Khuddaka Nikaya


[Home]  [Sutta Indexes]  [Glossology]  [Site Sub-Sections]


 

Dhamma-Pada Pāḷi

Namo tassa Bhagavato arahato sammā sambuddhassa.

Public Domain

Adapted from the 1995 edition of the digital version of the Sri Lanka Buddha Jayanti Tripitaka Series.|| ||

 


[1]

1. Yamaka Vagga

Index Than

 

1. Mano-pubbaŋgamā dhammā mano-seṭṭhā mano-mayā,||
Manasā ce paduṭṭhena bhāsati vā karoti vā||
Tato naɱ dukkham anveti cakkaɱ va vahato padaɱ.|| ||

2. Mano-pubbaŋgamā dhammā mano-seṭṭhā mano-mayā,||
Manasā ce pasannena bhāsati vā karoti vā||
Tato naɱ sukham anveti chāyā va anapāyinī.|| ||

3. "Akkocchi maɱ avadhi maɱ ajini maɱ ahāsi me"||
Ye taɱ upanayhanti veraɱ tesaɱ na sammati.|| ||

[2] 4. "Akkocchi maɱ avadhi maɱ ajini maɱ ahāsi me"||
Ye taɱ na upanayhanti veraɱ tes'ūpasammati.|| ||

5. Na hi verena verāni sammant'idha kudācana||
Averena ca sammanti, esa dhammo sanantano.|| ||

6. Pare ca na vijānanti: "mayam ettha yamāmase"||
Ye ca tattha vijānanti tato sammanti medhagā.|| ||

7. Subhānupassiɱ viharantaɱ indriyesu asaɱvutaɱ||
Bhojanamhi cāmattaññuɱ kusītaɱ hīna-vīriyaɱ||
Taɱ ve pasahati Māro vāto rukkhaɱ va dubbalaɱ.|| ||

[3] 8. Asubhānupassiɱ viharantaɱ indriyesu susaɱ-vutaɱ||
Bhojanamhi ca mattaññuɱ saddhaɱ āraddha-vīriyaɱ||
Taɱ ve na-ppasahatī Māro vāto selaɱ va pabbataɱ.|| ||

9. Anikkasāvo kāsāvaɱ yo vatthaɱ paridahessati||
Apeto damasaccena na so kāsāvam arahati.|| ||

10. Yo ca vantakasāv'assa sīlesu susamāhito||
Upeto damasaccena sa ve kāsāvam arahati.|| ||

11. Asāre sāramatino sāre cāsāradassino||
Te sāraɱ nādhi-gacchanti micchā-saɱkappa-gocarā.|| ||

12. Sārañ ca sārato ñatvā asārañ ca asārato||
Te sāraɱ adhigacchanti sammā-saɱkappa-gocarā.|| ||

[4] 13. Yathā agāraɱ ducchannaɱ vuṭṭhi samativijjhati||
Evaɱ abhāvitaɱ cittaɱ rāgo samativijjhati.|| ||

14. Yathā agāraɱ succhannaɱ vuṭṭhi na samativijjhati||
Evaɱ subhāvitaɱ cittaɱ rāgo na samativijjhati.|| ||

15. Idha socati pecca socati||
pāpakārī ubhayattha socati||
So socati so vihaññati||
disvā kamma kiliṭṭham attano.|| ||

16. Idha modati pecca modati||
katapuñño ubhayattha modati||
So modati so pamodati||
disvā kamma visuddhim attano.|| ||

[5] 17. Idha tappati pecca tappati||
pāpakārī ubhayattha tappati||
"Pāpaɱ me katan" ti tappati||
bhiyyo tappati duggatiɱ gato.|| ||

18. Idha nandati pecca nandati||
katapuñño ubhayattha nandati,||
"Puññ me katan" ti nandati.||
bhiyyo nandati suggatiɱ gato.|| ||

19. Bahum pi ce sahitaɱ bhāsa-māno||
Na takkaro hoti naro pamatto||
Gopo va gāvo gaṇayaɱ paresaɱ||
Na bhāgavā sāmaññassa hoti.|| ||

[6] 20. Appam pi ce sahitaɱ bhāsa-māno||
Dhammassa hoti anuDhamma-cārī||
Rāgañ ca dosañ ca pahāya mohaɱ||
Sammappajāno su-vimutta-citto||
Anupādiyāno idha vā huraɱ vā||
Sa bhāgavā sāmaññassa hoti.|| ||

Yamaka Vagga Paṭhamo

[7]

§

 

2. Appamāda Vagga

Index Than

 

21. Appamādo amatapadaɱ pamādo maccuno padaɱ,||
Appamattā na mīyanti ye pamattā yathā matā.|| ||

22. Etaɱ visesato ñatvā appamādamhi paṇḍitā||
Appamāde pamodanti ariyānaɱ gocare ratā.|| ||

23. Te jhāyino sātatikā niccaɱ daḷha-parakkamā||
Phusanti dhīrā Nibbānaɱ yoga-k-khemaɱ anuttaraɱ.|| ||

24. Uṭṭhānavato satimato||
sucikammassa nisammakārino||
Saññatassa ca dhammajīvino||
appamattassa yaso'bhivaḍḍhati.|| ||

[8] 25. Uṭṭhānen'appamādena saññamena damena ca||
Dīpaɱ kayirātha medhāvī yaɱ ogho nābhikīrati.|| ||

26. Pamādam anuyuñjanti||
bālā dummedhino janā||
Appamādañ ca medhāvi||
dhanaɱ seṭṭhaɱ va rakkhati.|| ||

27. Mā pamādam anuyuñjetha mā kāmarati-santhavaɱ||
Appamatto hi jhāyanto pappoti vipulaɱ sukhaɱ.|| ||

28. Pamādaɱ appamādena yadā nudati paṇḍito||
Paññāpāsādam āruyha asoko sokiniɱ pajaɱ||
Pabbataṭṭho va bhummaṭṭhe dhīro bāle avekkhati.|| ||

[9] 29. Appamatto pamattesu suttesu bahujāgaro||
Abalassaɱ va sīghasso hitvā yāti sumedhaso.|| ||

30. Appamādena Maghavā devānaɱ seṭṭhataɱ gato,||
Appamādaɱ pasaɱ-santi pamādo garahito sadā.|| ||

31. Appamādarato bhikkhu pamāde bhaya-dassivā||
Saŋyojanaɱ aṇuɱ thūlaɱ ḍahaɱ aggī va gacchati.|| ||

32. Appamādarato bhikkhu pamāde bhaya-dassivā||
Abhabbo parihāṇāya nibbāṇass'eva santike.|| ||

Appamāda Vagga Dutiyo

 

§

[10]

3. Citta Vagga

Index Than

 

33. Phandanaɱ capalaɱ cittaɱ durakkhaɱ dunnivārayaɱ||
Ujuɱ karoti medhāvī usukāro va tejanaɱ.|| ||

34. Vārijo va thale khitto okamokata ubbhato||
Pariphandat'idaɱ cittaɱ Māra-dheyyaɱ pahātave.|| ||

35. Dunniggahassa lahuno yattha-kāmanipātino||
Cittassa damatho sādhu, cittaɱ dantaɱ sukhāvahaɱ.|| ||

36. Sududdasaɱ sunipunaɱ||
yattha-kāmanipātinaɱ||
Cittaɱ rakkhetha medhāvī,||
cittaɱ guttaɱ sukhāvahaɱ.|| ||

[11] 37. Dūraŋgamaɱ ekacaraɱ asarīraɱ guhāsayaɱ||
Ye cittaɱ saññamessanti mokkhanti Māra-bandhanā.|| ||

38. Anavaṭṭhita-cittassa Sad'Dhammaɱ avijānato||
Paripalava-pasādassa paññā na paripūrati.|| ||

39. Anava-s-suta-cittassa ananavāhata-cetaso||
Puñña-pāpapahīṇassa n'atthi jāgarato bhayaɱ.|| ||

40. Kumbhūpamaɱ kāyam imaɱ viditvā||
naga-rūpamaɱ cittam idaɱ ṭhapetvā||
Yodhetha Māraɱ paññā-vudhena||
jitañ ca rakkhe anivesano siyā.|| ||

[12] 41. Aciraɱ vat'ayaɱ kāyo paṭhaviɱ adhisessati||
Chuddho apeta-viññāṇo niratthaɱ va kaliŋgaraɱ.|| ||

42. Diso disaɱ yan taɱ kayirā verī vā pana verinaɱ||
Micchā-paṇihitaɱ cittaɱ pāpiyo naɱ tato kare.|| ||

43. Na taɱ mātā pitā kayirā aññe vā pi ca ñātakā||
Sammā-paṇihitaɱ cittaɱ seyyaso naɱ tato kare.|| ||

Citta Vagga Tatiyo

 

§

[13]

4. Puppha Vagga

Index Than

 

44. Ko imaɱ paṭhaviɱ vijessati||
Yamalokañ ca imaɱ sa-devakaɱ?||
Ko dhammapadaɱ sudesitaɱ||
Kusalo puppham iva-pacessati?|| ||

45. Sekho paṭhaviɱ vicessati||
Yamalokañ ca imaɱ sa-devakaɱ||
Sekho dhammapadaɱ sudesitaɱ||
Kusalo puppham iva-pacessati.|| ||

46. Pheṇūpamaɱ kāyam imaɱ viditvā||
Marīci-dhammaɱ abhisambudhāno||
Chetvāna Mārassa papupphakāni||
Adassanaɱ maccurājassa gacche.|| ||

[14] 47. Pupphāni h'eva pacinantaɱ||
vyāsattamanasaɱ naraɱ||
Suttaɱ gāmaɱ mahogho va||
maccu ādāya gacchati.|| ||

48. Pupphāni h'eva pacinantaɱ vyāsattamanasaɱ naraɱ||
Atittaɱ yeva kāmesu antako kurute vasaɱ.|| ||

49. Yathā pi bhamaro pupphaɱ||
vaṇṇagandhaɱ aheṭhayaɱ||
Paḷeti rasam ādāya||
evaɱ gāme munī care.|| ||

50. Na paresaɱ vilo-māni, na paresaɱ katākataɱ||
Attano va avekkheyya katāni akatāni ca.|| ||

[15] 51. Yathā pi ruciraɱ pupphaɱ vaṇṇa-vantaɱ agandhakaɱ||
Evaɱ subhā-sitā vācā aphalā hoti akubbato.|| ||

52. Yathā pi ruciraɱ pupphaɱ||
vaṇṇa-vantaɱ sagandhakaɱ||
Evaɱ subhā-sitā vācā||
saphalā hoti pakubbato.|| ||

53. Yathā pi puppharāsimhā kayirā mālāguṇe bahū||
Evaɱ jātena maccena kattabbaɱ kusalaɱ bahuɱ.|| ||

54. Na puppha-gandho paṭivātam eti||
na candanaɱ tagaraMallikā vā||
Satañ ca gandho paṭivātam eti||
sabbā disā sappuriso pavāti.|| ||

