Digha Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Dīgha Nikāya

Sutta 20

Mahā Samaya Suttantaɱ

Adapted from the digital version of the Sri Lanka Buddha Jayanti Tripitaka Series

 


[253]

[1][pts][piya][than] EVAṂ ME SUTAṂ.|| ||

Ekaɱ samayaɱ Bhagavā Sakkesu viharati Kapivatthusmiɱ Mahāvane mahatā bhikkhu-saŋghena saddhiɱ pañca-mattehi bhikkhu-satehi sabbeh'eva arahantehi||
dasahi ca loka-dhātuhi devatā yebhuyyena sannipatitā honti Bhagavantaɱ dassanāya bhikkhu-saŋghañ ca.|| ||

2. Atha kho catunnaɱ Suddhavāsakāyikānaɱ devatānaɱ etad ahosi:|| ||

'Ayaɱ kho Bhagavā Sakkesu viharati Kapilavatthusmiɱ Mahāvane mahatā bhikkhu-saŋghena saddhiɱ pañca-mattehi bhikkhu-satehi sabbeh'eva arahantehi dasahi ca loka-dhātūhī devatā yebhuyyena sannipatitā honti Bhagavantaɱ dassanāya bhikkhu-saŋghañ ca.|| ||

Yan nūna mayam pi yena Bhagavā ten'upasaŋkameyyāma.||
Upasaŋkamitvā Bhagavato santike paccekaɱ gāthaɱ bhāseyyāmāti'.|| ||

3. Atha kho tā devatā seyyathā pi nāma balavā puriso samiñjitaɱ vā bāhaɱ pasāreyya,||
pasāritaɱ vā bāhaɱ [254] samiñjeyya,||
evam evaɱ Suddhāvāsesu devesu antarahitā Bhagavato purato pātur ahaɱsu.|| ||

Atha kho tā devatā Bhagavantaɱ abhivādetvā eka-m-antaɱ aṭṭhaɱsu,||
eka-m-antaɱ ṭhitā kho ekā devatā Bhagavato santike imaɱ gāthaɱ abhāsi:|| ||

'Mahā-samayo pavanasmiɱ deva-kāyā samāgatā,||
Āgat'amha imaɱ dhamma-samayaɱ dakkhitāye aparājita-saŋghan' ti.|| ||

Atha kho aparā devatā Bhagavato santike imaɱ gāthaɱ abhāsi:|| ||

'Tatra bhikkhavo samādahaɱsu cittam attano ujukam akaɱsuɱsu,||
Sārathī va nettāni gahetvā indriyāni rakkhanti paṇḍitā' ti.|| ||

Atha kho aparā devatā Bhagavato santike imaɱ gāthaɱ abhāsi:|| ||

Chetvā khīlaɱ chetvā palighaɱ inda-khīlaɱ ūhacca-m-anejā,||
Te caranti suddhā vimalā cakkhumatā sudantā susu-nāgā' ti.|| ||

[255] Atha kho aparā devatā Bhagavato santike imaɱ gāthaɱ abhāsi:|| ||

'Ye keci Buddhaɱ saraṇaɱ gatāse na te gamissanti apāyam,||
Pahāya mānusaɱ dehaɱ deva-kāyaɱ paripūressan' ti.|| ||

4. Atha kho Bhagavā bhikkhu āmantesi:||
'Yebhuyyena bhikkhave dasasu loka-dhātū devatā sannipatitā honti, Tathāgataɱ dassanāya bhikkhu-saŋghañ ca|| ||

Ye pi te bhikkhave ahesuɱ, atītam addhānaɱ arahanto Sammā-sambuddhā,||
tesam pi Bhagavantānaɱ eta-paramā yeva devatā sannipatitā ahesuɱ seyyathā pi mayhaɱ etarahi.|| ||

Ye pi te bhikkhave bhavissanti anāgatam addhānaɱ arahanto Sammā-sambuddhā,||
tesam pi Bhagavantānaɱ eta-paramā yeva devatā sannipattā bhavissanti, seyyathā pi mayhaɱ etarahi.|| ||

Ācikkhissāmi bhikkhave deva-kāyānaɱ nāmāni,||
kittayissāmi bhikkhave deva-kāyānaɱ nāmāni,||
desissāmi bhikkhave deva-kāyānaɱ nāmāni.|| ||

