Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Majjhima Nikāya
III. Upari Paṇṇāsa
2. Anupada Vagga

Sutta 116

Isigili Suttaɱ

Based on the 'Sri Lanka Buddha Jayanti Tripitaka Series.'

 


 

[1][chlm][pts][piya][upal] Evaɱ me sutaɱ:|| ||

Ekaɱ samayaɱ Bhagavā Rājagahe viharati Isigilismiɱ pabbate.|| ||

Tatra kho Bhagavā bhikkhū āmantesi Bhikkhavo ti, Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

Passatha no tumhe bhikkhave, etaɱ vebhāraɱ pabbatanti.|| ||

Evaɱ bhante.|| ||

Etassapi kho bhikkhave, vebhārassa pabbatassa aññāva samaññā ahosi aññā paññatti, passatha no tumhe bhikkhave, etaɱ paṇḍavaɱ pabbatanti.|| ||

Evaɱ bhante.|| ||

Etassa pi kho bhikkhave, paṇḍavassa pabbatassa aññāva samaññā ahosi aññā paññatti.|| ||

Passatha no tumhe bhikkhave, etaɱ vepullaɱ pabbatanti.|| ||

Evaɱ bhante.|| ||

Etassapi kho bhikkhave, vepullassa pabbatassa aññāva samaññā ahosi aññā paññatti.|| ||

Passatha no tumhe bhikkhave, etaɱ Gijjhakūṭaɱ pabbatanti.|| ||

Evaɱ bhante.|| ||

Etassapi kho bhikkhave, Gijjhakūṭassa pabbatassa aññāva samaññā ahosi aññā paññatti.|| ||

Passatha no tumhe bhikkhave, imaɱ isagiliɱ pabbatanti.|| ||

Evaɱ bhante.|| ||

Imassa kho bhikkhave, Isigilissa pabbatassa esāva samaññā ahosi esā paññatti.|| ||

Bhūtapubbaɱ bhikkhave, pañca paccekaBuddhasatāni imasmiɱ Isigilismiɱ pabbate ciranivāsino ahesuɱ.|| ||

Te imaɱ pabbataɱ pavisantā dissanti, paviṭṭhā na dissanti.|| ||

Tamena1 manussā disvā evam āhaɱsu: 'ayaɱ pabbato ime isī gilatī'ti Isigili isigilītv'eva samaññā udapādi.|| ||

Ācikkhissāmi bhikkhave, paccekabuddhānaɱ nāmāni.|| ||

Kittayissāmi bhikkhave, paccekabuddhānaɱ nāmāni.|| ||

Desissāmi [69] bhikkhave, paccekabuddhānaɱ nāmāni.|| ||

Taɱ suṇātha, sādhukaɱ manasi karotha, bhāsissāmīti.|| ||

Evaɱ bhante' ti kho te bhikkhū Bhagavato paccassosuɱ.|| ||

Bhagavā etad avoca:|| ||

Ariṭṭho nāma bhikkhave, paccekasambuddho1 imasmiɱ Isigilismiɱ pabbate ciranivāsī ahosi.|| ||

Upariṭṭho nāma bhikkhave, paccekasambuddho imasmiɱ Isigilismiɱ pabbate ciranivāsī ahosi.|| ||

Tagarasikhī nāma bhikkhave, paccekasambuddho imasmiɱ Isigilismiɱ pabbate cīranivāsī ahosi.|| ||

Yasassī nāma bhikkhave, paccekasambuddho imasmiɱ Isigilismiɱ pabbate ciranivāsī ahosi.|| ||

Sudassano nāma bhikkhave, paccekasambuddho imasmiɱ Isigilismiɱ pabbate ciranivāsī ahosi.|| ||

Piyadassī nāma bhikkhave, paccekasambuddho imasmiɱ Isigilismiɱ pabbate ciranivāsī ahosi.|| ||

