Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
1. Gahapati Vagga

Sutta 58

Abhaya Rāja-Kumāra Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][than][upal] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veluvane Kalandakanivāpe.|| ||

Atha kho Abhayo rāja-kumāro yena Nigaṇṭho Nātaputto ten'upasankami.|| ||

Upasaŋkamitvā Nigaṇṭhaɱ Nātaputtaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Abhayaɱ rāja-kumāraɱ Nigaṇṭho Nātaputto etad avoca:|| ||

"Ehi tvaɱ rāja-kumāra,||
samaṇassa Gotamassa vādaɱ āropehi.|| ||

Evaɱ te kalyāṇo kitti-saddo ababhuggacchati:||
'Abhayena rāja-kumārena samaṇassa Gotamassa evaɱ mahiddhikassa evaɱ mah-ā-nubhāvassa vādo āropito'" ti.|| ||

"Yathā kathaɱ pan'āhaɱ bhante samaṇassa Gotamassa evaɱ mahiddhikassa||
evaɱ mānubhāvassa vādaɱ āropessāmī" ti?|| ||

"Ehi tvaɱ rāja-kumāra,||
yena Samaṇo Gotamo ten'upasankama,||
upasankamitvā samaṇaɱ Gotamaɱ evaɱ vadehi:|| ||

'Bhāseyya nu kho bhante Tathāgato taɱ vācaɱ yā sā vācā paresaɱ appiyā amanāpā' ti?|| ||

Sace te Samaṇo Gotamo evaɱ puṭṭho evaɱ vyākaroti:|| ||

'Bhāseyya rāja-kumāra,||
Tathāgato taɱ vācaɱ yā sā vācā paresaɱ appiyā amanāpā' ti.|| ||

Tam enaɱ tvaɱ evaɱ vadeyyāsi:|| ||

'Atha kiñcarahi te bhante puthujjanena nānā-karaṇaɱ,||
puthujjano pi hi taɱ vācaɱ bhāseyya,||
yā sā vācā paresaɱ appiyā amanāpā' ti.|| ||

Sace pana te Samaṇo Gotamo evaɱ puṭṭho evaɱ vyākaroti:|| ||

'Na rāja-kumāra Tathāgato taɱ vācaɱ bhāseyya yā sā vācā [393] paresaɱ appiyā amanāpā' ti.|| ||

Tam enaɱ tvaɱ evaɱ vadeyyāsi:|| ||

'Atha kiñcarahi te bhante devadatto vyākato:||
"Āpāyiko devadatto,||
nerayiko devadatto,||
kappaṭṭho devadatto,||
atekiccho devadatto" ti.|| ||

Tāya ca pana te vācāya devadatto kupito ahosi anatta-mano' ti.|| ||

Imaɱ kho te rāja-kumāra,||
Samaṇo Gotamo ubhato koṭikaɱ pañhaɱ puṭṭho samāno n'eva sakkhiti uggilituɱ||
n'eva sakkhiti ogilituɱ.|| ||

Seyyathā pi nāma purisassa ayosiŋghāṭakaɱ kaṇṭhe vilaggaɱ,||
so n'eva sakkuṇeyya uggilituɱ,||
n'eva sakuṇeyya ogilituɱ.|| ||

Evam eva kho te rāja-kumāra Samaṇo Gotamo imaɱ ubhatokoṭikaɱ pañhaɱ puṭṭho samāno n'eva sakkhiti uggilituɱ,||
n'eva sakkhiti ogilitun" ti.|| ||

"Evaɱ bhante" ti kho Abhayo rāja-kumāro Nigaṇṭhassa Nātaputtassa paṭissutvā uṭṭhāy āsanā Nigaṇṭhaɱ Nātaputtaɱ abhivādetvā padakkhiṇaɱ katvā yena Bhagavā ten'upasankami,||
upasankamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnassa kho Abhayassa rāja-kumārassa suriyaɱ oloketvā etad ahosi.|| ||

"Akālo kho ajja Bhagavato vādaɱ āropetuɱ,||
sve dān'āhaɱ sake nivesane Bhagavato vādaɱ āropessāmī" ti||
Bhagavantaɱ etad avoca:|| ||

"Adhivāsetu me bhante Bhagavā svātanāya attacatuttho bhattan" ti?|| ||

Adhivāsesi Bhagavā tuṇhī-bhāvena.|| ||

Atha kho Abhayo rāja-kumāro Bhagavato adhivāsanaɱ viditvā uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho Bhagavā tassā rattiyā accayena pubbaṇha-samayaɱ nivāsetvā patta-cīvaraɱ ādāya yena Abhayassa rāja-kumārassa nivesanaɱ ten'upasankami.|| ||

Upasaŋkamitvā paññatte āsane nisīdi.|| ||

Atha kho Abhayo rāja-kumāro Bhagavantaɱ paṇītena khādanīyena bhojanīyena sahatthā santappesi sampavāresi.|| ||