[16] 55. Candanaɱ tagaraɱ vā pi uppalaɱ atha vassikī||
Etesaɱ gandha-jātānaɱ sīlagandho anuttaro.|| ||

56. Appamatto ayaɱ gandho yā'yaɱ tagaracandanī||
Yo ca sīla-vataɱ gandho vāti devesu uttamo.|| ||

57. Tesaɱ sampanna-sīlānaɱ appamāda-vihārinaɱ||
Sammadaññā-vimuttānaɱ Māro Maggaɱ na vindati.|| ||

58. Yathā saŋkāra-dhānasmiɱ ujjhitasmiɱ mahā-pathe padumaɱ tattha jāyetha sucigandhaɱ manoramaɱ.|| ||

59. Evaɱ saŋkāra-bhūtesu andhabhūte puthujjane||
Atirocati paññāya Sammā-Sambuddha-sāvako.|| ||

Puppha Vagga Catuttho

 

§

[17]

5. Bāla Vagga

Index Than

 

60. Dīghā jāgarato ratti dīghaɱ santassa yojanaɱ||
Dīgho bālānaɱ saɱsāro Sad'Dhamma avijānataɱ.|| ||

61. Carañ ce nādhigaccheyya seyyaɱ sadisam attano||
Ekacariyaɱ daḷhaɱ kayirā n'atthi bāle sahāyatā.|| ||

62. Puttā m'atthi dhanaɱ m'atthi iti bālo vihaññati||
Attā hi attano n'atthi kuto puttā kuto dhanaɱ.|| ||

63. Yo bālo maññati bālyaɱ paṇaḍito vā pi tena so,||
Bālo ca paṇḍitamānī sa ve bālo ti vuccati.|| ||

[18] 64. Yāva-jīvam pi ce bālo paṇḍitaɱ payirupāsati||
Na so dhammaɱ vijānāti dabbī sūparasaɱ yathā.|| ||

65. Muhuttam api ce viññū paṇḍitaɱ payirupāsati||
Khippaɱ dhammaɱ vijānāti jivhā sūparasaɱ yathā.|| ||

66. Caranti bālā dummedhā amitten'eva attanā||
Karontā pāpakaɱ kammaɱ yaɱ hoti kaṭukapphalaɱ.|| ||

67. Na taɱ kammaɱ kataɱ sādhu yaɱ katvā anutappati||
Yassa assumukho rodaɱ vipākaɱ paṭisevati.|| ||

68. Tañ ca kammaɱ kataɱ sādhu yaɱ katvā nānutappati||
Yassa patīto sumano vipākaɱ paṭisevati.|| ||

[19] 69. Madhuvā maññati bālo||
yāva pāpaɱ na paccati||
Yadā ca paccati pāpaɱ||
atha bālo dukkhaɱ nigacchati.|| ||

70. Māse māse kusaggena bālo bhuñjetha bhojanaɱ||
Na so sankhata-dhammānaɱ kalaɱ nāgghati soḷasiɱ.|| ||

71. Na hi pāpaɱ kataɱ kammaɱ||
sajju khīraɱ va muccati||
ḍahantaɱ bālam anveti||
bhasmācchanno va pāvako.|| ||

72. Yāvad eva anatthāya ñattaɱ bālassa jāyati||
Hanti bālassa sukkaɱsaɱ muddham assa vipātayaɱ.|| ||

73. Asataɱ bhāvanam iccheyya||
purekkhārañ ca bhikkhusu||
Āvāsesu ca issariyaɱ||
pūjā parakulesu ca.|| ||

74. "Mam'eva kata maññantū gihī pabba-jitā ubho,||
Mam'eva ativasā assu kiccākiccesu kismici",||
Iti bālassa saɱkappo, icchā māno ca vaḍḍhati.|| ||

75. Aññā hi lābhūpanisā aññā Nibbāna-gāminī,||
Evam etaɱ abhiññāya bhikkhu Buddhassa sāvako||
Sakkāraɱ nābhinandeyya vivekam anubrūhaye.|| ||

Bāla vagga Pañcamo

 

§

[22]

6. Paṇḍita Vagga

Index Than

 

76. Nidhinaɱ va pavattāraɱ yaɱ passe vajjadassinaɱ||
Niggayhavādiɱ medhāviɱ tādisaɱ paṇḍitaɱ bhaje||
Tādisaɱ bhajamānassa seyyo hoti na pāpiyo.|| ||

77. Ovadeyyanusāseyya asabbhā ca nivāraye,||
Sataɱ hi so piyo hoti asataɱ hoti appiyo.|| ||

78. Na bhaje pāpake mitte na bhaje purisādhame,||
Bhajetha mitte kalyāṇe bhajetha purisuttame.|| ||

79. Dhamma-pīti sukhaɱ seti vi-p-pasannena cetasā,||
Ariyappavedite dhamme sadā ramati paṇḍito.|| ||

80. Udakaɱ hi nayanti nettikā||
usukārā namayanti tejanaɱ||
[23] Dāruɱ namayanti tacchakā||
attānaɱ damayanti paṇḍitā.|| ||

81. Selo yathā ekaghano vātena na samīrati||
Evaɱ nindāpasaɱsāsu na samiñjanti paṇḍitā.|| ||

82. Yathā pi rahado gambhīro vi-p-pasanno anāvilo||
Evaɱ dhammāni sutvāna vip-pasīdanti paṇḍitā.|| ||

83. Sabbattha ve sappurisā vajanti||
na kāmakāmā lapayanti santo||
Sukhena phuṭṭhā atha vā dukhena||
na uccāvacaɱ paṇḍitā dassayanti.|| ||

[24] 84. Na atta-hetu na parassa-hetu||
Na puttam-icche na dhanaɱ na raṭṭhaɱ||
Na iccheyya adhammena samiddhim attano||
Sa sīlavā paññavā dhammiko siyā.|| ||

85. Appakā te manussesu ye janā pāragāmino,||
Athāyaɱ itarā pajā tīram evānudhāvati.|| ||

86. Ye ca kho sammadakkhāte||
dhamme dhamm-ā-nuvattino||
Te janā pāram essanti||
maccudheyyaɱ suduttaraɱ.|| ||

87. Kaṇhaɱ dhammaɱ vippahāya||
sukkaɱ bhāvetha paṇḍito||
Okā anokaɱ āgamma||
viveke yattha dūramaɱ.|| ||

[25] 88. Tatr-ā-bhiratim iccheyya, hitvā kāme akiñ cano||
Pariyodapeyya attānaɱ citta-klesehi paṇḍito.|| ||

89. Yesaɱ sambodhi-aŋgesu sammā cittaɱ subhāvitaɱ||
Ādāna-paṭinissagge anupādāya ye ratā||
Khīṇ'āsavā jutimanto te loke parinibbutā.|| ||

Paṇḍita Vagga Chaṭṭho

 

§

[26]

7. Arahanta Vagga

Index Than

 

90. Gataddhino visokassa vippamuttassa sabbadhi||
Sabba-ganthappahīṇassa pariḷāho na vijjati.|| ||

91. Uyyuñjanti satimanto na nikete ramanti te||
Haɱsā va pallalaɱ hitvā okamoka jahanti te.|| ||

92. Yesaɱ sannicayo n'atthi ye pariññātabhojanā||
Suññato animitto ca vimokkho yesaɱ gocaro||
Ākāse va sakuntānaɱ gati tesaɱ durannayā|| ||

93. Yassāsavā parikkhīṇā āhāre ca anissito||
Suññato animitto ca vimokkho yassa gocaro||
Ākāse va sakuntānaɱ padaɱ tassa durannayaɱ.|| ||

[27] 94. Yass'indriyāni samathaɱ gatāni||
assā yathā sārathinā sudantā||
Pahīṇamānassa anāsavassa||
Devā pi tassa pihayanti tādino.|| ||

95. Paṭhavisamo no virujjhati||
indakhīlūpamo tādi subbato||
Rahado va apetakaddamo||
saɱsārā na bhavanti tādino.|| ||

96. Santaɱ tassa manaɱ hoti santā vācā ca kamma ca||
Sammadaññā vimuttassa upasantassa tādino.|| ||

97. Assaddho akataññū ca sandhicchedo ca yo naro||
Hatāvakāso vantāso sa ve uttamaporiso.|| ||

[28] 98. Gāme vā yadi vāraññe||
ninne vā yadi vā thale||
Yatth'arahanto viharanti||
taɱ bhūmiɱ rāmaṇeyyakaɱ.|| ||

99. Ramaṇīyāni araññāni, yattha na ramatī jano||
Vītarāgā ramissanti, na te kāmagavesino.|| ||

Arahanta Vagga Sattamo

 

§

[29]

8. Sahassa Vagga

Index Than

 

100. Sahassam api ce vācā anattha-padasaɱhitā||
Ekaɱ attha-padaɱ seyyo yaɱ sutvā upasammati.|| ||

101. Sahassam api ce gāthā antthapadasaɱhitā||
Ekaɱ gāthāpadaɱ seyyo yaɱ sutvā upasammati.|| ||

102. Yo ca gāthāsataɱ bhāse anattha-padasaɱhitaɱ||
Ekaɱ dhammapadaɱ seyyo yaɱ sutvā upasammati.|| ||

103. Yo sahassaɱ sahassena saŋgāme mānuse jine||
Ekañ ca jeyya-m-attānaɱ sa ve saŋgāmajuttamo.|| ||

[30] 104. Attā have jitaɱ seyyo yā cāyaɱ itarā pajā||
Attadantassa posassa niccaɱ saññatacārino.|| ||

105. N'eva devo na gandhabbo na Māro saha Brahmunā||
Jitaɱ apajitaɱ kayirā tathā-rūpassa jantuno.|| ||

106. Māse māse sahassena yo yajetha sataɱ samaɱ||
Ekañ ca bhāvit'attānaɱ muhuttam api pūjaye||
Sā yeva pūjanā seyyo yañ ce vassa-sataɱ hutaɱ.|| ||

107. Yo ca vassa-sataɱ jantu aggiɱ paricare vane||
Ekañ ca bhāvit'attānaɱ muhuttam api pūjaye||
Sā yeva pūjanā seyyo yañ ce vassa-sataɱ hutaɱ.|| ||

[31] 108. Yaɱ kiñci yiṭṭhañ ca hutaɱ ca loke||
Saɱvaccharaɱ yajetha puññapekkho||
Sabbam pi taɱ na catubhāgam eti||
Abhivādanā ujjugatesu seyyo.|| ||

