|| ||

So sato va assasati,||
sato passasati.|| ||

Dīghaɱ vā assasanto dīghaɱ assasāmī ti pajānāti.|| ||

Dīghaɱ vā passasanto dīghaɱ passasāmī ti pajānāti.|| ||

Rassaɱ vā assasanto rassaɱ assasāmī ti pajānāti.|| ||

Rassaɱ vā passasanto rassaɱ passāmī ti pajānāti.|| ||

Sabbakāya paṭisaŋvedī assasissāmī ti sikkhati.|| ||

Sabbakāya paṭisaŋvedī passasissāmī ti sikkhati.|| ||

Passambhayaɱ kāyasankhāraɱ assasissāmī ti sikkhati.|| ||

Passambhayaɱ kāyasaŋkāraɱ passasissāmī ti sikkhati.|| ||

Pītipaṭisaŋvedī assasissāmī ti sikkhati.|| ||

Pītipaṭisaŋvedī passasissāmī ti sikkhati.|| ||

Sukhapaṭisaŋvedī assasissāmī ti sikkhati.|| ||

Sukhapaṭisaŋvedī passasissāmī ti sikkhati.|| ||

Cittasankhārapaṭisaŋvedī assasissāmī ti sikkhati.|| ||

Cittasankhārapaṭisaŋvedī passasissāmī ti sikkhati.|| ||

Passambhayaɱ cittasankhāraɱ assasissāmī ti sikkhati.|| ||

Passambhayaɱ cittasankhāraɱ passasissāmī ti sikkhati.|| ||

Cittapaṭisaŋvedī assasissāmī ti sikkhati.|| ||

Cittapaṭisaŋvedī passasissāmī ti [112] sikkhati.|| ||

Abhippamodayaɱ cittaɱ assasissāmī ti sikkhati.|| ||

Abhippamodayaɱ cittaɱ passasissāmī ti sikkhati.|| ||

Samādahaɱ cittaɱ assasissāmī ti sikkhati.|| ||

Samādahaɱ cittaɱ passasissāmī ti sikkhati.|| ||

Vimocayaɱ cittaɱ assasissāmī ti sikkhati.|| ||

Vimocayaɱ cittaɱ passasissāmī ti sikkhati.|| ||

Aniccānupassī assasissāmī ti sikkhati.|| ||

Aniccānupassī passasissāmī ti sikkhati.|| ||

Virāgānupassī assasissāmī ti sikkhati.|| ||

Virāgānupassī passasissāmī ti sikkhati.|| ||

Nirodhānupassī assasissāmī ti sikkhati.|| ||

Nirodhānupassī passasissāmī ti sikkhati.|| ||

Paṭinissaggānupassī assasissāmī ti sikkhati.|| ||

Paṭinissaggānupassī passasissāmī ti sikkhati.|| ||

Ayaɱ vuccat'Ānanda ānāpānāsati.|| ||

Sace kho tvaɱ Ānanda Girimānandassa bhikkhuno upasaɱkamitvā imā dasa saññā bhāseyyāsi,||
ṭhānaɱ kho pan'etaɱ vijjati yaɱ Girimānandassa bhikkhuno imā dasa saññā sutvā so ābādho ṭhānaso paṭippassambheyyāti.|| ||

Atha kho āyasmā Ānando Bhagavato santike imādasa saññā uggahetvā yenāyasmā Girimānando ten'upasaɱkami.|| ||

Upasaɱkamitvā āyasmato Girimānandassa imā dasa-saññā abhāsi.|| ||

Atha kho āyasmato Girimānandassa imā dasa saññā sutvā so ābādho ṭhānaso paṭippassambhī,||
vuṭṭhāhi cāyasmā Girimānando tamhā ābādhā tathā pahīno ca panāyasmato Girimānandassa so ābādho ahosī ti.|| ||

 


Contact:
E-mail
Copyright Statement   Webmaster's Page