Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
IX: Thera-Vagga

Sutta 87

U-N-A-B-R-I-D-G-E-D

Adhikaraṇika Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā Kālakaɱ bhikkhuɱ ārabbha bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhu Bhagavato paccassosuɱ.|| ||

Bhagavā etad avoca:|| ||

2. Idha, bhikkhave, bhikkhu adhikaraṇiko hoti,||
adhikaraṇasamathassa na vaṇṇavādī.|| ||

Yam pi bhikkhave bhikkhu adhikaraṇiko hoti,||
adhikaraṇasamathassa na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

[165] 3. Puna ca paraɱ bhikkhave bhikkhu na sikkhākāmo hoti,||
sikkhāsamādānassa na vaṇnavādī.|| ||

Yam pi bhikkhave bhikkhu na sikkhākāmo hoti,||
sikkhāsamādānassa na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

4. Puna ca paraɱ bhikkhave bhikkhu pāpiccho hoti,||
icchāvinayassa na vaṇṇavādī.|| ||

Yam pi bhikkhave bhikkhu pāpiccho hoti,||
icchāvinayassa na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

5. Puna ca paraɱ bhikkhave bhikkhu kodhano hoti,||
kodhavinayassa na vaṇṇavādī.|| ||

Yam pi bhikkhave bhikkhu kodhano hoti,||
kodhavinayassa na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

6. Puna ca paraɱ bhikkhave bhikkhu makkhī hoti,||
makkhavinayassa na vaṇṇavādī.|| ||

Yam pi bhikkhave bhikkhu makkhī hoti,||
makkhavinayassa na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

7. Puna ca paraɱ bhikkhave saṭho hoti,||
sāṭheyyavinayassa na vaṇṇavādī.|| ||

Yam pi bhikkhave bhikkhu saṭho hoti,||
sāṭheyyavinayassa na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

8. Puna ca paraɱ bhikkhave bhikkhu māyāvī hoti,||
māyāvinayassa na vaṇṇavādī.|| ||

Yam pi bhikkhave bhikkhu māyāvī hoti,||
māyāvinayassa na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

[166] 9. Puna ca paraɱ bhikkhave bhikkhu dhammānaɱ na nisāmakajātiyo hoti,||
dhamma nisantiyā na vaṇṇavādī.|| ||

Yam pi bhikkhave bhikkhu dhammānaɱ na nisāmakajātiyo hoti,||
dhamma nisantiyā na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

10. Puna ca paraɱ bhikkhave bhikkhu na paṭisallāno hoti,||
paṭisallānassa na vaṇṇavādī.|| ||

Yam pi bhikkhave bhikkhu na paṭisallāno hoti,||
paṭisallānassa na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

11. Puna ca paraɱ bhikkhave bhikkhu sabrahmacārīnaɱ na paṭisanthārako hoti,||
paṭisanthārakassa na vaṇṇavādī.|| ||

Yam pi bhikkhave bhikkhu sabrahmacārīnaɱ na paṭisanthārako hoti,||
paṭisanthārakassa na vaṇṇavādī,||
ayam pi dhammo na piyattāya||
na garuttāya||
na bhāvanāya||
na sāmaññāya||
na ekībhāvāya saɱvattati.|| ||

12. Evarūpassa bhikkhave bhikkhuno kiñcāpi evaɱ icchā uppajjeyya:|| ||

'Aho vata maɱ sabrahmacārī sakkareyyuɱ||
garukareyyuɱ||
māneyyuɱ||
pūjeyyun' ti.|| ||

Atha kho naɱ sabrahmacārī na c'eva sakkaronti,||
na garukaronti,||
na mānenti,||
na pūjenti.|| ||

Taɱ kissa hetu?|| ||

Tathā hi'ssa bhikkhave viññū sabrahmacārī te pāpake akusale dhamme appahīne samanupassanti.|| ||

13. Seyyathā pi, bhikkhave, assakhaluŋkassa kiñcāpi evaɱ icchā uppajjeyya:|| ||

'Aho vata maɱ manussā ājānīyaṭṭhāne ṭhapeyyuɱ,||
ājānīyahe janañca bhojeyyuɱ,||
ājānīyaparimajjanañca parimajjeyyun' ti.|| ||

Atha kho naɱ manussā na c'eva ājānīyaṭṭhāne ṭhapenti,||
na ca ājānīyabhojanaɱ bhojenti,||
na ca ājānīyaparimajjanaɱ parimajjanti.|| ||

[167] Taɱ kissa hetu?|| ||

Tathā hi'ssa bhikkhave viññū manussā tāni sāṭheyyāni,||
kūṭeyyāni jimbheyyāni vaŋkeyyāni appahīnāni samanupassanti.|| ||

Evam eva kho bhikkhave evarūpassa bhikkhuno kiñcāpi evaɱ iccā uppajjeyya:|| ||

'Aho vata maɱ sabrahmacārī sakkareyyuɱ||
garukareyyuɱ||
māneyyuɱ||
pūjeyyun' ti.|| ||

Atha kho naɱ sabrahmacārī na c'eva sakkaronti,||
na garukaronti,||
na mānenti,||
na pūjenti.|| ||