109. Abhivādanasīlissa||
niccaɱ vaddhāpacāyino||
Cattāro dhammā vaḍḍhanti:||
āyu vaṇṇo sukhaɱ balaɱ.|| ||

110. Yo ca vassa-sataɱ jīve du-s-sīlo asamāhito||
Ekāhaɱ jīvitaɱ seyyo sīlavantassa jhāyino.|| ||

111. Yo ca vassa-sataɱ jīve duppañño asamāhito||
Ekāhaɱ jīvitaɱ seyyo paññavantassa jhāyino.|| ||

[32] 112. Yo ca vassa-sataɱ jīve kusīto hīnavīriyo||
Ekāhaɱ jīvitaɱ seyyo viriyam ārabhato daḷhaɱ.|| ||

113. Yo ca vassa-sataɱ jīve apassaɱ udayavyayaɱ||
Ekāhaɱ jīvitaɱ seyyo passato udayavyayaɱ.|| ||

114. Yo ca vassa-sataɱ jīve apassaɱ amataɱ padaɱ||
Ekāhaɱ jīvitaɱ seyyo passato amataɱ padaɱ.|| ||

115. Yo ca vassa-sataɱ jīve apassaɱ dhammam uttamaɱ||
Ekāhaɱ jīvitaɱ seyyo passato dhammam uttamaɱ.|| ||

Sahassa Vagga Aṭṭhamo

 

§

[33]

9. Pāpa Vagga

Index Than

 

116. Abhitvaretha kalyāṇe pāpā cittaɱ nivāraye,||
Dandhaɱ hi karoto puññaɱ pāpasmiɱ ramatī mano.|| ||

117. Pāpañ ce puriso kayirā||
na taɱ kayirā puna-p-punaɱ,||
Na tamhi chandaɱ kayirātha,||
dukkho pāpassa uccayo.|| ||

118. Puññañ ce puriso kayirā||
kayirāth'enaɱ puna-p-punaɱ,||
Tamhi chandaɱ kayirātha,||
sukho puññassa uccayo.|| ||

119. Pāpo pi passati bhadraɱ||
yāva pāpaɱ na paccati,||
Yadā ca paccati pāpaɱ||
atha pāpo pāpāni passati.|| ||

[34] 120. Bhadro pi passati pāpaɱ||
yāva bhadraɱ na paccati||
Yadā ca paccati bhadraɱ||
atha bhadro bhadrāni passati.|| ||

121. Māppamaññetha pāpassa "Na man taɱ āgamissati",||
Udabindunipātena udakumbho pi pūrati,||
Bālo pūrati pāpassa thokathokam pi ācinaɱ.|| ||

122. Māppamaññetha puññassa "Na maɱ taɱ āgamissati",||
Udabindunipātena udakumbho pi pūrati,||
Dhīro pūrati puññassa thokathokam pi ācinaɱ.|| ||

[35] 123. Vāṇijo va bhayaɱ Maggaɱ appasattho maha-d-dhano||
Visaɱ jīvitukāmo va pāpāni parivajjaye.|| ||

124. Pāṇimhi ce vaṇo nāssa hareyya pāṇinā visaɱ||
Nābbaṇaɱ visam anveti, n'atthi pāpaɱ akubbato.|| ||

125. Yo appaduṭṭhassa narassa dussati||
Suddhassa posassa anaŋgaṇassa||
Tam eva bālaɱ pacceti pāpaɱ||
Sukhumo rajo paṭivātaɱ va khitto.|| ||

126. Gabbham eke upapajjanti Nirayaɱ pāpa-kammino,||
Saggaɱ sugatino yanti parinibbanti anāsavā.|| ||

[36] 127. Na antalikkhe na samuddamajjhe||
Na pabbatānaɱ vivaraɱ pavissa||
Na vijjatī so jagatippadeso||
Yatthaṭthito muñceyya pāpa-kammā.|| ||

128. Na antalikkhe na samuddamajjhe||
Na pabbatānaɱ vivaraɱ pavissa||
Na vijjati so jagatippadeso||
Yatthaṭthitaɱ nappasahetha maccu.|| ||

Pāpa Vagga Navamo

 

§

[37]

10. Daṇaḍa Vagga

Index Than

 

129. Sabbe tasanti daṇaḍassa sabbe bhāyanti maccuno,||
Attānaɱ upamaɱ katvā na haneyya na ghātaye.|| ||

130. Sabbe tasanti daṇaḍassa sabbesaɱ jīvitaɱ piyaɱ,||
Attānaɱ upamaɱ katvā na haneyya na ghātaye.|| ||

131. Sukhakāmāni bhūtāni yodaṇḍena vihiɱsati||
Attano sukham esāno pecca so na labhate sukhaɱ.|| ||

132. Sukhakāmāni bhūtāni yodaṇḍena na hiɱsati||
Attano sukham esāno pecca so labhate sukhaɱ.|| ||

[38] 133. Mā voca pharusaɱ kañci vuttā paṭivadeyyu taɱ,||
Dukkhā hi sārambhakathā paṭidaṇḍā phuseyyu taɱ.|| ||

134. Sa ce neresi attānaɱ kaɱso upahato yathā||
Esa patto si nibbāṇaɱ sārambho te na vijjati.|| ||

135. Yathā daṇḍena gopālo gāvo pāceti gocaraɱ||
Evaɱ jarā ca maccu ca āyuɱ pācenti pāṇinaɱ.|| ||

136. Atha pāpāni kammāni karaɱ bālo na bujjhati,||
Sehi kammehi dummedho aggidaḍḍho va tappati.|| ||

137. Yo daṇḍena adaṇḍesu||
appaduṭṭhesu dussati||
Dasannam aññataraɱ ṭhānaɱ||
khippam eva nigacchati.|| ||

[39] 138. Vedanaɱ pharusaɱ jāniɱ sarīrassa ca bhedanaɱ||
Garukaɱ vā pi ābādhaɱ cittakkhepaɱ va pāpuṇe.|| ||

139. Rājato vā upassaggaɱ||
abbha-k-khānaɱ va dāruṇaɱ||
Parikkhayaɱ va ñātīnaɱ||
bhogānaɱ va pabhaŋguṇaɱ|| ||

140. Athav'āssa agārāni aggi ḍahati pāvako||
Kāyassa bhedā duppañño Nirayaɱ so uppajjati.|| ||

141. Na naggacariyā na jaṭā na paɱkā||
Nānāsakā thaṇḍilasāyikā vā||
Rājo va jallaɱ ukkuṭikappadhānaɱ||
Sodhenti maccaɱ avitiṇṇakaɱkhaɱ.|| ||

[40] 142. Alaɱkato ce pi samaɱ careyya||
Santo danto niyato brahma-cārī||
Sabbesu bhūtesu nidhāya daṇḍaɱ||
So brāhmaṇo so samaṇo sa bhikkhu.|| ||

143a. Hirīnisedho puriso koci lokasmiɱ vijjati||
Yo nindaɱ apabodhati asso bhadro kasām iva.|| ||

143b. Asso yathā bhadro kasāniviṭṭho||
Ātāpino saɱvegino bhavātha.|| ||

[41] 144. Saddhāya sīlena ca vīriyena ca||
Samādhinā dhamma-vinicchayena ca||
Sampanna-vijjā-caraṇā patissatā||
Pahassatha dukkham idaɱ anappakaɱ.|| ||

145. Udakaɱ hi nayanti nettikā||
usukārā namayanti tejanaɱ||
Dāruɱ namayanti tacchakā||
attānaɱ damayanti subbatā.|| ||

Daṇḍa Vagga Dasamo

 

§

[42]

11. Jarā Vagga

Index Than

 

146. Ko nu hāso kim ānando niccaɱ pajjalite sati,||
Andhakārena onaddhā padīpaɱ na gavessatha.|| ||

147. Passa citta-kataɱ bimbaɱ arukāyaɱ samussitaɱ||
Āturaɱ bahu-saŋkappaɱ yassa n'atthi dhuvaɱ ṭhiti.|| ||

148. Parijiṇṇam idaɱ rūpaɱ roganiḍḍhaɱ pabhaŋguraɱ||
Bhijjati pūtisandeho maraṇantaɱ hi jīvitaɱ.|| ||

149. Yān'imāni apatthāni alāpūn'eva sārade||
Kāpotakāni aṭṭhīni tāni disvāna kā rati.|| ||

[43] 150. Aṭṭhīnaɱ nagaraɱ kataɱ maɱsa-lohitalepanaɱ||
Yattha jarā ca maccu ca māno makkho ca ohito.|| ||

151. Jīranti ve rāja rathā sucittā||
Atho sarīram pi jaraɱ upeti||
Satañ ca dhammo na jaraɱ upeti||
Santo have sabbhi pavedayanti.|| ||

152. Appassutāyaɱ puriso balivaddo va jīrati,||
Maɱsāni tassa vaḍḍhanti paññā tassa na vaḍḍhati.|| ||

153. Aneka-jāti-saɱsāraɱ sandhāvissaɱ anibbisaɱ||
Gahakārakaɱ gavesanto, dukkhā jāti puna-p-punaɱ.|| ||

[44] 154. Gahakāraka diṭṭho si puna gehaɱ na kāhasi,||
Sabbā ete phāsukā bhaggā gahakaūṭaɱ visaɱkhitaɱ||
Visankhāragataɱ cittaɱ taṇhānaɱ khayam ajjhagā.|| ||

155. Acaritvā Brahma-cariyaɱ aladdhā yobbane dhanaɱ||
Jiṇṇakoñ cā va jhāyanti khīṇamacche va pallale.|| ||

156. Acaritvā Brahma-cariyaɱ aladdhā yobbane dhanaɱ||
Senti cāpātikhīṇā va purāṇāni anutthunaɱ.|| ||

Jarā Vagga Ekādasamo

 

§

[45]

12. Atta Vagga

Index Than

 

157. Attānañ ce piyaɱ jaññā rakkheyya naɱ surakkhitaɱ,||
Tiṇṇam aññataraɱ yāmaɱ paṭijaggeyya paṇḍito.|| ||

158. Attānam eva paṭhamaɱ patirūpe nivesaye,||
Ath'aññam anusāseyya, na kilisseyya paṇḍito.|| ||

159. Attānañ ce tathā kayirā yath'aññam anusāsati||
Sudanto vata dammetha, attā hi kira duddamo.|| ||

160. Attā hi attano nātho, ko hi nātho paro siyā;||
Attanā hi sudantena nāthaɱ labhati dullabhaɱ.|| ||

161. Attanā va kataɱ pāpaɱ||
attajaɱ attasambhavaɱ||
[46] Abhimatthati dummedhaɱ||
vajiraɱ v'amhamayaɱ maṇiɱ.|| ||

162. Yassa accanta-du-s-sīlyaɱ māluvā sālam iv'otataɱ||
Karoti so tath'attānaɱ yathā naɱ icchatī diso.|| ||

163. Sukarāni asādhūni attano ahitāni ca,||
Yaɱ ve hitañ ca sādhuñ ca taɱ ve parama-dukkaraɱ.|| ||

164. Yo sāsanaɱ arahataɱ ariyānaɱ dhamma-jīvinaɱ||
Paṭikkosati dummedho diṭṭhiɱ nissāya pāpikaɱ||
Phalāni kaṭṭhakasseva attaghaññāya phallati.|| ||