Gandhāro nāma bhikkhave, paccekasambuddho imasmiɱ Isigilismiɱ pabbate ciranivāsī ahosi.|| ||

Piṇḍolo nāma bhikkhave, paccekasambuddho imasmiɱ Isigilismiɱ pabbate ciranivāsī ahosi.|| ||

Upāsabho nāma bhikkhave, paccekasambuddho, imasmiɱ Isigilismiɱ pabbate ciranivāsī ahosi.|| ||

Nīto nāma bhikkhave, paccekasambuddho imasmiɱ Isigilismiɱ pabbate ciranivāsī ahosi.|| ||

Tatho nāma bhikkhave, paccekasambuddho imasmiɱ Isigilismiɱ pabbate ciranivāsī ahosi.|| ||

Sutavā nāma bhikkhave, paccekasambuddho imasmiɱ Isigilismiɱ pabbate ciranivāsī ahosi.|| ||

Bhāvitatto nāma bhikkhave, paccekasambuddho imasmiɱ Isigilismiɱ pabbate ciranivāsī ahosī ti.|| ||

Ye sattasārā anighā nirāsā||
Paccekamevajjhagamuɱ subodhiɱ,||
Tesaɱ visallānaɱ naruttamānaɱ||
Nāmāni me kittayato suṇātha.|| ||

Ariṭṭho upariṭṭho tagarasikhī yasassī||
Sudassano piyadassī ca buddho,||
Gandhāro piṇḍolo upāsabho ca||
Nīto tatho Sutavā bhāvitatto.|| ||

[70] Sumbho subho methulo aṭṭhamo ca||
Athassu megho anīgho sudāṭho,||
Paccekabuddhā bhavanettikhīṇā||
Hiŋgu ca hiŋgo ca mahānubhāvā.|| ||

Dve jālino munino aṭṭhako ca||
Atha kosalo buddho atho subāhu,||
Upanemiso nemiso santacitto||
Sacco tatho virajo paṇḍito ca.|| ||

Kālupakālā vijito jito ca||
Aŋgo ca paŋgo ca gutijjito1 ca,||
Passī jahī upadhiɱ dukkhamūlaɱ||
Aparājito mārabalaɱ ajesi.|| ||

Satthā pavattā sarabhaŋgo lomahaɱso||
Uccaŋgamāyo asito anāsavo,||
Manomayo mānacjido ca bandhumā||
Tadādhimutto vimalo ca ketumā.|| ||

Ketumbarāgo ca mātaŋgo ariyo||
Athaccuto accutagāmabyāmako,||
Sumaŋgalo dabbilo suppatiṭṭhito||
Asayho khemabhirato ca sorato.|| ||

Dūrannayo saŋgho athopi uccayo||
Aparo munī sayho anomanikkamo,||
Ānandanando upanando dvādasa||
Bhāradvājo antimadehadhārī.|| ||

Bodhi Mahānāmo athopi uttaro||
Kesī sikhī sundaro bhāradvājo||
Tissūpatissā bhavabandhanacjidā||
Upasīdarī taṇhacjido ca sīdarī10.|| ||

Buddho ahū maŋgalo vītarāgo||
Usabhacjidā jāliniɱ dukkhamūlaɱ,||
Santaɱ padaɱ ajjhagamūpanīto.||
Uposatho sundaro saccanāmo.|| ||

Jeto jayanto padumo uppalo ca||
Padumuttaro rakkhito pabbato||
[71] ca,||
Mānatthaddho sobhito vītarāgo||
Kaṇho ca buddho suvimutta-citto.|| ||

Ete ca aññe ca mahānubhāvā||
Paccekabuddhā bhavanettīkhīṇā.||
Te sabbasaŋgātigate mahesī||
Parinibbute vandatha appameyye' ti.|| ||

Isigilisuttaɱ jaṭṭhaɱ


 

Contact:
E-mail
Copyright Statement   Webmaster's Page