Taɱ kissa hetu?|| ||

Tathā hi'ssa bhikkhave viññū sabrahmacārī te pāpake akusale dhamme appahīne samanupassanti.|| ||

14. Idha pana bhikkhave bhikkhu na adhikaraṇiko hoti,||
adhikaraṇasamathassa vaṇṇavādī.|| ||

Yam pi bhikkhave bhikkhu na adhikaraṇiko hoti,||
adhikaraṇasamathassa vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

15. Puna ca paraɱ bhikkhave bhikkhu sikkhākāmo hoti,||
sikkhāsamādānassa vaṇṇavādī.|| ||

Yam pi bhikkhave bhikkhu sikkhākāmo hoti,||
sikkhāsamādānassa vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

16. Puna ca paraɱ bhikkhave bhikkhu appiccho hoti,||
icchāvinayassa vaṇṇavādī.|| ||

Yam pi bhikkhave bhikkhu appicchohoti hoti,||
icchāvinayassa vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

17. Puna ca paraɱ bhikkhave bhikkhu akkodhano hoti,||
kodhavinayassa vaṇṇavādī.|| ||

Yam pi bhikkhave bhikkhu akkodhano hoti,||
kodhavinayassa vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

18. Puna ca paraɱ bhikkhave bhikkhu amakkhī hoti,||
makkhavinayassa vaṇṇavādī.|| ||

Yam pi bhikkhave bhikkhu amakkhī hoti,||
makkhavinayassa vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

[168] 19. Puna ca paraɱ bhikkhave bhikkhu asaṭho hoti,||
sāṭheyya vinayassa vaṇṇavādī.|| ||

Yam pi bhikkhave bhikkhu asaṭho hoti,||
sāṭheyyavinayassa vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

20. Puna ca paraɱ bhikkhave bhikkhu amāyāvī hoti,||
māyāvinayassa vaṇṇavādī.|| ||

Yam pi bhikkhave amāyāvī hoti,||
māyāvinayassa vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

21. Puna ca paraɱ bhikkhave bhikkhu dhammānaɱ nisāmakajātiyo hoti,||
dhammanisantiyā vaṇṇavādī.|| ||

Yam pi bhikkhave bhikkhu dhammānaɱ nisāmakajātiyo hoti,||
dhammanisantiyā vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

22. Puna ca paraɱ bhikkhave bhikkhu paṭisallīno hoti,||
paṭisallānassa vaṇṇavādī.|| ||

Yam pi bhikkhave bhikkhu paṭisallīno hoti,||
paṭisallānassa vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

23. Puna ca paraɱ bhikkhave bhikkhu sabrahmacārīnaɱ paṭisanthārako hoti,||
paṭisanthārakassa vaṇṇavādī.|| ||

Yam pi bhikkhave bhikkhu paṭisanthārako hoti,||
paṭisanthārakassa vaṇṇavādī,||
ayam pi dhammo piyattāya||
garuttāya||
bhāvanāya||
sāmaññāya||
ekībhāvāya saɱvattati.|| ||

24. Evarūpassa bhikkhave bhikkhuno kiñcāpi na evaɱ icchā uppajjeyya,|| ||

"Aho vata maɱ sabrahmacārī sakkareyyuɱ garukareyyuɱ, māneyyuɱ pūjeyyun' ti.|| ||

Atha kho naɱ sabrahmacārī sakkaronti,||
garukaronti,||
mānenti,||
pūjenti.|| ||

Taɱ kissa hetu?|| ||

Tathā hi'ssa bhikkhave viññū sabrahmacārī te pāpake akusale dhamme pahīne samanupassanti.|| ||

25. Seyyathā pi, bhikkhave, bhaddassa assājānīyassa kiñcāpi na evaɱ icchā uppajjeyya:|| ||

"Aho vata maɱ manussā ājānīyaṭṭhāne ṭhapeyyuɱ ājānīyabhojananañ ca bhojeyyuɱ,||
ājānīyaparimajjanañ ca parimajjeyyun' ti.|| ||

Atha kho naɱ manussā ājānīyaṭṭhāne ṭhapenti,||
ājānīyabhojanañ ca [169] bhojentī,||
ājānīyaparimajjanañ ca parimajjanti.|| ||

Taɱ kissa hetu?|| ||

Tathā hi'ssa bhikkhave viññū manussā tāni sāṭheyyāni kūṭeyyāni jimheyyāni vaŋkeyyāni pahīnāni samanupassanti.|| ||

Evam eva kho bhikkhave evarūpassa bhikkhuno kiñcāpi na evaɱ icchā uppajjeyya:|| ||

"Aho vata maɱ sabrahmacārī sakkareyyuɱ, garukareyyuɱ, māneyyuɱ, pūjeyyun' ti.|| ||

Atha kho naɱ sabrahmacārī sakkaronti,||
garukaronti,||
mānenti,||
pūjenti.|| ||

Taɱ kissa hetu?|| ||

Tathā hi'ssa bhikkhave viññū sabrahmacārī te pāpake akusale dhamme pahīne samanupassantī ti.|| ||

 


Contact:
E-mail
Copyright Statement   Webmaster's Page