[47] 165. Attanā va kataɱ pāpaɱ attanā saɱkilissati,||
Attanā akataɱ pāpaɱ attanā va visujjhati,||
Suddhi asuddhi paccattaɱ nāñño aññaɱ visodhaye.|| ||

166. Attadatthaɱ paratthena bahunā pi na hāpaye,||
Attadattham abhiññāya sadatthapasuto siyā.|| ||

Atta Vagga Dvādasamo

 

§

[48]

13. Loka Vagga

Index Than

 

167. Hīnaɱ dhammaɱ na seveyya pamādena na saɱvase||
Micchā-diṭṭhiɱ na seveyya na siyā loka-vaḍḍhano.|| ||

168. Uttiṭṭhe na-ppamajjeyya dhammaɱ su-caritaɱ care,||
Dhammacārī sukhaɱ seti asmiɱ loke paramhi ca.|| ||

169. Dhammaɱ care su-caritaɱ na naɱ du-c-caritaɱ care,||
Dhammacārī sukhaɱ seti asmiɱ loke paramhi ca.|| ||

170. Yathā bubbulakaɱ passe yathā passe marīcikaɱ||
Evaɱ lokaɱ avekkhantaɱ maccurājā na passati.|| ||

[49] 171. Etha passath'imaɱ lokaɱ cittaɱ rāja-rathūpamaɱ||
Yattha bālā visīdanti, n'atthi saŋgo vijānataɱ.|| ||

172. Yo ca pubbe pamajjitvā pacchā so na-ppamajjati||
So imaɱ lokaɱ pabhāseti abbhā mutto va candimā.|| ||

173. Yassa pāsaɱ kataɱ kammaɱ kusalena pithīyati||
So imaɱ lokaɱ pabhāseti abbhā mutto va candimā.|| ||

174. Andhabhūto ayaɱ loko tanuk'ettha vipassati,||
Sakunto jālamutto va appo saggāya gacchati.|| ||

175. Haɱsādiccapathe yanti ākāse yanti iddhiyā||
Niyyanti dhīrā lokamhā jitvā Māraɱ savāhanaɱ.|| ||

[50] 176. Ekaɱ dhammaɱ atītassa musā-vādissa jantūno||
Vitiṇṇaparalokassa n'atthi pāpaɱ akāriyaɱ.|| ||

177. Na ve kadariyā deva-lokaɱ vajanti||
bālā have na-ppasaɱ-santi dānaɱ,||
Dhīro ca dānaɱ anumodamāno||
Ten'eva so hoti sūkhī parattha.|| ||

178. Paṭhavyā ekarajjena saggassa gamanena vā||
Sabba-lokādhipaccena sot'āpatti-phalaɱ varaɱ.|| ||

Loka Vagga Terasamo

 

§

[51]

14. Buddha Vagga

Index Than

 

179. Yassa jitaɱ nāvajīyati||
jitam assa no yāti koci loke,||
Tam buddham ananta-gocaraɱ||
apadaɱ kena padena nessatha.|| ||

180. Yassa jālinī visattikā||
taṇhā n'atthi kuhiñ ci netave||
Tam buddham ananta-gocaraɱ||
apadaɱ kena padena nessatha.|| ||

181. Ye jhānapasutā dhīrā nekkhammūpasame ratā||
Devā pi tesaɱ pihayanti sambuddhānaɱ satīmataɱ.|| ||

182. Kiccho manussapaṭi-lābho,||
kicchaɱ macchāna jīvitaɱ,||
Kicchaɱ Sad'Dhamma-savanaɱ,||
kiccho Buddhānaɱ uppādo.|| ||

[52] 183. Sabba-pāpassa akaraṇaɱ kusalassa upasampadā||
Sacitta-pariyoda-panaɱ etaɱ Buddhāna sāsanaɱ.|| ||

184. Khantī paramaɱ tapo titikkhā,||
Nibbāṇaɱ paramaɱ vadanti Buddhā||
Na hi pabba-jito parūpaghātī||
Samaṇo hoti paraɱ viheṭhayanto.|| ||

185. Anūpavādo anūpaghāto Pātimokkhe ca saɱvaro||
Mattaññutā ca bhattasmiɱ pantañ ca sayanāsanaɱ||
Adhicitte ca āyogo etaɱ Buddhāna sāsanaɱ.|| ||

[53] 186. Na kahāpaṇavassena titti kāmesu vijjati,||
"Appassādā dukhā kāmā" iti viññāya paṇḍito.|| ||

187. Api dibbesu kāmesu ratiɱ so nādhigacchati,||
Taṇha-k-khayarato hoti Sammā-Sambuddhasā-vako.|| ||

188. Bahuɱ ve saraṇaɱ yanti pabbatāni vanāni ca||
Ārāmarukkha-cetyāni manussā bhayatajjitā.|| ||

189. N'etaɱ kho saraṇaɱ khemaɱ,||
n'etaɱ saraṇam uttamaɱ,||
N'etaɱ saraṇam āgamma,||
sabba-dukkhā pamuccati.|| ||

[54] 190. Yo ca Buddhañ ca Dhammañ ca||
Sanghañ ca saraṇaɱ gato||
cattāri ariya-saccāni||
samma-p-paññāya passati.|| ||

191. Dukkhaɱ dukkha-samuppādaɱ||
dukkhassa ca ati-k-kamaɱ||
Ariyañ c'aṭṭhaŋgikaɱ Maggaɱ||
dukkh'ūpasama-gāminaɱ.|| ||

192. Etaɱ kho saraṇaɱ khemaɱ etaɱ saraṇam uttamaɱ||
Etaɱ saraṇam āgamma sabba-dukkhā pamuccati.|| ||

[55] 193. Dullabho purisājañño na so sabbattha jāyati,||
Yattha so jāyati dhīro taɱ kūlaɱ sukham edhati.|| ||

194. Sukho Buddhānaɱ uppādo sukhā sad'Dhamma-desanā||
Sukhā saɱghassa sāmaggī samaggānaɱ tapo sukho.|| ||

195. Pūjārahe pūjayato Buddhe yadi va sāvake||
Papañ ca samati-k-kante tiṇṇasoka-pariddave.|| ||

196. Te tādise pūjayato nibbute akutobhaye||
Na sakkā puññaɱ saɱkhātuɱ im'ettam api kenaci.|| ||

Buddha Vagga Cuddasamo

 

§

[56]

15. Sukha Vagga

Index Than

 

197. Susukhaɱ vata jīvāma verinesu averino||
Verinesu manussesu viharāma averino.|| ||

198. Susukhaɱ vata jīvāma āturesu anāturā,||
Āturesu manussesu viharāma anāturā.|| ||

199. Susukhaɱ vata jīvāma ussūkesu anussukā||
Ussukesu manussesu viharāma anussukā.|| ||

200. Susukhaɱ vata jīvāma yesaɱ no n'atthi kiñ canaɱ||
Pītibhakkhā bhavissāma devā Ābhassarā yathā.|| ||

[57] 201. Jayaɱ veraɱ pasavati dukkhaɱ seti parājito,||
Upasanto sukhaɱ seti hitvā jayaparājayaɱ.|| ||

202. N'atthi rāgasamo aggi,||
n'atthi dosasamo kali,||
n'atthi khandhādisā dukkhā,||
n'atthi santiparaɱ sukhaɱ.|| ||

203. Jighacchāparamā rogā,||
sankhāra paramā dukhā,||
Etaɱ ñatvā yathā-bhūtaɱ||
nibbāṇaɱ paramaɱ sukhaɱ.|| ||

204. Ārogya-paramā lābhā, santuṭṭhi-paramaɱ dhanaɱ||
Vissāsa-paramā ñātī, nibbāṇaɱ paramaɱ sukhaɱ.|| ||

[58] 205. Paviveka-rasaɱ pītvā rasaɱ upasamassa ca||
Niddaro hoti nippāpo dhamma-pītirasaɱ pivaɱ.|| ||

206. Sāhu dassanam ariyānaɱ sannivāso sadā sukho,||
Adassanena bālānaɱ niccam eva sukhī siyā.|| ||

207. Bāla-saŋgata-cārī hi dīgham addhāna socati,||
Dukkho bālehi saŋvāso amitteneva sabbadā,||
Dhīro ca sukha-saŋvāso ñātīnaɱ va samāgamo.|| ||

208. Dhīrañ ca paññañ ca bahu-s-sutañ ca||
Dhorayyasīlaɱ vatavantam āriyaɱ||
Taɱ tādisaɱ sappurisaɱ sumedhaɱ||
Bhajetha nakkhattapathaɱ va candimā.|| ||

Sukha Vagga Paṇṇarasamo

 

§

[60]

16. Piya Vagga

Index Than

 

209. Ayoge yuñjaɱ attānaɱ yogasmiñ ca ayojayaɱ||
Atthaɱ hitvā piyaggāhī pihet'attānuyoginaɱ.|| ||

210. Mā piyehi samāgañchī||
appiyehi kudācanaɱ,||
Piyānaɱ adassanaɱ dukkhaɱ||
appiyānañ ca dassanaɱ.|| ||

211. Tasmā piyaɱ na kayirātha piyāpāyo hi pāpako,||
Ganthā tesaɱ na vijjanti yesaɱ n'atthi piy-ā-p-piya-m.|| ||

212. Piyato jāyatī soko piyato jāyatī bhayaɱ,||
Piyato vippamuttassa n'atthi soko kuto bhayaɱ.|| ||

[61] 213. Pemato jāyatī soko pemato jāyatī bhayaɱ,||
Pemato vippamuttassa n'atthi soko kuto bhayaɱ.|| ||

214. Ratiyā jāyatī soko ratiyā jāyatī bhayaɱ||
Ratiyā vippamuttassa n'atthi soko kuto bhayaɱ.|| ||

215. Kāmato jāyatī soko kāmato jāyatī bhayaɱ,||
Kāmato vippamuttassa n'atthi soko kuto bhayaɱ.|| ||

216. Taṇhāya jāyatī soko taṇhāya jāyatī bhayaɱ,||
Taṇhāya vippamuttassa n'atthi soko kuto bhayaɱ.|| ||

[62] 217. Sīla-dassana-sampannaɱ dhamm'aṭṭhaɱ saccavedinaɱ||
Attano kamma kubbānaɱ taɱ jano kurute piyaɱ.|| ||