Taɱ suṇātha sādhukaɱ manasikarotha bhāsissāmi' ti.|| ||

'Evaɱ bhante' ti kho te bhikkhū Bhagavato paccassosuɱ.|| ||

Bhagavā etad avoca:|| ||

5. Silokam anukassāmi; yattha bhummā tad assitā,||
Ye sītā giri-gabbharaɱ pahitattā samāhitā||
Puthū sīhā va sallīnā lomahaɱsāhisambhuno||
Odāta-manasā suddhā vippasannā-m-anāvilā||
[256] Bhīyyo pañca-sate ñatvā vane Kāpilavatthave.||
Tato āmattayī Satthā sāvake sāsane rate:||
Deva-kāyā abhikkantā te vijānātha bhikkhavo.'||
Te ca ātappam akaruɱ sutvā Buddhassa sāsanaɱ.|| ||

6. Tesaɱ pātur ahu ñāṇaɱ amanussāna dassanaɱ||
App eke satam addakkhuɱ sahassaɱ atha sattatiɱ||
Sataɱ eke sahassānaɱ amanussānamaddasuɱ||
App eke'nantam addakkhuɱ, disā sabbā phuṭā ahu.||
Tañ ca sabbaɱ abhiññāya vavatthitvāna cakkhumā||
Tato āmantayī Satthā sāvake sāsane rate:||
'Deva-kāyā abhikkantā te vijānātha bhikkhavo,||
Ye vo'haɱ kittayissāmi girāhi anupubbaso.|| ||

7. Satta sahassā va yakkhā bhummā Kāpilavatthavā,||
Iddhimanto jutīmanto vaṇṇavanto yasassino||
Modamānā abhikkāmuɱ bhikkhūnaɱ samitiɱ vanaɱ.|| ||

Cha sahassā Hemavatā yakkhā nānatta-vaṇṇino.||
Iddhimanto jutīmanto vaṇṇavanto yasassino,||
Modamānā abhikkāmuɱ bhikkhūnaɱ samitiɱ vanaɱ.|| ||

Sātāgirā ti-sahassā yakkhā nānatta-vaṇṇino||
Iddhimanto jutīmanto vaṇṇavanto yasassino,||
Modamānā abhikkāmuɱ bhikkhūnaɱ samitiɱ vanaɱ.|| ||

Icc ete so'asa-sahassā yakkhā nānatta-vaṇṇino||
Iddhimanto jutīmanto vaṇṇavanto yasassino,||
Modamānā abhikkāmuɱ bhikkhūnaɱ samitiɱ vanaɱ.|| ||

[257] 8. Vessāmittā pañca-satā yakkhā nānatta-vaṇṇino||
Iddhimanto jutīmanto vaṇṇavanto yasassino,||
Modamānā abhikkāmuɱ bhikkhūnaɱ samitiɱ vanaɱ.|| ||

Kumbhīro Rājagahiko Vepullassa nivesanaɱ,||
Bhiyyo naɱ sata-sahassaɱ yakkhānaɱ payirupāsati,||
Kumbhīro Rājagahiko so p'āga samitiɱ vanaɱ.|| ||

9. Purimañ ca disaɱ rājā Dhataraṭṭho pasāsati,||
Gandhabbānaɱ ādhipati Mahārājā yasassi so.||
Kumbhīra yak?o Rājagahe vipule' samin nevāsika:||
Puttā pi tassa bahavo Inda-nāmā mahabbalā,||
Iddhimanto jutīmanto vaṇṇavanto yasassino,||
Modamānā abhikkāmuɱ bhikkhūnaɱ samitiɱ vanaɱ.|| ||

Dakkhiṇañ ca disaɱ rājā Virū'ho taɱ pasāsati||
Kumbhaṇḍānaɱ adhipati Mahārājā yasassi so.||
Puttā pi tassa bahavo Inda-nāmā mahabbalā,||
Iddhimanto jutīmanto vaṇṇavanto yasassino,||
Modamānā abhikkāmuɱ bhikkhūnaɱ samitiɱ vanaɱ.|| ||

Pacchimañ ca disaɱ rājā Virūpakkho pasāsati,||
Nāgāṇañ ca adhipati Mahārājā yasassi so.||
Puttā pi tassa bahavo Inda-nāmā mahabbalā,||
Iddhimanto jutīmanto vaṇṇavanto yasassino,||
Modamānā abhikkāmuɱ bhikkhūnaɱ samitiɱ vanaɱ.|| ||

