Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta-Nikāya,
Nidāna-vaggo

15. Anamatagga Saŋyuttam

Sutta 6

Sāsapa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Atha kho aññataro bhikkhū yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhū Bhagavantaɱ etad avoca:|| ||

"Kiɱ va dīgho nu kho bhante, kappo" ti?|| ||

"Dīgho kho bhikkhu, kappo.|| ||

So na sukaro saŋkhātuɱ||
ettakāni vassāni iti vā,||
ettakāni vassasatāni iti vā,||
ettakāni vassasahassāni iti vā,||
ettakāni vassasatasahassāni iti vā" ti.|| ||

"Sakkā pana bhante, upamaɱ kātun" ti?|| ||

"Sakkā bhikkhū" ti Bhagavā avoca.|| ||

"Seyyathā pi bhikkhu, āyasaŋ nagaraɱ||
yojanaɱ āyāmena||
yojanaɱ vitthārena||
yojanaɱ ubbedhena,||
puṇṇaɱ sāsapānaɱ cūlikābaddaɱ,||
tato puriso vassasatassa vassasatassa accayena ekamekaɱ sāsapaɱ uddhareyya.|| ||

Khippataraɱ kho so bhikkhu,||
mahāsāsaparāsi iminā upakkamena parikkhayaɱ pariyādānaɱ gaccheyya,||
na tv eva kappo.|| ||

Evaɱ dīgho kho bhikkhu, kappo.|| ||

Evaɱ dīghānaɱ kho bhikkhu, kappānaɱ neko kappo saŋsito nekaɱ kappasataɱ saŋsitaɱ,||
nekaɱ kappasahassaŋ saŋsitaɱ,||
nekaɱ kappasata-sahassaŋ saŋsitaɱ.|| ||

Taɱ kissa hetu?|| ||

Anamataggoyaɱ bhikkhave, saŋsāro.|| ||

Pubbā koṭi na paññāyati avijjānīvaraṇānaɱ sattānaɱ taṇhā saŋyojanānaɱ sandhāvataɱ saŋsarataɱ.|| ||

Yāvañ c'idaɱ bhikkhave,||
alam eva sabba sankhāresu nibbindituɱ,||
alaɱ virajjituɱ,||
alaɱ vimuccitun" ti.|| ||


Contact:
E-mail
Copyright Statement   Webmaster's Page