218. Chanda-jāto anakkhāte manasā ca phuṭo siyā||
Kāmesu ca appaṭibaddha-citto uddhaɱ soto ti vuccati.|| ||

219. Cirappavāsiɱ purisaɱ dūrato sotthim āgataɱ||
Ñātimittā suhajjā ca abhinandanti āgataɱ.|| ||

220. Tath'eva kata-puññam pi asmā lokā paraɱ gataɱ||
Puññāni patigaṇhanti piyaɱ ñātīva āgataɱ.|| ||

Piya Vagga Soḷasamo

 

§

[63]

17. Kodha Vagga

Index Than

 

221. Kodhaɱ jahe vippajaheyya mānaɱ||
saŋyojanaɱ sabbam ati-k-kameyya||
taɱ nāma-rūpasmim asajja-mānaɱ||
akiñ canaɱ nānupatanti dukkhā.|| ||

222. Yo ve uppatitaɱ ko'dhaɱ rathaɱ bhantaɱ va dhāraye||
Tam ahaɱ sārathiɱ brūmi, rasmggāho itaro jano.|| ||

223. Akkodhena jine ko'dhaɱ asādhuɱ sādhunā jine||
Jine kadariyaɱ dānena saccena alika-vādinaɱ.|| ||

224. Saccaɱ bhaṇe na kujjheyya dajjā appasmi yācito||
Etehi tīhi ṭhānehi gacche devāna santike.|| ||

[64] 225. Ahiɱsakā ye munayo niccaɱ kāyena saɱvutā||
Te yanti accutaɱ ṭhānaɱ yattha gantvā na socare.|| ||

226. Sadā jāgaramānānaɱ ahorattānusikkhinaɱ||
Nibbāṇaɱ adhimuttānaɱ atthaɱ gacchanti āsavā.|| ||

227. Porāṇam etaɱ Atula n'etaɱ ajjatanām iva:||
Nindanti tuṇhim āsīnaɱ nindanti bahubhāṇinaɱ||
Mitabhāṇim pi nindanti, n'atthi loke anindito.|| ||

[65] 228. Na cāhu na ca bhavissati na c'etarahi vijjati||
Ekantaɱ nindito poso ekantaɱ vā pasaɱsito.|| ||

229. Yañ ce viññū pasaɱ-santi anuvicca suve suve||
Acchidda-vuttiɱ medhāviɱ paññā-sīla-samāhitaɱ.|| ||

230. Nekkhaɱ jambonadasseva ko taɱ ninditum arahati,||
Devā pi naɱ pasaɱ-santi, Brahmunā pi pasaɱsito.|| ||

231. Kāyappakopaɱ rakkheyya kāyena saɱvuto siyā,||
Kāya-du-c-caritaɱ hitvā kāyena su-caritaɱ care.|| ||

232. Vacī-pakopaɱ rakkheyya vācāya saɱvuto siyā,||
Vacī-du-c-caritaɱ hitvā vācāya su-caritaɱ care.|| ||

[66] 233. Manopakopaɱ rakkheyya manasā saɱvuto siyā,||
Mano-du-c-caritaɱ hitvā manasā su-caritaɱ care.|| ||

234. Kāyena saɱvutā dhīrā atho vācāya saɱvutā||
Manasā saɱvutā dhīrā te ve suparisaɱvutā.|| ||

Kodha Vagga Sattarasamo

 

§

[67]

18. Mala Vagga

Index Than

 

235. Paṇḍupalāso va dāni si||
Yama-purisā pi ca taɱ upaṭṭhitā,||
Uyyogamukhe ca tiṭṭhasi||
patheyyam pi ca te na vijjati.|| ||

236. So karohi dīpam attano||
khippaɱ vāyama paṇḍito bhava||
Niddhantamalo anaŋgaṇo||
dibbaɱ ariyabhūmim ehisi.|| ||

237. Upanītavayo va dāni si||
sampayāto si Yamassa santike,||
Vāso pi ca te n'atthi antarā||
pātheyyam pi ca te na vijjati.|| ||

238. So karohi dīpam attano||
khippa vāyama paṇḍito bhava,||
Niddhantamalo anaŋgaṇo||
na punaɱ jātijaraɱ upehisi.|| ||

[68] 239. Anupubbena medhāvī thokathokaɱ khaṇe khaṇe||
Kammāro rajatass'eva niddhame malam attano.|| ||

240. Ayasā va malaɱ samuṭṭhitaɱ||
taduṭṭhāya tam eva khādati||
Evaɱ atidhonacārinaɱ||
sakakammāni nayanti duggatiɱ.|| ||

241. Asajjhāyamalā mantā, anuṭṭhāna-malā gharā,||
Malaɱ vaṇṇassa kosajjaɱ, pamādo rakkhato malaɱ.|| ||

[69] 242. Malitthiyā du-c-caritaɱ maccheraɱ dadato malaɱ||
Malā ve pāpakā dhammā asmiɱ loke paramhi ca.|| ||

243. Tato malā malataraɱ avijjā paramaɱ malaɱ,||
Etaɱ malaɱ pahatvāna nimmalā hotha bhikkhavo.|| ||

244. Sujīvaɱ ahirikena kākasūrena dhaɱsinā||
Pakkhandinā pagabbhena saɱkiliṭṭhena jīvitaɱ.|| ||

245. Hirimatā ca dujjīvaɱ niccaɱ sucigavesinā||
Alīnen'apagabbhena suddhājīvena passatā.|| ||

246. Yo pāṇam atimāpeti musā-vādañ ca bhāsati||
Loke adinnaɱ ādiyati paradāraɱ ca gacchati,|| ||

[70] 247. Surāmerayapānañ ca yo naro anuyuñjati||
Idh'eva-m-eso lokasmiɱ mūlaɱ khaṇati attano.|| ||

248. Evam bho purisa jānāhi:||
pāpa-dhammā asaññatā,||
Mā taɱ lobho adhammo ca||
ciraɱ dukkhāya randhayuɱ.|| ||

249. Dadanti ve yathā-saddhaɱ yathā-pasādanaɱ jano,||
Tattha yo maŋku bhavati paresaɱ pānabhojane||
Na so divā vā rattiɱ vā samādhiɱ adhigacchati.|| ||

250. Yassa c'etaɱ samucchannaɱ||
mūla-ghaccaɱ samūhataɱ||
Sa ve divā vā rattiɱ vā||
samādhiɱ adhigacchati.|| ||

[71] 251. N'atthi rāgasamo aggi n'atthi dosasamo gaho||
n'atthi mohasamaɱ jālaɱ n'atthi taṇhāsamā nadī.|| ||

252. Sudassaɱ vajjam aññesaɱ attano pana duddasaɱ,||
Paresaɱ hi so vajjāni opuṇāti yathā bhūsaɱ,||
Attano pana chādeti kaliɱ va kitavā saṭho.|| ||

253. Paravajjānupassissa niccaɱ ujjhānasaññino||
Āsavā tassa vaḍḍhanti ārā so āsavakkhayā.|| ||

254. Ākāse ca padaɱ n'atthi samaṇo n'atthi bāhiro,||
Papañ cā bhiratā pajā nippapañ cā Tathāgatā.|| ||

255. Ākāse padaɱ n'atthi||
samaṇo n'atthi bāhiro||
[72] Saŋkhārā sassatā n'atthi||
n'atthi Buddhānaɱ iñjitaɱ.|| ||

Mala Vagga Aṭṭhārasamo

 

§

[73]

19. Dhammaṭṭha Vagga

Index Than

 

256. Na tena hoti dhammaṭṭho yen'atthaɱ sahasā naye,||
Yo ca atthaɱ anatthañ ca ubho niccheyya paṇḍito.|| ||

257. Asāhasena dhammena samena nayatī pare||
Dhammassa gutto medhāvī dhammaṭṭho ti pavuccati.|| ||

258. Na tena paṇḍito hoti yāvatā bahu bhāsati,||
Khemī averī abhayo paṇḍito ti pavuccati.|| ||

259. Na tāvatā dhamma-dharo yāvatā bahu bhāsati,||
Yo ca appam pi sutvāna dhammaɱ kāyena passati||
Sa ve dhamma-dharo hoti yo dhammaɱ na-ppamajjati.|| ||

260. Na tena thero hoti yen'assa palitaɱ siro,||
Paripakko vayo tassa mogha-jiṇṇo ti vuccati.|| ||

261. Yamhi saccañ ca dhammo ca ahiɱsā saññamo damo||
Sa ve vantamalo dhīro thero ti pavuccati.|| ||

[74] 262. Na vākkaraṇa-mattena vaṇṇa-pokkha-ratāya vā||
Sādhurūpo naro hoti issukī maccharī saṭho.|| ||

263. Yassa ce taɱ samucchinnaɱ||
mūla-ghaccaɱ samūhataɱ||
Sa vanta-doso medhāvī||
sādhurūpo ti vuccati.|| ||

264. Na muṇḍakena samaṇo abbato alikaɱ bhaṇaɱ||
Icchālobha-samāpanno samaṇo kiɱ bhavissati.|| ||

265. Yo ca sameti pāpāni aṇuɱ thūlāni sabbaso||
Samitattā hi pāpānaɱ samaṇo ti pavuccati.|| ||

[75] 266. Na tena bhikkhū hoti yāvatā bhikkhate pare,||
Vissaɱ dhammaɱ samādāya bhikkhu hoti na tāvatā.|| ||

267. Yo'dha puññañ ca pāpañ ca bāhetvā Brahma-cariyavā||
Saŋkhāya loke carati sa ve bhikkhū ti vuccati.|| ||

268. Na monena muni hoti mūḷharūpo aviddasu,||
Yo ca tulaɱ va paggayha varam ādāya paṇḍito.|| ||

269. Pāpāni parivajjeti sa manī tena so muni,||
Yo munāti ubho loke muni tena pavuccati.|| ||

270. Na tena ariyo hoti yena pāṇāni hiɱsati||
Ahiɱsā sabba-pāṇānaɱ ariyo ti pavuccati.|| ||

[76] 271. Na sīla-b-batamattena bāhu-saccena vā puna||
Atha vā samādhi-lābhena vivicca-sayanena vā.|| ||

272. Phusāmi nekkhamma-sukhaɱ aputhu-j-janase-vitaɱ||
Bhikkhu vissāsa māpādi appatto āsavakkhayaɱ.|| ||

Dhammaṭṭha Vaggo Ekūnavīsatimo

 

§

[77]

20. Magga Vagga

Index Than

 