Uttarañ ca disaɱ rājā Kuvero taɱ pasāsati||
Yakkhānañ va ādhipati Mahārājā yasassi so.||
[258] Puttā pi tassa bahavo Inda-nāmā mahabbalā,||
Iddhimanto jutīmanto vaṇṇavanto yasassino,||
Modamānā abhikkāmuɱ bhikkhūnaɱ samitiɱ vanaɱ.|| ||

Purimaɱ disaɱ Dhataraṭṭho dakkhiṇena Virū'hako||
Pacchimena Virūpakkho Kuvero uttaraɱ disaɱ.||
Cattāro te Mahārājā samantā caturo disā,||
Daddallamānā aṭṭhaɱsu vane Kāpilavatthave.|| ||

10. Tesaɱ māyāvino dāsā āgu vañcanikā saṭhā||
Māyā Kuṭeṇḍu Veṭeṇḍu Viṭuc ca Viṭucco saha||
Candano Kāmaseṭṭho ca Kin nughaṇḍu Nighaṇḍu ca||
Panādo Opamañño ca devasūto ca Mātalī.||
Cittaseno ca gandhabbo Na'o rājā Janesabho||
Āgu Pañcasikho c'eva Timbaru Suriyavaccasā.||
Ete c'aññe ca rājāno gandhabbā saha rājubhi||
Modamānā abhikkāmuɱ bhikkhūnaɱ samitiɱ vanaɱ.|| ||

11. Ath'āgu Nābhasā nāgā Vesālā saha Tacchakā,||
Kambalassatarā āgu Pāyāgā saha ñātibhi.||
Yāmunā Dhataraṭṭho ca āgu nāgā yasassino,||
Erāvaṇo mahā-nāgo so p'āga samitiɱ vanaɱ.|| ||

Ye nāga-rāje sahasā haranti||
Dibbā dijā pakkhi visuddha-cakkhu||
[259] Vehāsayā te vana-majjha-pattā||
Citrā Supaṇṇā iti tesaɱ nāmāɱ.||
Abhayaɱ tadā nāga rājānam āsi,||
Supaṇṇato khemam akāsi buddho,||
Saṇhāhi vācāhi upavhayantā|| ||

Nāgā Supaṇṇā saraṇam agaɱsu Buddhaɱ.|| ||

12. Jitā Vajira-hatthena samuddaɱ Asurā sitā||
Bhātaro Vāsavass'ete iddhimanto yasassino||
Kālakañjā mahābhiɱsā asurā Dānaveghasā||
Vepacitti Sucittī ca Pahārādo Namuci saha||
Satañ ca Bali-puttānaɱ sabbe Veroca-nāmakā||
Sannayahitvā baliɱ senaɱ Rāhubhaddam upāgamuɱ:||
'Samayo dāni bhaddan te bhikkhūnaɱ samitaɱ vanaɱ'.|| ||

13. Āpo ca devā Paṭhavī ca Tejo Vāyo tad āgamuɱ,||
Varuṇā Vāruṇā devā Somo ca Yasasā saha,||
Mettā-karuṇā-kāyikā āgu devā yasassino.|| ||

Das'ete dasadhā kāyā sabbe nānatta-vaṇṇino||
Iddhimanto jutīmanto vaṇṇavanto yasassino||
Modamānā abhikkāmuɱ bhikkhūnaɱ samitiɱ vanaɱ.|| ||

14. Veṇhū ca devā Sahalī ca Asamā ca duve Yamā,||
Candassūpanisā devā Candam āgu purakkhatvā,||
Suriyassūpanisā devā Suriyam āgu purakkhatvā,||
Nakkhattāni purakkhatvā āgu Manda-valāhakā,||
[260] Vasūnaɱ Vāsavo seṭṭho Sakko p'āga purindado.|| ||

Das'ete dasadhā kāyā sabbe nānatta-vaṇṇino||
Iddhimanto jutīmanto vaṇṇavanto yasassino||
Modamānā abhikkāmuɱ bhikkhūnaɱ samitiɱ vanaɱ.|| ||

