Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
I. Mūlapaṇṇāsa
5. Cūḷa Yamaka Vagga

Sutta 48

Kosambiya Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][olds][upal] Evaɱ me sutaɱ:|| ||

Ekaɱ samayaɱ Bhagavā Kosambiyaɱ viharati Ghositārāme.|| ||

Tena kho pana samayena Kosambiyaɱ bhikkhū||
bhaṇḍana-jātā||
kalaha-jātā||
vivādāpannā||
aññamaññaɱ||
mukha-sattīhi||
vitudantā viharanti.|| ||

Te na c'eva aññamaññaɱ saññapenti,||
na ca saññattiɱ upenti,||
na ca aññamaññaɱ nijjhāpenti,||
na ca nijjhattiɱ upenti.|| ||

2. Atha kho [321] aññataro bhikkhu yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhu Bhagavantaɱ etad avoca:|| ||

"Idha bhante Kosambiyaɱ bhikkhū||
bhaṇḍana-jātā||
kalaha-jātā||
vivādāpannā||
aññamaññaɱ||
mukha-sattīhi||
vitudantā viharanti.|| ||

Te na c'eva aññamaññaɱ saññapenti,||
na ca saññattiɱ upenti,||
na ca aññamaññaɱ nijjhāpenti,||
na ca nijjhattiɱ upenti" ti.|| ||

3. Atha kho Bhagavā aññataraɱ bhikkhuɱ āmantesi:|| ||

"Ehi tvaɱ bhikkhu mama vacanena te bhikkhū āmantehi:|| ||

'Satthāyasmante āmantetī'" ti.|| ||

"Evaɱ bhante" ti||
kho so bhikkhu Bhagavato paṭissutvā yena te bhikkhū ten'upasaŋkami.|| ||

Upasaŋkamitvā te bhikkhū etad avoca:|| ||

"Satthā āyasmante āmantetī" ti.|| ||

"Evam āvuso" ti||
kho te bhikkhū tassa bhikkhuno paṭissutvā yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinne kho te bhikkhū Bhagavā etad avoca:|| ||

"Saccaɱ kira tumhe bhikkhave||
bhaṇḍana-jātā||
kalaha-jātā||
vivādāpannā||
aññamaññaɱ||
mukha-sattīhi||
vitudantā viharatha,||
te na c'eva aññamaññaɱ saññāpetha,||
na ca saññattiɱ upetha,||
te na c'eva aññamaññaɱ nijdhāpetha,||
na ca nijdhattiɱ upethā" ti?|| ||

"Evaɱ bhante".|| ||

4. "Taɱ kiɱ maññatha bhikkhave?|| ||

Yasmiɱ tumhe samaye||
bhaṇḍana-jātā||
kalaha-jātā||
vivādāpannā||
aññamaññaɱ||
mukha-sattīhi||
vitudantā viharatha,||
api nu tumhākaɱ tasmiɱ samaye mettaɱ kāya-kammaɱ paccupaṭṭhitaɱ hoti||
sabrahmacārīsu āvī c'eva raho ca,||
mettaɱ vacī-kammaɱ paccupaṭṭhitaɱ hoti||
sabrahmacārīsu āvī c'eva raho ca,||
mettaɱ mano-kammaɱ paccupaṭṭhitaɱ hoti||
sabrahmacārīsu āvī c'eva raho cā" ti?|| ||

"No h'etaɱ bhante".|| ||

Iti kira bhikkhave yasmiɱ tumhe samaye||
bhaṇḍana-jātā||
kalaha-jātā||
vivādāpannā||
aññamaññaɱ||
mukha-sattīhi||
vitudantā viharatha,||
n'eva tumhākaɱ tasmiɱ samaye mettaɱ kāya-kammaɱ paccupaṭṭhitaɱ hoti||
sabrahmacārīsu āvī c'eva raho ca||
na mettaɱ vacī-kammaɱ paccupaṭṭhitaɱ hoti||
sabrahmacārīsu āvī c'eva raho ca||
na mettaɱ mano-kammaɱ paccupaṭṭhitaɱ hoti||
sabrahmacārīsu āvī c'eva raho ca.|| ||

Atha kiɱ carahi tumhe moghapurisā||
kiɱ jānantā||
kiɱ passantā||
bhaṇḍana-jātā||
kalaha-jātā||
vivādāpannā||
añña-||
[322] maññaɱ mukha-sattīhi||
vitudantā viharatha,||
te na c'eva aññamaññaɱ saññāpetha,||
na ca saññattiɱ upetha,||
na ca aññamaññaɱ nijjhāpetha,||
na ca nijjhattiɱ upetha.|| ||