273. Maggān'aṭṭhaŋgiko seṭṭho saccānaɱ caturo padā,||
Virāgo seṭṭho dhammānaɱ divipadānañ ca cakkhumā.|| ||

274. Es'eva Maggo n'att'añño||
dassanassa visuddhiyā,||
Etaɱ hi tumhe paṭipajjatha||
Mārass'etaɱ pamohanaɱ.|| ||

275. Etaɱ hi tumhe paṭipannā||
dukkhass'antaɱ karissatha,||
Akkhāto ve mayā Maggo||
aññāya sallasatthanaɱ.|| ||

276. Tumhehi kiccaɱ ātappaɱ, akkhātāro Tathāgatā,||
Paṭipannā pamokkhanti jhāyino Māra-bandhanā.|| ||

[78] 277. "Sabbe saŋkhārā aniccā" ti yadā paññāya passati||
Atha nibbindati dukkhe, esa Maggo visuddhiyā.|| ||

278. "Sabbe saŋkhārā dukkhā" ti yadā paññāya passati||
Atha nibbindati dukkhe, esa Maggo visuddhiyā.|| ||

279. "Sabbe dhammā anattā" ti yadā paññāya passati||
Atha nibbindati dukkhe, esa Maggo visuddhiyā.|| ||

280. Uṭṭhāna-kālamhi anuṭṭhahāno||
Yuvā balī ālasiyaɱ upeto||
Saɱsanna-saŋkappamano kusīto||
Paññāya Maggaɱ alaso na vindati.|| ||

[79] 281. Vācānurakkhī manasā susaɱvuto||
Kāyena ca akusalaɱ na kayirā||
Ete tayo kammapathe visodhaye,||
Ārādhaye Maggaɱ isippaveditaɱ.|| ||

282. Yogā ve jāyati bhūri ayogā bhūri-saŋkhayo||
Etaɱ dvedhā-pathaɱ ñatvā bhavāya vibhavāya ca||
Tath'attānaɱ niveseyya yathā bhūri pavaḍḍhati.|| ||

283. Vanaɱ chindatha, mā rukkhaɱ,||
vanato jāyatī bhayaɱ,||
Chetvā vanaɱ vanathañ ca||
nibbanā hotha bhikkhavo.|| ||

[80] 284. Yāvaɱ vanatho na chijjati anumatto pi narassa nārisu||
Paṭibaddhamano va tāva so vaccho khīrapako va mātari.|| ||

285. Ucchinda sineham attano||
kumudaɱ sāradikaɱ va pāṇinā,||
SantiMaggam eva brūhaya||
nibbāṇaɱ sugatena desitaɱ.|| ||

286. Idha vassaɱ vasissāmi idha hemanta gimbhisu||
Iti bālo vicinteti antarāyaɱ na bujjhati.|| ||

[81] 287. Taɱ puttapasu-sammattaɱ vyāsattamanasaɱ naraɱ||
Suttaɱ gāmaɱ mahogho va maccu ādāya gacchati.|| ||

288. Na santi puttā tāṇāya na pitā na pi bandhavā||
Antakenādhi-pannassa n'atthi ñātisu tāṇatā.|| ||

289. Etam attha-vasaɱ ñatvā paṇḍito sīla-saɱvuto||
Nibbāṇa-gamanaɱ Maggaɱ khippam eva visodhaye.|| ||

Magga Vagga Vīsatimo.|| ||

 

§

[82]

21. Pakiṇṇaka Vagga

Index Than

 

290. Mattā-sukha-pariccāgā||
passe ce vipulaɱ sukhaɱ||
Caje mattā-sukhaɱ dhīro||
sampassaɱ vipulaɱ sukhaɱ.|| ||

291. Paradukkh'ūpadānena yo attano sukham icchati||
Verasaɱ-saggasaɱ-saṭṭho verā so na parimuccati.|| ||

292. Yaɱ hi kiccaɱ apaviddhaɱ akiccaɱ pana kayirati||
Unnaḷānaɱ pamattānaɱ tesaɱ vaḍḍhanti āsavā.|| ||

293. Yesañ ca susamāraddhā niccaɱ kāya-gatā sati||
Akiccaɱ te na sevanti kicce sātaccakārino||
Satānaɱ sampajānānaɱ atthaɱ gacchanti āsavā.|| ||

294. Mātaraɱ pitaraɱ hantvā rājāno dve ca khattiye||
Raṭṭhaɱ sānuvaraɱ hantvā anīgho yāti brāhmaṇo.|| ||

295. Mātaraɱ pitaraɱ hantvā rājāno dve ca sottiye||
Veyyaggha-pañcamaɱ hantvā anīgho yāti brāhmaṇo.|| ||

296. Suppa-buddaɱ pabujjhanti sadā Gotama-sāvakā||
Yesaɱ divā ca ratto ca niccaɱ Buddha-gatā sati.|| ||

297. Suppa-buddaɱ pabujjhanti sadā Gotama-sāvakā||
Yesaɱ divā ca ratto ca niccaɱ Dhamma-gatā sati.|| ||

298. Suppa-buddaɱ pabujjhanti sadā Gotama-sāvakā||
Yesaɱ divā ca ratto ca niccaɱ Sangha-gatā sati.|| ||

[84] 299. Suppa-buddaɱ pabujjhanti sadā Gotama-sāvakā||
Yesaɱ divā ca ratto ca niccaɱ kāya-gatā sati.|| ||

300. Suppa-buddaɱ pabujjhanti sadā Gotama-sāvakā||
Yesaɱ divā ca ratto ca ahiɱsāya rato mano.|| ||

301. Suppa-buddaɱ pabujjhanti sadā Gotama-sāvakā||
yesaɱ divā ca ratto ca bhāvanāya rato mano.|| ||

302. Duppabbajjaɱ durabhiramaɱ durāvāsā gharā dukhā||
Dukkho'samāna-saŋvāso, dukkh'ānupatit'addhagu||
Tasmā na c'addhagu siyā dukkh'ānupatito siyā.|| ||

303. Saddho sīlena sampanno yasobhoga-samappito||
Yaɱ yaɱ padesaɱ bhajati tattha tatth'eva pūjito.|| ||

[85] 304. Dūre santo pakāsanti himavanto va pabbato,||
Asant'ettha na dissanti ratti-khittā yathā sarā.|| ||

305. Ekāsanaɱ ekaseyyaɱ eko caram atandito||
Eko damayam attānaɱ vanante ramito siyā.|| ||

Pakiṇṇaka Vagga Ekavīsatimo.|| ||

 

§

[86]

22. Niraya Vagga

Index Than

 

306. Abhūta-vādī Nirayaɱ upeti||
yo vā pi katvā na karomi c'āha||
Ubho pi te pecca samā bhavanti||
nihīnakammā manujā parattha.|| ||

307. Kāsāvakaṇṭhā bahavo pāpa-dhammā asaññatā,||
Pāpā pāpehi kammehi Nirayaɱ te upapajjare.|| ||

308. Seyyo ayoguḷo bhutto tatto aggisikhūpamo||
yañ ce bhūñjeyya du-s-sīlo raṭṭhapiṇḍaɱ asaññato.|| ||

309. Cattāri ṭhānāni naro pamatto||
Āpajjati paradārūpasevī:||
Apuñña-lābhaɱ na nikāmaseyyaɱ||
Nindaɱ tatiyaɱ Nirayaɱ catutthaɱ.|| ||

[87] 310. Apuñña-lābho ca gatī ca pāpikā||
Bhītassa bhītāya ratī ca thokikā||
Rājā ca daṇḍaɱ garukaɱ paṇeti,||
Tasmā naro paradāraɱ na seve.|| ||

311. Kuso yathā duggahito hattham evānukantati||
Sāmaññaɱ dupparāmaṭṭhaɱ Nirayāy'upakaḍḍhati.|| ||

312. Yaɱ kiñci sithilaɱ kammaɱ||
saɱkiliṭṭhañ ca yaɱ vataɱ||
Saɱkassaraɱ Brahma-cariyaɱ||
na taɱ hoti maha-p-phalaɱ.|| ||

[88] 313. Kayirā ce kayirāth'enaɱ daḷham enaɱ parakkame,||
Saṭhilo hi paribbājo bhiyyo ākirate rajaɱ.|| ||

314. Akataɱ dukkataɱ seyyo pacchā tapati dukkataɱ,||
Katañ ca sukataɱ seyyo yaɱ katvā nānutappati.|| ||

315. Nagaraɱ yathā paccantaɱ guttaɱ santara-bāhiraɱ||
Evaɱ gopetha attānaɱ, khaṇo ve mā upaccagā,||
Khaṇātītā hi socanti Nirayamhi samappitā.|| ||

316. Alajjitāye lajjanti lajjitāye na lajjare||
Micchā-diṭṭhi-samādānā sattā gacchanti duggatiɱ.|| ||

[89] 317. Abhaye bhaya-dassino bhaye cābhaya-dassino||
Micchā-diṭṭhi-samādānā sattā gacchanti duggatiɱ.|| ||

318. Avajje vajja-matino vajje cāvajja-dassino||
Micchā-diṭṭhi-samādānā sattā gacchanti duggatiɱ.|| ||

319. Vajjañ ca vajjato ñatvā avajjaɱ ca avajjato||
Sammā-diṭṭhi-samādānā sattā gacchanti suggatiɱ.|| ||

Niraya Vagga Dvāvīsatimo.|| ||

 

§

[90]

23. Nāga Vagga

Index Than

 

320. Ahaɱ nāgo va saŋgāme cāpāto patitaɱ saraɱ||
Ativākyaɱ titikkhissaɱ du-s-sīlo hi bahujjano.|| ||

321. Dantaɱ nayanti samitiɱ dantaɱ rājā'bhirūhati||
Danto seṭṭho manussesu yo'tivākyaɱ titikkhati.|| ||

322. Varam assatarā dantā ājānīyā ca sindhavā||
Kuñjarā ca mahā-nāgā, attadanto tato varaɱ.|| ||

323. Na hi etehi yānehi gaccheyya agataɱ disaɱ||
Yath'attanā sudantena danto dantena gacchati.|| ||

324. Dhanapālako nāma kuñjaro||
kaṭukappabhedano dunnivārayo||
Baddho kabalaɱ na bhuñjati,||
sumarati nāga-vanassa kuñjaro.|| ||

325. Middhī yadā hoti mahagghaso ca||
niddāyitā samparivattasāyī||
Mahā-varāho va nivāpapuṭṭho||
puna-p-punaɱ gabbham upeti mando.|| ||

326. Idaɱ pure cittam acāri cārikaɱ||
Yenicchakaɱ yatthakāmaɱ yathā sukhaɱ||
Tad ajj'ahaɱ niggahessāmi yoniso||
Hatthippabhinnaɱ viya aɱkusaggaho.|| ||