Atha kho Abhayo rāja-kumāro Bhagavantaɱ bhuttāviɱ onītapattapāṇiɱ aññataraɱ nīcaɱ āsanaɱ gahetvā eka-m-antaɱ nisīdi.|| ||

Eka-m-antaɱ nisinno kho Abhayo rāja-kumāro Bhagavantaɱ etad avoca:|| ||

"Bhāseyya nu kho bhante Tathāgato taɱ vācaɱ yā sā vācā paresaɱ appiyā amanāpā" ti.|| ||

"Na kho'ttha rāja-kumāra ekaɱsenā" ti.|| ||

"Ettha bhante anassuɱ Nigaṇṭhā" ti.|| ||

"Kiɱ pana tvaɱ rāja-kumāra evaɱ vadesi:|| ||

[394] 'Ettha bhante anassuɱ Nigaṇṭhā'" ti?|| ||

"Idāhaɱ bhante yena Nigaṇṭho Nātaputto ten'upasankami.|| ||

Upasaŋkamitvā Nigaṇṭhaɱ Nātaputtaɱ abhivādetvā eka-m-antaɱ nisīdiɱ.|| ||

Eka-m-antaɱ nisinnaɱ kho maɱ bhante Nigaṇṭho Nātaputto etad avoca:|| ||

'Ehi tvaɱ rāja-kumāra,||
yena Samaṇo Gotamo ten'upasankama,||
upasankamitvā samaṇaɱ Gotamaɱ evaɱ vadehi:|| ||

"Bhāseyya nu kho bhante Tathāgato taɱ vācaɱ yā sā vācā paresaɱ appiyā amanāpā" ti?|| ||

Sace te Samaṇo Gotamo evaɱ puṭṭho evaɱ vyākaroti:|| ||

"Bhāseyya rāja-kumāra,||
Tathāgato taɱ vācaɱ yā sā vācā paresaɱ appiyā amanāpā" ti.|| ||

Tam enaɱ tvaɱ evaɱ vadeyyāsi:|| ||

"Atha kiñcarahi te bhante puthujjanena nānā-karaṇaɱ,||
puthujjano pi hi taɱ vācaɱ bhāseyya,||
yā sā vācā paresaɱ appiyā amanāpā" ti.|| ||

Sace pana te Samaṇo Gotamo evaɱ puṭṭho evaɱ vyākaroti:|| ||

"Na rāja-kumāra Tathāgato taɱ vācaɱ bhāseyya yā sā vācā paresaɱ appiyā amanāpā" ti.|| ||

Tam enaɱ tvaɱ evaɱ vadeyyāsi:|| ||

"Atha kiñcarahi te bhante devadatto vyākato:||
'Āpāyiko devadatto,||
nerayiko devadatto,||
kappaṭṭho devadatto,||
atekiccho devadatto' ti.|| ||

Tāya ca pana te vācāya devadatto kupito ahosi anatta-mano" ti.|| ||

Imaɱ kho te rāja-kumāra,||
Samaṇo Gotamo ubhato koṭikaɱ pañhaɱ puṭṭho samāno n'eva sakkhiti uggilituɱ||
n'eva sakkhiti ogilituɱ.|| ||

Seyyathā pi nāma purisassa ayosiŋghāṭakaɱ kaṇṭhe vilaggaɱ,||
so n'eva sakkuṇeyya uggilituɱ,||
n'eva sakuṇeyya ogilituɱ.|| ||

Evam eva kho te rāja-kumāra Samaṇo Gotamo imaɱ ubhatokoṭikaɱ pañhaɱ puṭṭho samāno n'eva sakkhiti uggilituɱ,||
n'eva sakkhiti ogilitun' ti.|| ||

Tena kho pana samayena daharo kumāro mando uttāna-seyyako Abhayassa rāja-kumārassa aŋke nisinno hoti.|| ||

Atha kho Bhagavā Abhayaɱ rāja-kumāraɱ etad avoca:|| ||

"Taɱ kiɱ [395] maññasi rāja-kumāra?|| ||

Sacāyaɱ kumāro tuyhaɱ vā pamādam-anvāya dhātiyā vā pamādam-anvāya kaṭṭhaɱ vā kaṭhalaɱ vā mukhe āhareyya,||
kinti naɱ kareyyāsī" ti?|| ||

"Āhareyy'assāhaɱ bhante.|| ||

Sace ahaɱ bhante na sakkuṇeyyaɱ ādiken'eva āhattuɱ,||
vāmena hatthena sīsaɱ pariggahetvā dakkhiṇena hatthena vaŋkaŋguliɱ karitvā salohitam pi āhareyyaɱ.|| ||

Taɱ kissa hetu?|| ||

Atthi me bhante kumāre anukampā" ti.|| ||

"Evam eva kho rāja-kumāra,||
yaɱ Tathāgato vācaɱ jānāti abhūtaɱ atacchaɱ anattha-saɱhitaɱ,||
sā ca paresaɱ appiyā amanāpā,||
na taɱ Tathāgato vācaɱ bhāsati.|| ||