Taɱ hi tumhākaɱ moghapurisā bhavissati dīgha-rattaɱ ahitāya dukkhāyā" ti.|| ||

5. Atha kho Bhagavā bhikkhū āmantesi:|| ||

"Cha h'ime bhikkhave dhammā sārāṇīyā piyakaraṇā garukaraṇā saŋgahāya avivādāya sāmāggiyā ekībhāvāya saɱvattanti.|| ||

Katame cha?|| ||

Idha, bhikkhave, bhikkhuno mettaɱ kāya-kammaɱ paccupaṭṭhitaɱ hoti||
sabrahmacārīsu āvī c'eva raho ca.|| ||

Ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

Puna ca paraɱ bhikkhave bhikkhuno mettaɱ vacī-kammaɱ paccupaṭṭhitaɱ hoti||
sabrahmacārīsu āvī c'eva raho ca.|| ||

Ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

Puna ca paraɱ bhikkhave bhikkhuno mettaɱ mano-kammaɱ paccupaṭṭhitaɱ hoti||
sabrahmacārīsu āvī c'eva raho ca.|| ||

Ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

Puna ca paraɱ bhikkhave bhikkhu ye te lābhā dhammikā dhammaladdhā,||
antamaso pattapariyāpannamattam pi,||
tathārūpehi lābhehi appaṭivibhattabhogī hoti||
sīlavantehi sabrahmacārīhi sādhāraṇa bhogī.|| ||

Ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvaya saɱvattati.|| ||

Puna ca paraɱ bhikkhave bhikkhu yāni tāni sīlāni akhaṇḍāni acchiddāni asabalāni akammāsāni bhujissāni viññppasatthāni aparāmaṭṭhāni samādhi-saɱvattanikāni,||
tathārūpesu sīlesu sīlasāmaññagato viharati||
sabrahmacārīhi āvī c'eva raho ca.|| ||

Ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

Puna ca paraɱ bhikkhave bhikkhu yā'yaɱ diṭṭhi ariyā niyyānikā niyyāti takkarassa sammā-dukkhakkhayāya,||
tathārūpāya diṭṭhiyā diṭṭhisāmaññagato viharati sabrahmacārīhi āvī c'eva raho ca.|| ||

Ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

Ime kho bhikkhave cha sārāṇīyā dhammā piyakaraṇā garukaraṇā saŋgahāya avivādāya sāmaggiyā ekībhāvaya saɱvattanti.|| ||

Imesaɱ kho bhikkhave channaɱ sārāṇīyānaɱ dhammānaɱ etaɱ aggaɱ etaɱ saŋgāhikaɱ etaɱ saɱghātanikaɱ yad idaɱ yā'yaɱ diṭṭhi ariyā niyyātikā niyyāti takkarassa sammā dukkhakkhayāya.|| ||

Seyyathā pi, bhikkhave, kūṭāgārassa etaɱ aggaɱ etaɱ saŋgāhakaɱ etaɱ saɱghātanikaɱ yad idaɱ kūṭaɱ,||
evam eva kho [323] bhikkhave imesaɱ channaɱ sārāṇīyānaɱ dhammānaɱ etaɱ aggaɱ etaɱ saŋgāhikaɱ etaɱ saɱghātanikaɱ yad idaɱ yā'yaɱ diṭṭhi ariyā niyyānikā niyyāti takkarassa sammā dukkhakkhayāya.|| ||

6. Kathañ ca bhikkhave yā'yaɱ diṭṭhi ariyā niyyānikā niyyāti takkarassa sammā-dukkhakkhayāya?|| ||

Idha, bhikkhave, bhikkhu araññagato vā rukkhamūlagato vā suññāgāragato vā iti paṭisañcikkhati:|| ||

'Atthi nu kho me taɱ pariyuṭṭhānaɱ ajjhattaɱ appahīnaɱ yenāhaɱ pariyuṭṭhānena pariyuṭṭhita-citto yathābhūtaɱ na jāneyyaɱ na passeyyan' ti?|| ||

"Sace bhikkhave bhikkhu kāma-rāga-pariyuṭṭhito hoti,||
pariyuṭṭhita-citto va hoti.|| ||

Sace bhikkhave bhikkhu vyāpāda-pariyuṭṭhito hoti,||
pariyuṭṭhita-citto va hoti.|| ||

Sace bhikkhave bhikkhu thīna-middha-pariyuṭṭhito hoti,||
pariyuṭṭhita-citto va hoti.|| ||

Sace bhikkhave bhikkhu uddhacca-kukkucca-pariyuṭṭhito hoti,||
pariyuṭṭhita-citto va hoti.|| ||

Sace bhikkhave bhikkhu vici-kicchā-pariyuṭṭhito hoti,||
pariyuṭṭhita-citto va hoti.|| ||