327. Appamādaratā hotha, sacittam anurakkhatha,||
Duggā uddharath'attānaɱ paɱke sanno va kuñjaro.|| ||

[92] 328. Sace labhetha nipakaɱ sahāyaɱ||
Saddhiɱ caraɱ sādhu vihāri dhīraɱ||
Abhibhuyya sabbāni parissayāni||
Careyya ten'atta-mano satīmā.|| ||

329. No ce labhetha nipakaɱ sahāyaɱ||
Saddhiɱ caraɱ sādhu vihāri dhīraɱ||
Rājā va raṭṭhaɱ vijitaɱ pahāya||
Eko care mātaŋg'araññe va nāgo.|| ||

330. Ekassa caritaɱ seyyo,||
n'atthi bāle sahāyatā,||
Eko care na ca pāpāni kayirā||
Appo-s-sukko mātaŋg'araññe va nāgo.|| ||

[93] 331. Atthamhi jātamhi sukhā sahāyā||
Tuṭṭhī sukhā yā itarītarena,||
Puññaɱ sukhaɱ jīvita-sankhayamhi,||
Sabbassa dukkhassa sukhaɱ pahāṇaɱ.|| ||

332. Sukhā matteyyatā loke atho petteyyatā sukhā,||
Sukhā sāmaññatā loke atho brahmaññatā sukhā.|| ||

333. Sukhaɱ yāva jarā sīlaɱ||
sukhā saddhā patiṭṭhitā||
Sukho paññāya paṭilābho||
pāpānaɱ akaraṇaɱ sukhaɱ.|| ||

Nāga Vagga Tevīsatimo

 

§

[94]

24. Taṇhā Vagga

Index Than

 

334. Manujassa pamatta-cārino||
taṇhā vaḍḍhati māluvā viya,||
So palavati hurāhuraɱ||
phalam icchaɱ va vanasmiɱ vānaro.|| ||

335. Yaɱ esā sahatī jammī taṇhā loke visattikā||
Sokā tassa pavaḍḍhanti abhivaṭṭhaɱ va bīraṇaɱ.|| ||

336. Yo c'etaɱ sahatī jammiɱ taṇhaɱ loke duraccayaɱ||
Sokā tamhā papatanti udabindū va pokkharā.|| ||

337. Taɱ vo vadāmi bhaddaɱ vo yāvant'ettha samāgatā||
Taṇhāya mūlaɱ khaṇatha usīrattho va bīraṇaɱ||
Mā vo naḷaɱ va soto va Māro bhañji puna-p-punaɱ.|| ||

[95] 338. Yathā pi mūle anupaddave daḷhe||
Chinno pi rukkho punar eva rūhati||
Evam pi taṇhānusaye anūhate||
Nibbatti dukkham idaɱ puna-p-punaɱ.|| ||

339. Yassa cha-t-tiɱsati sotā manāpassavanā bhūsā||
Vāhā vahanti duddiṭṭhiɱ saŋkappā rāganissitā.|| ||

340. Savanti sabbadhā sotā, latā ubbhijja tiṭṭhati||
Tañ ca disvā lataɱ jātaɱ mūlaɱ paññāya chindatha.|| ||

341. Saritāni sinehitāni ca||
somanassāni bhavanti jantuno||
Te sātasitā sukhesino||
te ve jāti jarūpagā narā.|| ||

[96] 342. Tasiṇāya purakkhatā pajā||
parisappanti saso va bādhito,||
Saŋyojana-saŋgasattakā||
dukkham upenti puna-p-punaɱ cirāya.|| ||

343. Tasiṇāya purakkhatā pajā||
parisappanti saso va bādhito,||
Tasmā tasiṇaɱ vinodaye||
bhikkhu ākaŋkha virāgam attano.|| ||

344. Yo nibbanatho vanādhimutto||
vanamutto vanam eva dhāvati||
Taɱ puggalam eva passatha:||
mutto bandhanam eva dhāvati.|| ||

[97] 345. Na taɱ daḷhaɱ bandhanam āhu dhīrā||
Yad āyasaɱ dārujaɱ pabbajañ ca||
Sārattarattā maṇikuṇḍalesu||
Puttesu dāresu ca yā apekhā,|| ||

346. Etaɱ daḷhaɱ bandhanam āhu dhīrā||
Ohārinaɱ sithilaɱ duppamuñcaɱ||
Etam pi chetvāna paribbajanti||
Anapekkhino kāma-sukhaɱ pahāya.|| ||

347. Ye rāga-rattānupatanti sotaɱ||
Sayaɱ kataɱ makkaṭako va jālaɱ||
Etam pi chetvāna vajanti dhīrā||
Anapekkhino sabba-dukkhaɱ pahāya.|| ||

[98] 348. Muñca pure muñca pacchato||
majjhe muñca bhavassa pāragū||
Sabbattha vimutta-mānaso||
na puna jātijaraɱ upehisi.|| ||

349. Vitakka-pamathitassa jantuno||
tibba-rāgassa subhānupassino||
Bhiyyo taṇhā pavaḍḍhati,||
esa kho daḷhaɱ karoti bandhanaɱ.|| ||

350. Vitakkupasame ca yo rato||
asubhaɱ bhāvayati sadā sato||
Esa kho vyantikāhiti||
esa-cchecchati Māra-bandhanaɱ.|| ||

[99] 351. Niṭṭhaɱ gato asantāsī vītataṇho anaŋgaṇo||
Acchidda bhava-sallāni antimo'yaɱ samussayo.|| ||

352. Vītataṇho anādāno nirutti-padakovido||
Akkharānaɱ sannipātaɱ jaññā pubbaparāni ca||
Sa ve antimasārīro mahā-pañño mahāpuriso ti vuccati.|| ||

353. Sabb'ābhibhū sabba-vidū'ham asmi||
Sabbesu dhammesu anūpalitto||
Sabbañjaho taṇha-k-khaye vimutto||
Sayaɱ abhiññāya kam uddiseyyaɱ.|| ||

354. Sabba-dānaɱ dhamma-dānaɱ jināti||
Sabbaɱ rasaɱ dhamma-raso jināti||
Sabbaɱ ratiɱ dhamma-ratī jināti||
Taṇha-k-khayo sabba-dukkhaɱ jināti.|| ||

[100] 355. Hananti bhogā dummedhaɱ no ve pāragavesino,||
Bhoga-taṇhāya dummedho hanti aññe va attanāɱ.|| ||

356. Tiṇa-dosāni khettāni, rāga-dosā ayaɱ pajā,||
Tasmā hi vīta-rāgesu dinnaɱ hoti maha-p-phalaɱ.|| ||

357. Tiṇa-dosāni khettāni, dosadosā ayaɱ pajā,||
Tasmā hi vītadosesu dinnaɱ hoti maha-p-phalaɱ.|| ||

358. Tiṇa-dosāni khettāni, moha-dosā ayaɱ pajā||
Tasmā hi vīta-mohesu dinnaɱ hoti maha-p-phalaɱ.|| ||

359. Tiṇa-dosāni khettāni, icchā-dosā ayaɱ pajā||
Tasmā hi vigaticchesu dinnaɱ hoti maha-p-phalaɱ.|| ||

Taṇhā Vagga Catu-vīsatimo

 

§

[101]

25. Bhikkhu Vagga

Index Than

 

360. Cakkhunā saɱvaro sādhu, sādhu sotena saɱvaro,||
Ghāṇena saɱvaro sādhu, sādhu jivhāya saɱvaro.|| ||

361. Kāyena saɱvaro sādhu, sādhu vācāya saɱvaro,||
Manasā saɱvaro sādhu, sādhu sabbattha saɱvaro,||
Sabbattha saɱvuto bhikkhu sabba-dukkhā pamuccati.|| ||

362. Hattha-saññato pādasaññato||
Vācāya saññato saññatuttamo||
Ajjhattarato samāhito||
Eko sanTusito tam āhu bhikkhuɱ.|| ||

363. Yo mukhasaññato bhikkhu mantabhāṇī anuddhato||
Atthaɱ dhammaɱ ca dīpeti madhuraɱ tassa bhāsitaɱ.|| ||

[102] 364. Dhammārāmo dhamma-rato||
dhammaɱ anuvicintayaɱ||
Dhammaɱ anussaraɱ bhikkhu||
Sad'Dhammā na parihāyati.|| ||

365. Salābhaɱ nātimaññeyya nāññesaɱ pihayaɱ care,||
Aññesaɱ pihayaɱ bhikkhu samādhiɱ nādhi-gacchati.|| ||

366. Appalābho pi ce bhikkhu salābhaɱ nātimaññati||
Taɱ ve devā pasaɱ-santi suddhājīviɱ atanditaɱ.|| ||

367. Sabbaso nāma-rūpasmiɱ yassa n'atthi mamāyitaɱ||
Asatā ca na socati sa ve bhikkhū ti vuccati.|| ||

[103] 368. Mettā-vihārī yo bhikkhū||
pasanno buddha-sāsane||
Adhigacche padaɱ santaɱ||
sankhār'ūpasamaɱ sukhaɱ.|| ||

369. Siñca bhikkhu imaɱ nāvaɱ, sittā te lahum essati,||
Chetvā rāgaɱ ca dosañ ca tato nibbāṇam ehisi.|| ||

370. Pañca chinde pañca jahe pañca vuttari bhāvaye,||
Pañca-saŋgātigo bhikkhu oghatiṇṇo ti vuccati.|| ||

371. Jhāya bhikkhu mā ca pāmado||
Mā te kāma-guṇe bhamassu cittaɱ,||
Mā lohaguḷaɱ gilī pamatto,||
Mā kandi 'dukkham idan' ti ḍayha-māno.|| ||

[104] 372. N'atthi jhānaɱ apaññassa paññā n'atthi ajhāyato,||
Yamhi jhānaɱ ca paññā ca sa ve nibbāṇa-santike.|| ||

373. Suññāgāraɱ paviṭṭhassa santa-cittassa bhikkhuno||
Amānusī rati hoti sammā dhammaɱ vipassato.|| ||

374. Yato yato sammasati khandhānaɱ udayabbayaɱ||
Labhati pītipāmojjaɱ amataɱ taɱ vijānataɱ.|| ||

375. Tatrāyam ādi bhavati idha paññassa bhikkhuno||
Indriya-gutti santuṭṭhī Pātimokkhe ca saɱvaro,||
mitte bhajassu kalyāṇe suddhājīve atandite.|| ||

[105] 376. Paṭisanthāravutt'assa ācārakusalo siyā,||
Tato pāmojjabahulo dukkhass'antaɱ karissati.|| ||