15. Ath'āgu Sahabhū devā jalam aggi-sikhā'r'iva,||
Ariṭṭhakā ca Rojo ca ummā-puppha-nibhāsino,||
Varuṇā Saha-dhammā ca Accutā ca Anejakā,||
Sūleyya-rucirā āgu, āgu Vāsavanesino.|| ||

Das'ete dasadhā kāyā sabbe nānatta-vaṇṇino||
Iddhimanto jutīmanto vaṇṇavanto yasassino||
Modamānā abhikkāmuɱ bhikkhūnaɱ samitiɱ vanaɱ.|| ||

16. Samānā Mahā-samānā Mānusā Mānusuttamā||
Khiḍḍā-padūsikā āgu, āgu Mano-padūsikā,||
Ath'āgu Harayo devā ye ca Lohita-vāsino||
Pāragā Mahā-pāragā āgu devā yasassino.|| ||

Das'ete dasadhā kāyā sabbe nānatta-vaṇṇino||
Iddhimanto jutīmanto vaṇṇavanto yasassino||
Modamānā abhikkāmuɱ bhikkhūnaɱ samitiɱ vanaɱ.|| ||

17. Sukkā Karamhā Aruṇā āgu Vekhanasā saha,||
Odāta-gayhā pāmokkhā āgu devā Vicakkhaṇā,||
Sadāmattā Hāragajā Missakā ca yasassino,||
Thanayaɱ āga Pajjanto yo disā abhivassati.|| ||

Das'ete dasadhā kāyā sabbe nānatta-vaṇṇino||
Iddhimanto jutīmanto vaṇṇavanto yasassino||
Modamānā abhikkāmuɱ bhikkhūnaɱ samitiɱ vanaɱ.|| ||

18. [261] Khemiyā Tusitā Yāmā Kaṭṭhakā ca yasassino,||
Lambitakā Lāma-seṭṭhā Joti-nāmā ca Āsavā,||
Nimmāṇa-ratino āgu, ath'āgu Paranimmitā.|| ||

Das'ete dasadhā kāyā sabbe nānatta-vaṇṇino||
Iddhimanto jutīmanto vaṇṇavanto yasassino||
Modamānā abhikkāmuɱ bhikkhūnaɱ samitiɱ vanaɱ.|| ||

19. Saṭṭh'ete deva-nikāyā sabbe nānatta-vaṇṇino,||
Nāmatvayena āgañchuɱ ye c'aññe sadisā saha.||
'Pavuttha-jātim akhīlaɱ ogha-tiṇṇaɱ anāsavaɱ||
Dakkhem'ogha-taraɱ nāgaɱ candaɱ va asitātigaɱ.'|| ||

20. Subrahmā Paramatto ca puttā iddhimato saha||
Sanaŋ-kumāro Tisso ca so p'āga samitiɱ vanaɱ.||
Sahassaɱ-Brahmalokānaɱ Mahā-Brahmā'bhitiṭṭhati,||
Upapanno jutīmanto bhismā-kāyo yasassi so.||
Das'ettha issarā āgu pacceka-vasavattino,||
Tesañ ca majjhato āga Hārito parivārito.|| ||

21. Te ca sabbe abhikkante sa-Inde-deve sa-Brahmake,||
Māra-senā abhikkāmi passa Kaṇhassa mandiyaɱ.||
[262] 'Etha gaṇhatha bandhatha rāgena bandham atthu ve||
Samantā parivāretha mā vo muñcittha koci naɱ'.||
Iti tattha Mahā-seno Kaṇha-senaɱ apesayi,||
Pāṇinā thālam āhacca saraɱ katvāna bheravaɱ.||
Yathā pāvussako megho thanayanto savijjuko,||
Tadā so pacucadāvatti saŋkuddho asayaɱvasī.|| ||

22. Tañ ca sabbaɱ abhiññāya vavatthitvāna cakkhumā||
Tato āmantayī Satthā sāvake sāsane rate:||
'Māra-senā abhikkantā, te vijānātha bhikkhavo.'||
Te ca ātappam akaruɱ sutvā Buddhassa sāsanaɱ.||
Vīta-rāgehi pakkāmuɱ na saɱ lomam pi iñjayuɱ.||
Sabbe vijita-saŋgāmā bhayātītā yasassino||
Modanti saha bhūtehi sāvakā te jane sutā ti.|| ||

Mahāsamayasuttaɱ samattaɱ


Contact:
E-mail
Copyright Statement   Webmaster's Page