Sace bhikkhave bhikkhu idhaloka-cintāya pasuto hoti,||
pariyuṭṭhita-citto va hoti.|| ||

Sace bhikkhave bhikkhu paraloka-cintāya pasuto hoti,||
pariyuṭṭhita-citto va hoti.|| ||

Sace bhikkhave bhikkhu bhaṇḍanajāto kalahajāto vivādāpanno aññamaññaɱ mukha-sattīhi vitudanto viharati,||
pariyuṭṭhita-citto va hoti.|| ||

So evaɱ pajānāti:|| ||

'N'atthi kho me taɱ pariyuṭṭhānaɱ ajjhattaɱ appahīnaɱ yenāhaɱ pariyuṭṭhānena pariyuṭṭhita-citto yathābhūtaɱ na jāneyyaɱ na passeyyaɱ.|| ||

Suppaṇihitaɱ me mānasaɱ saccānaɱ bodhāyā' ti.|| ||

Idam-assa paṭhamaɱ ñāṇaɱ adhigataɱ hoti ariyaɱ lokuttaraɱ asādhāraṇaɱ puthujjanehi.|| ||

7. Puna ca paraɱ bhikkhave ariyasāvako iti paṭisañcikkhati:|| ||

'Imaɱ nu kho ahaɱ diṭṭhiɱ āsevanto bhāvento bahulīkaronto labhāmi paccattaɱ samathaɱ,||
labhāmi paccattaɱ nibbutin' ti.|| ||

So evaɱ pajānāti:|| ||

'Imaɱ kho ahaɱ diṭṭhiɱ āsevanto bhāvento bahulīkaronto labhāmi paccattaɱ samathaɱ,||
labhāmi paccattaɱ nibbutinti.|| ||

Idam-assa dutiyaɱ ñāṇaɱ adhigataɱ hoti ariyaɱ lokuttaraɱ asādhāraṇaɱ puthujjanehi.(2)|| ||

8. Puna ca paraɱ bhikkhave ariyasāvako iti paṭisañcikkhati:|| ||

'Yathārūpāyāhaɱ diṭṭhiyā samannāgato,||
atthi nu kho ito bahiddhā añño samaṇo vā brāhmaṇo vā tathārūpāya diṭṭhiyā samannāgato' ti.|| ||

So evaɱ pajānāti:|| ||

'Yathārūpāyāhaɱ diṭṭhiyā samannāgato,||
n'atthi ito bahiddhā añño samaṇo vā brāhmaṇo [324] vā tathārūpāya diṭṭhiyā samannāgato' ti.|| ||

Idam-assa tatiyaɱ ñāṇaɱ adhigataɱ hoti ariyaɱ lokuttaraɱ asādhāraṇaɱ puthujjanehi.|| ||

9. Puna ca paraɱ bhikkhave ariyasāvako iti paṭisañcikkhati:|| ||

'Yathārūpāya dhammatāya diṭṭhi-sampanno puggalo samannāgato,||
aham pi tathārūpāya dhammatāya samannāgato' ti?|| ||

Kathaɱrūpāya ca bhikkhave dhammatāya diṭṭhi-sampanno puggalo samannāgato?|| ||

Dhammatā esā bhikkhave diṭṭhi-sampannassa puggalassa:|| ||

Kiñcāpi tathā-rūpiɱ āpattiɱ āpajjati yathārūpāya āpattiyā vuṭṭhānaɱ paññāyati,||
atha kho naɱ khippam'eva satthari vā viññūsu vā sabrahmacārīsu deseti vivarati uttānī karoti||
desetvā vivaritvā uttānī karitvā āyatiɱ saɱvaraɱ āpajjati.|| ||

Seyyathā pi, bhikkhave, daharo kumāro mando uttānaseyyako hatthena vā pādena vā aŋgāraɱ akkamitvā khippam'eva paṭisaɱharati,||
evam eva kho, bhikkhave, dhammatā esā diṭṭhi-sampannassa puggalassa:|| ||

Kiñcāpi tathā-rūpiɱ āpattiɱ āpajjati yathārūpāya āpattiyā vuṭṭhānaɱ paññāyati,||
atha kho naɱ khippam'eva satthari vā viññūsu vā sabrahmacārīsu deseti vivarati uttānī karoti||
desetvā vivaritvā uttānī karitvā āyatiɱ saɱvaraɱ āpajjati.|| ||

So evaɱ pajānāti:|| ||

'Yathārūpāya dhammatāya diṭṭhi-sampanno puggalo samannāgato,||
aham pi tathārūpāya dhammatāya samannāgato' ti.|| ||

Idam-assa catutthaɱ ñāṇaɱ adhigataɱ hoti ariyaɱ lokuttaraɱ asādhāraṇaɱ puthujjanehi.|| ||