Yam pi Tathāgato vācaɱ jānāti bhūtaɱ tacchaɱ anattha-saɱhitaɱ||
sā ca paresaɱ appiyā amanāpā,||
tam pi Tathāgato vācaɱ na bhāsati.|| ||

Yañ ca kho Tathāgato vācaɱ jānāti bhūtaɱ tacchaɱ attha-saɱhitaɱ||
sā ca paresaɱ appiyā amanāpā,||
tatra kāl'aññū Tathāgato hoti tassā vācāya veyyā-karaṇāya.|| ||

Yaɱ Tathāgato vācaɱ jānāti abhūtaɱ atacchaɱ anattha-saɱhitaɱ||
sā ca paresaɱ piyā manāpā,||
na taɱ Tathāgato vācaɱ bhāsati.|| ||

Yam pi Tathāgato vācaɱ jānāti bhūtaɱ tacchaɱ anattha-saɱhitaɱ||
sā ca paresaɱ piyā manāpā,||
tam pi Tathāgato vācaɱ na bhāsati.|| ||

Yañ ca kho Tathāgato vācaɱ jānāti bhūtaɱ tacchaɱ attha-saɱhitaɱ||
sā ca paresaɱ piyā manāpā,||
tatra kāl'aññū Tathāgato hoti tassā vācāya veyyā-karaṇāya.|| ||

Taɱ kissa hetu?|| ||

Atthi rāja-kumāra Tathāgatassa sattesu anukampā" ti?|| ||

"Ye'me bhante khattiya-paṇḍitā pi||
brāhmaṇa-paṇḍitā pi||
gahapati-paṇḍitā pi||
samaṇa-paṇḍitā pi pañhaɱ abhisankharitvā Tathāgataɱ upasankamitvā pucchanti,||
pubbe va nu kho etaɱ bhante Bhagavato cetaso parivitakkitaɱ hoti:|| ||

'Ye maɱ upasankamitvā evaɱ pucchi'ssan' ti,|| ||

tes'āhaɱ evaɱ puṭṭho evaɱ vyākarissāmīti,||
udāhu ṭhānaso v'etaɱ Tathāgataɱ paṭibhātī" ti?|| ||

"Tena hi rāja-kumāra taɱ yeva ettha paṭipucchissāmi,||
yathā te khameyya,||
tathā naɱ vyākareyyāsi.|| ||

Taɱ kiɱ maññasi rāja-kumāra?|| ||

Kusalo tvaɱ rathassa aŋgapaccaŋgānan" ti?|| ||

"Evaɱ bhante,||
kusalo ahaɱ rathassa aŋgapaccaŋgānan" ti.|| ||

"Taɱ kim maññasi rāja-kumāra?|| ||

Ye taɱ upasankamitvā evaɱ puccheyyuɱ:|| ||

'Kiɱ nām idaɱ rathassa aŋgapaccaŋgan' ti?|| ||

pubbe nu kho te etaɱ cetaso pari- [396] vitakkitaɱ assa:|| ||

'Ye maɱ upasankamitvā evaɱ pucchissanti tes'āhaɱ evaɱ puṭṭho evaɱ vyākarissāmī' ti?|| ||

udāhu ṭhānaso v'etaɱ taɱ paṭibhāseyyā" ti?|| ||

"Ahaɱ hi bhante rathiko saññato kusalo rathassa aŋgapaccaŋgānaɱ,||
sabbāni me rathassa aŋgapaccaŋgāni suviditāni,||
ṭhānaso v'etaɱ maɱ paṭibhāseyyā" ti.|| ||

"Evam eva kho rāja-kumāra ye te khattiya-paṇḍitā pi||
brāhmaṇa-paṇḍitā pi||
gahapati-paṇḍitā pi||
samaṇa-paṇḍitā pi pañhaɱ abhisankharitvā Tathāgataɱ upasankamitvā pucchanti||
ṭhānaso v'etaɱ Tathāgataɱ paṭibhāti.|| ||

Taɱ kissa hetu?|| ||

Sā hi rāja-kumāra Tathāgatassa dhamma-dhātu suppaṭi-viddhā yassā dhamma-dhātuyā suppaṭi-viddhattā ṭhānaso v'etaɱ Tathāgataɱ paṭibhātī" ti.|| ||

Evaɱ vutte Abhayo rāja-kumāro Bhagavantaɱ etad avoca:|| ||

"Abhikkantaɱ bhante!|| ||

Abhikkantaɱ bhante!|| ||

Seyyathā pi bho Gotama nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya,||
'cakkhu-manto rūpāni dakkhintī' ti,||
evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

Abhayarāja-kumārasuttaɱ aṭṭhamaɱ


Contact:
E-mail
Copyright Statement