377. Vassikā viya pupphāni maddavāni pamuñcati||
Evaɱ rāgaɱ ca dosaɱ ca vippamuñ c'etha bhikkhavo.|| ||

378. Santa-kāyo santa-vāco santavā susamāhito||
Vanta-lokāmiso bhikkhu upasanto ti vuccati.|| ||

379. Attanā coday'attānaɱ paṭimāse attam attanā,||
So attagutto satimā sukhaɱ bhikkhu vihāhisi.|| ||

[106] 380. Attā hi attano nātho attā hi attano gati,||
Tasmā saññamay'attānaɱ assaɱ bhadraɱ va vāṇijo.|| ||

381. Pāmojja-bahulo bhikkhu||
pasanno Buddha-sāsane||
Adhigacche padaɱ santaɱ||
sankhār'ūpasamaɱ sukhaɱ.|| ||

382. Yo have daharo bhikkhu yuñjati Buddha-sāsane||
So imaɱ lokaɱ pabhāseti abbhā mutto va candimā.|| ||

Bhikkhu Vagga Pañcavīsatimo

 

§

[107]

26. Brāhmaṇa Vagga

Index Than

 

383. Chinda sotaɱ parakkamma, kāme panuda brāhmaṇa,||
Saŋkhārānaɱ khayaɱ ñatvā akataññū si brāhmaṇa.|| ||

384. Yadā dvayesu dhammesū pāragū hoti brāhmaṇo||
Ath'assa sabbe saɱyogā atthaɱ gacchanti jānato.|| ||

385. Yassa pāraɱ apāraɱ vā||
pārāpāraɱ na vijjati||
Vītaddaraɱ visaɱyuttaɱ tam ahaɱ brūmi brāhmaṇaɱ.|| ||

386. Jhāyiɱ virajam āsīnaɱ||
katakiccaɱ anāsavaɱ||
Uttamatthaɱ anuppattaɱ||
tam ahaɱ brūmi brāhmaṇaɱ.|| ||

[108] 387. Divā tapati ādicco, rattiɱ ābhāti candimā,||
Sannaddho khattiyo tapati, jhāyī tapati brāhmaṇo,||
Atha sabbam ahorattiɱ Buddho tapati tejasā.|| ||

388. Bāhitapāpo ti brāhmaṇo
sama-cariyā samaṇo ti vuccati.||
Pabbājaym attano malaɱ||
tasmā pabba-jito ti vuccati.|| ||

389. Na brāhmaṇassa pahareyya||
nāssa muñcetha brāhmaṇo,||
Dhī brāhmaṇassa hantāraɱ,||
tato dhī y'assa muñcati.|| ||

[109] 390. Na brāhmaṇass'etad akiñci seyyo||
Yadā nisedho manaso piyehi,||
Yato yato hiɱsamano nivattati||
Tato tato sammati-m-eva dukkhaɱ.|| ||

391. Yassa kāyena vācāya manasā n'atthi dukkataɱ||
Saɱvutaɱ tīhi ṭhānehi tam ahaɱ brūmi brāhmaṇaɱ.|| ||

392. Yamhā dhammaɱ vijāneyya||
Sammā-Sambuddha-desitaɱ||
Sakkaccaɱ taɱ namasseyya||
aggihuttaɱ va brāhmaṇo.|| ||

393. Na jaṭāhi na gottena||
na jaccā hoti brāhmaṇo,||
Yamhi saccañ ca dhammo ca||
so sucī so va brāhmaṇo.|| ||

[110] 394. Kin te jaṭāhi dummedha, kin te ajinasāṭiyā||
Abbhantaraɱ te gahaṇaɱ, bāhiraɱ parimajjasi.|| ||

395. Paɱsukūladharaɱ jantūɱ||
kisaɱ dhamani-santhataɱ||
Ekaɱ vanasmiɱ jhāyantaɱ||
tam ahaɱ brūmi brāhmaṇaɱ.|| ||

396. Na c'āhaɱ brāhmaṇaɱ brūmi||
yonijaɱ matti-sambhavaɱ||
Bhovādī nāma so hoti||
sa ve hoti sakiñ cano,||
Akiñ canaɱ anādānaɱ||
tam ahaɱ brūmi brāhmaṇaɱ.|| ||

[111] 397. Sabba-saŋyojanaɱ chetvā||
yo ve na paritassati||
Saŋgātigaɱ visaɱyuttaɱ||
tam ahaɱ brūmi brāhmaṇaɱ.|| ||

398. Chetvā naddhiɱ varattañ ca||
sandāmaɱ sahanukkamaɱ||
Ukkhittapaḷighaɱ Buddhaɱ||
tam ahaɱ brūmi brāhmaṇaɱ.|| ||

399. Akkosaɱ vadhabandhañ ca aduṭṭho yo titikkhati||
Khantī-balaɱ balānīkaɱ tam ahaɱ brūmi brāhmaṇaɱ.|| ||

400. Akkodhanaɱ vata-vantaɱ sīla-vantaɱ anussutaɱ||
Dantaɱ antimasārīraɱ tam ahaɱ brūmi brāhmaṇaɱ.|| ||

[112] 401. Vāri pokkharapatte va āragge-r-iva sāsapo||
Yo na lippati kāmesu tam ahaɱ brūmi brāhmaṇaɱ.|| ||

402. Yo dukkhassa pajānāti||
idh'eva khayam attano||
Pannabhāraɱ visaɱyuttaɱ||
tam ahaɱ brūmi brāhmaṇaɱ.|| ||

403. Gambhīra-paññaɱ medhāviɱ||
Maggā-Maggassa kovidaɱ||
Uttamatthaɱ anuppattaɱ||
tam ahaɱ brūmi brāhmaṇaɱ.|| ||

404. Asaɱsaṭṭhaɱ gahaṭṭhehi anāgārehi c'ūbhayaɱ||
Anokāsariɱ app'icchaɱ tam ahaɱ brūmi brāhmaṇaɱ.|| ||

[113] 405. Nidhāya daṇḍaɱ bhūtesu tasesu thāvaresu ca||
Yo na hanti na ghāteti tam ahaɱ brūmi brāhmaṇaɱ.|| ||

406. Aviruddhaɱ viruddhesu attadaṇḍesu nibbutaɱ||
Sādānesu anādānaɱ tam ahaɱ brūmi brāhmaṇaɱ.|| ||

407. Yassa rāgo ca doso ca māno makkho ca pātito||
Sāsapo-r-iva āraggā tam ahaɱ brūmi brāhmaṇaɱ.|| ||

408. Akakkasaɱ viññapaniɱ giraɱ saccaɱ udīraye||
Yāya nābhisaje kañci tam ahaɱ brūmi brāhmaṇaɱ.|| ||

409. Yo'dha dīghaɱ va rassaɱ vā||
aṇuɱ thūlaɱ subhāsubhaɱ||
Loke adinnaɱ nādiyati tam ahaɱ brūmi brāhmaṇaɱ.|| ||

[114] 410. Āsā yassa na vijjanti||
asmiɱ loke paramhi ca||
Nirāsayaɱ visaɱyuttaɱ||
tam ahaɱ brūmi brāhmaṇaɱ.|| ||

411. Yassālayā na vijjanti||
aññāya akathaɱ-kathī||
Amatogadhaɱ anuppattaɱ||
tam ahaɱ brūmi brāhmaṇaɱ.|| ||

412. Yo'dha puññañ ca pāpañ ca||
ubho saŋgaɱ upaccagā||
Asokaɱ virajaɱ suddhaɱ||
tam ahaɱ brūmi brāhmaṇaɱ.|| ||

[115] 413. Candaɱ va vimalaɱ suddhaɱ||
vi-p-pasannam anāvilaɱ||
Nandī-bhava-parikkhīṇaɱ||
tam ahaɱ brūmi brāhmaṇaɱ.|| ||

414. Yo imaɱ paḷipathaɱ duggaɱ||
saɱsāraɱ moham accagā||
Tiṇṇo pāragato jhāyī||
anejo akathaɱ-kathī||
Anupādāya nibbuto||
tam ahaɱ brūmi brāhmaṇaɱ.|| ||

415. Yo'dha kāme pahātvāna||
anāgāro paribbaje||
Kāma-bhava-parikkhīṇaɱ||
tam ahaɱ brūmi brāhmaṇaɱ.|| ||

[116] 416. Yo'dha taṇhaɱ pahātvāna||
anāgāro paribbaje||
Taṇhā-bhava-parikkhīṇaɱ||
tam ahaɱ brūmi brāhmaṇaɱ.|| ||

417. Hitvā mānusakaɱ yogaɱ||
dibbaɱ yogaɱ upaccagā||
Sabba-yoga-visaɱyuttaɱ||
tam ahaɱ brūmi brāhmaṇaɱ.|| ||

418. Hitvā ratiɱ ca aratiɱ ca||
sītibhūtaɱ nirūpadhiɱ||
Sabba-lokābhibhuɱ vīraɱ||
tam ahaɱ brūmi brāhmaṇaɱ.|| ||

419. Cutiɱ yo vedi sattānaɱ||
upapattiñ ca sabbaso||
Asattaɱ Sugataɱ Buddhaɱ||
tam ahaɱ brūmi brāhmaṇaɱ.|| ||

[117] 420. Yassa gatiɱ na jānanti devā gandhabba-mānusā||
Khīṇ'āsavaɱ arahantaɱ tam ahaɱ brūmi brāhmaṇaɱ.|| ||

421. Yassa pure ca pacchā ca majjhe ca n'atthi kiñ canaɱ||
Akiñ canaɱ anādānaɱ tam ahaɱ brūmi brāhmaṇaɱ.|| ||

422. Usabhaɱ pavaraɱ vīraɱ||
mahesiɱ vijit'āvinaɱ||
Anejaɱ nhātakaɱ Buddhaɱ||
tam ahaɱ brūmi brāhmaṇaɱ.|| ||

423. Pubbe-nivāsaɱ yo vedī saggāpāyañ ca passati||
Atho jātikkhayaɱ patto abhiññāvosito muni||
Sabba-vosita-vosānaɱ tam ahaɱ brūmi brāhmaṇaɱ.|| ||

Brāhmaṇa Vagga Chabbīsatimo

 

§

 

Vagguddānaɱ

1a. Yamakaɱ appamādaɱ cittaɱ||
pupphaɱ bālena paṇḍitaɱ||
Arahantaɱ sahassena||
pāpaɱ daṇḍena, te dasa.|| ||

2a. Jarā attā ca loko ca||
Buddhaɱ sukhaɱ piyena ca||
Kodhaɱ malañ ca dhamm'aṭṭhaɱ||
Magga-vaggena vīsati.|| ||

3a. Pakiṇṇaɱ Nirayo nāgo||
taṇhāɱ bhikkhu ca brāhmaṇo,||
Ete chabbīsatī vaggā||
desitādicca-bandhunā.|| ||

Dhammapada Pāḷi Niṭṭhitā

 


Copyright Statement