10. Puna ca paraɱ bhikkhave ariyasāvako iti paṭisañcikkhati:|| ||

'Yathārūpāya dhammatāya diṭṭhi-sampanno puggalo samannāgato,||
aham pi tathā rūpāya dhammatāya samannāgato' ti.|| ||

Kathaɱ rūpāya ca bhikkhave dhammatāya diṭṭhi-sampanno puggalo samannāgato?|| ||

Dhammatā esā bhikkhave diṭṭhi-sampannassa puggalassa:|| ||

Kiñcāpi yāni tāni sabrahmacārīnaɱ uccāvacāni kiŋkaraṇīyāni,||
tattha ussukkaɱ āpanno hoti,||
atha khvāssa tibbāpekkhā hoti||
adhisīla-sikkhāya adhicitta-sikkhāya adhipaññā-sikkhāya.|| ||

Seyyathā pi, bhikkhave, gāvī taruṇavacchā thambañ ca ālumpati vacchakañ ca apavīṇati,||
evam eva kho, bhikkhave, dhammatā esā diṭṭhi-sampannassa puggalassa:|| ||

Kiñcāpi yāni tāni sabrahmacārīnaɱ uccāvacāni kiŋkaraṇīyāni,||
tattha ussukkaɱ āpanno hoti||
atha khvāssa tibbāpekkhā hoti||
adhisīla-sikkhāya adhicitta-sikkhāya adhipaññā-sikkhāya.|| ||

So evaɱ pajānāti:|| ||

'Yathārūpāya dhammatāya diṭṭhi-sampanno puggalo samannāgato,||
aham pi tathārūpāya dhammatāya samannāgato' ti.|| ||

Idam-assa pañcamaɱ ñāṇaɱ adhigataɱ hoti ariyaɱ lokuttaraɱ asādhāraṇaɱ puthujjanehi.|| ||

[325] 11. Puna ca paraɱ bhikkhave ariyasāvako iti paṭisañcikkhati:|| ||

'Yathārūpāya balatāya diṭṭhi-sampanno puggalo samannāgato,||
aham pi tathārūpāya balatāya samannāgato' ti.|| ||

Kathaɱ rūpāya ca bhikkhave balatāya diṭṭhi-sampanno puggalo samannāgato?|| ||

Balatā esā bhikkhave diṭṭhi-sampannassa puggalassa:|| ||

Yaɱ Tathāgatappavedite dhamma-vinaye desiyamāne aṭṭhikatvā manasi katvā sabba-cetaso samannāharitvā ohitasoto dhammaɱ suṇāti.|| ||

So evaɱ pajānāti:|| ||

'Yathārūpāya balatāya diṭṭhi-sampanno puggalo samannāgato,||
aham pi tathārūpāya balatāya samannāgato' ti.|| ||

Idam-assa chaṭṭhaɱ ñāṇaɱ adhigataɱ hoti ariyaɱ lokuttaraɱ asādhāraṇaɱ puthujjanehi.|| ||

12. Puna ca paraɱ bhikkhave ariyasāvako iti paṭisañcikkhati:|| ||

'Yathārūpāya balatāya diṭṭhi-sampanno puggalo samannāgato,||
aham pi tathārūpāya balatāya samannāgato' ti.|| ||

Kathaɱ rūpāya ca bhikkhave balatāya diṭṭhi-sampanno puggalo samannāgato?|| ||

Balatā esā bhikkhave diṭṭhi-sampannassa puggalassa:|| ||

Yaɱ Tathāgatappavedite dhamma-vinaye desiyamāne labhati atthavedaɱ,||
labhati dhammavedaɱ,||
labhati dhamm'ūpasaɱhitaɱ pāmujjaɱ.|| ||

So evaɱ pajānāti:|| ||

'Yathārūpāya balatāya diṭṭhi-sampanno puggalo samannāgato,||
aham pi tathārūpāya balatāya samannāgato' ti.|| ||

Idam-assa sattamaɱ ñāṇaɱ adhigataɱ hoti ariyaɱ lokuttaraɱ asādhāraṇaɱ puthujjanehi.|| ||

Evaɱ sattaŋgasamannāgatassa kho bhikkhave ariyasāvakassa dhammatā susamanniṭṭhā hoti sotāpatti-phala-sacchikiriyāya.|| ||

Evaɱ sattaŋgasamannāgato kho bhikkhave ariyasāvako sotāpatti-phala-samannāgato hotī" ti.|| ||

Idam avoca Bhagavā.|| ||

Attamanā te bhikkhū Bhagavato bhāsitaɱ abhinandunti.

Kosambiyasuttaɱ aṭṭhamaɱ.


Contact:
E-mail
Copyright Statement   Webmaster's Page