Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

Saɱyutta Nikāya
I. Sagātha Vagga
1. Devatā-Saɱyutta
III. Satti Vagga

Adapted from the 1995 edition of the digital version of the
Sri Lanka Buddha Jayanti Tripitaka Series.

 


 

Sutta 21

Satti Suttaɱ

[21.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

[13] Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Sattiyā viya omaṭṭho ḍayhamānova matthake,||
Kāmarāgappahāṇāya sato bhikkhu paribbaje'ti.|| ||

(Bhagavā:)||
Sattiyā viya omaṭṭho ḍayhamānova matthake,||
Sakkāyadiṭṭhippahāṇāya sato bhikkhu paribbaje' ti.|| ||

 


 

Sutta 22

Phusati Suttaɱ

[22.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Nāphusantaɱ phusati ca phusantaɱ ca tato phuse,||
Tasmā phusantaɱ phusati appaduṭṭhappadosinanti.|| ||

(Bhagavā:)||
Yo appaduṭṭhassa narassa dussati,||
Suddhassa posassa anaŋgaṇassa,||
Tameva bālaɱ pacceti pāpaɱ,||
Sukhumo rajo paṭivātaɱva khitto' ti.|| ||

 


 

Sutta 23

Jaṭā Suttaɱ

[23.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavantaɱ gāthāya ajjhabhāsi:|| ||

Anto jaṭā bahi jaṭā jaṭāya jaṭitā pajā,||
Taɱ taɱ Gotama pucchāmi ko imaɱ vijaṭaye jaṭanti.|| ||

(Bhagavā:)||
Sīle patiṭṭhāya naro sapañño cittaɱ paññañ ca bhāvayaɱ,||
Ātāpi nipako bhikkhu so imaɱ vijaṭaye jaṭanti.|| ||

Yesaɱ rāgo ca doso ca avijjā ca virājitā,||
Khīṇāsavā arahanto tesaɱ vijaṭitā jaṭā.|| ||

Yattha nāmañ ca rūpañ ca asesaɱ uparujjhati,||
Paṭighaɱ rūpasaññā ca etthesā chijjate jaṭāti.|| ||

 


 

Sutta 24

Manonivāraṇa Suttaɱ

[24.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

[14] Yato yato mano nivāraye||
Na dukkhameti naɱ tato tato,||
Sa sabbato manonivāraye||
Sa sabbato dukkhā pamuccatī ti.|| ||

(Bhagavā:)||
Na sabbato mano nivāraye||
Mano yatattamāgataɱ,||
Yato yato ca pāpakaɱ||
Tato tato mano nivāraye' ti.|| ||

 


 

Sutta 25

Arahanta Suttaɱ

[25.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Yo hoti bhikkhu arahaɱ katāvī||
Khīṇāsavo antimadehadhārī||
Ahaɱ vadāmīti pi so vadeyya||
Mamaɱ vadantīti pi so vadeyyāti.|| ||

(Bhagavā:)||
Yo hoti bhikkhu arahaɱ katāvī||
Khīṇāsavo antimadehadhārī,||
Ahaɱ vadāmīti pi so vadeyya||
Mamaɱ vadantīti pi so vadeyya||
Loke samaññaɱ kusalo viditvā,||
Vohāramattena so vohareyyāti.|| ||

(Devatā:)||
Yo hoti bhikkhu arahaɱ katāvī||
Khīṇāsavo antimadehadhārī,||
Mānaɱ nu kho so upagamma bhikkhu||
Ahaɱ vadāmīti pi so vadeyya||
Mamaɱ vadantīti pi so vadeyyāti.|| ||

(Bhagavā:)||
Pahīṇamānassa na santi ganthā||
Vidhūpitā mānaganthassa sabbe,||
So vītivatto maññanaɱ1 su medho||
[15] Ahaɱ vadāmīti pi so vadeyya||
Mamaɱ vadantī ti pi so vadeyya,||
Loke samaññaɱ kusalo viditvā||
Vohāramattena so vohareyyā' ti.|| ||

 


 

Sutta 26

Pajjota Suttaɱ

[26.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavato santike imaɱ gāthaɱ abhāsi:|| ||

Kati lokasmiɱ pajjotā yehi loko pakāsati,||
Bhagavantaɱ puṭṭhumāgamma kathaɱ jānemu taɱ mayaɱ.|| ||

Cattāro loke pajjotā pañcamettha na vijjati,||
Divā tapati ādicco rattiɱ ābhāti candimā,||
Atha aggi divārattiɱ tattha tattha pakāsati,||
Sambuddho tapataɱ seṭṭho esā ābhā anuttarā' ti.|| ||

 


 

Sutta 27

Sara Suttaɱ

[27.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavantaɱ gāthāya ajjhabhāsi.|| ||

Kuto sarā nivattanti kattha vaṭṭaɱ na vattati,||
Kattha nāmañ ca rūpañ ca asesaɱ uparujjhatī ti.|| ||

(Bhagavā:)||
Yattha āpo ca paṭhavī tejo vāyo na gādhati,||
Ato sarā nivattanti ettha vaṭṭaɱ na vattati,||
Ettha nāmañ ca rūpañ ca asesaɱ uparujjhatī' ti.|| ||

 


 

Sutta 28

Mahaddhana Suttaɱ

[28.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eka-m-antaɱ ṭhitā kho sā devatā Bhagavantaɱ gāthāya ajjhabhāsi:|| ||

Mahaddhanā mahābhogā raṭṭhavanto pi khattiyā,||
Aññamaññābhigijjhanti kāmesu analaŋkatā||
Tesu ussukkajātesu bhavasotānusārisu,||
Kedha taṇhaɱ pajahiɱsu ke lokasmiɱ anussukāti|| ||

(Bhagavā:)||
Hitvā agāraɱ pabbajitā hitvā puttaɱ pasuɱ piyaɱ||
Hitvā rāgañ ca dosañ ca avijjañ ca virājiya||
Khīṇāsavā arahanto te lokasmiɱ anussukā' ti.|| ||

 


 

Sutta 29

Catucakka Suttaɱ

[29.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

(Devatā:)||
[16] Catucakkaɱ navadvāraɱ puṇṇaɱ lobhena saɱyutaɱ,||
Paŋkajātaɱ mahāvīra kathaɱ yātrā bhavissati.|| ||

(Bhagavā:)||
Chetvā naddhiɱ varattañ ca icchālobhañ ca pāpakaɱ,||
Samūlaɱ taṇhaɱ abbuyha evaɱ yātrā bhavissatī' ti.|| ||

 


 

Sutta 30

Eṇijaŋgha Suttaɱ

[30.1][pts][bodh] Evam me sutaɱ ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Eṇijaŋghaɱ kisaɱ vīraɱ appāhāraɱ alolupaɱ,||
Sīhaɱ vekacaraɱ nāgaɱ kāmesu anapekkhinaɱ,||
Upasaŋkamma pucchāma kathaɱ dukkhā pamuccatī ti.|| ||

(Bhagavā:)||
Pañcakāmaguṇā loke manochaṭṭhā paveditā,||
Ettha chandaɱ virāchetvā evaɱ dukkhā pamuccatī ti.|| ||

Sattivaggo tatiyo.

 


Contact:
E-mail
Copyright Statement   Webmaster's Page