Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
3. Khandha Vagga
22. Khandha Saɱyutta
1. Nakulapita Vagga

Sutta 5

Samādhi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than][bodh][olds] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho Bhagavā bhikkhū āmantesi Bhikkhavo ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

Samādhiɱ bhikkhave, bhāvetha.||
samāhito bhikkhave,||
bhikkhu yathābhūtaɱ pajānāti.|| ||

3. Kiñ ca yathābhūtaɱ pajānāti?|| ||

Rūpassa samudayañ ca atthagamañ ca,||
vedanāya samudayañ ca atthagamañ [14] ca,||
saññāya samudayañ ca atthagamañ ca,||
saɱkhārānaɱ samudayañ ca atthagamañ ca,||
viññāṇassa samudayañ ca atthagamañ ca.|| ||

4. Ko ca bhikkhave, rūpassa samudayo,||
ko vedanāya samudayo,||
ko saññāya samudayo,||
ko saɱkhārānaɱ samudayo,||
ko viññāṇassa samudayo:|| ||

5. Idha, bhikkhave, abhinandati abhivadati ajjhosāya tiṭṭhati.|| ||

Kiñca abhinandati abhivadati ajjhosāya tiṭṭhati:|| ||

6. Rūpaɱ abhinandati abhivadati ajjhosāya tiṭṭhati,||
tassa rūpaɱ abhinandato abhivadato ajjhosāya tiṭṭhato uppajjati nandi.|| ||

Yā rūpe nandi tad upādānaɱ||
tassūpādānapaccayā bhavo,||
bhava-paccayā jāti,||
jāti-paccayā jarā-maraṇaɱ||
soka-parideva-dukkha-domanass'-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

7. Vedanaɱ abhinandati abhivadati ajjhosāya tiṭṭhati||
tassa vedanaɱ abhinandato abhivadato ajjhosāya tiṭṭhato uppajjati nandi.|| ||

Yā vedanāya nandi tadupādānaɱ, tassupādāna-paccayā bhavo,||
bhava-paccayā jāti,||
jāti-paccayā jarā-maraṇaɱ||
soka-parideva-dukkha-domanass'-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

8. Saññaɱ abhinandati abhivadati ajjhosāya tiṭṭhati.||
Tassa saññaɱ abhinandato abhivadato ajjhosāya tiṭṭhato uppajjati nandi.|| ||

Yā saññāya nandi tadupādānaɱ, tassupādāna-paccayā bhavo,||
bhava-paccayā jāti,||
jāti-paccayā jarā-maraṇaɱ||
soka-parideva-dukkha-domanass'-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

9. Sankhāre abhinandati abhivadati ajjhosāya tiṭṭhati||
tassa saɱkhāre abhinandato abhivadato ajjhosāya tiṭṭhato uppajjati nandi.|| ||

Yā sankhāresu nandi tadupādānaɱ, tassupādāna-paccayā bhavo,||
bhava-paccayā jāti,||
jāti-paccayā jarā-maraṇaɱ||
soka-parideva-dukkha-domanass'-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

10. Viññāṇaɱ abhinandati abhivadati ajjhosāya tiṭṭhati.||
Tassa viññāṇaɱ abhinandato abhivadato ajjhosāya tiṭṭhato uppajjati nandi.|| ||

Yā viññāṇe nandi tadupādānaɱ, tassupādāna-paccayā bhavo,||
bhava-paccayā jāti,||
jāti-paccayā jarā-maraṇaɱ||
soka-parideva-dukkha-domanass'-upāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

11. Ayaɱ bhikkhave, rūpassa samudayo,||
ayaɱ vedanāya samudayo,||
ayaɱ saññāya samudayo,||
ayaɱ saɱkhārānaɱ samudayo,||
ayaɱ viññāṇassa samudayo.|| ||

12. Ko ca bhikkhave, rūpassa atthagamo,||
ko vedanāya atthagamo,||
ko saññāya atthagamo,||
ko saɱkhārānaɱ atthagamo,||
ko viññāṇassa atthagamo.|| ||

Idha, bhikkhave,, bhikkhu nābhinandati nābhivadati nājjhosāya tiṭṭhati.|| ||

Kiñca nābhinandati nābhivadati nājjhosāya tiṭṭhati:|| ||

13. Rūpaɱ nābhinandati nābhivadati nājjhosāya tiṭṭhati,||
tassa rūpaɱ anabhinandato anabhivadato anajjhosāya tiṭṭhato yā rūpe nandi sā nirujjhati|| ||

Tassa nandinirodhā upādānanirodho,||
upādānanirodhā bhavanirodho,||
bhavanirodhā jātinirodho,||
jātinirodhā jarā-maraṇaɱ||
soka-parideva-dukkha-domanass'-upāyāsā nirujjhanti.|| ||

Evam etassa kevalassa dukkhakkhandhassa nirodho hoti.|| ||

14. Vedanaɱ nābhinandati nābhivadati nājjhosāya tiṭṭhati||
tassa vedanaɱ anabhinandato anabhivadato anaj- [15] jhosāya tiṭṭhato yā vedanāya nandi sā nirujjhati.|| ||

Tassa nandinirodhā upādānanirodho,||
upādānarodhā bhavanirodho,||
bhavanirodhā jātinirodho,||
jātinirodhā jarā-maraṇaɱ||
soka-parideva-dukkha-domanass'-upāyāsā nirujjhanti.|| ||

Evam etassa kevalassa dukkhakkhandhassa nirodho hoti.|| ||

15. Saññaɱ nābhinandati nābhivadati nājjhosāya tiṭṭhati.||
tassa saññaɱ anabhinandato anabhivadato anajjhosāya tiṭṭhato yā saññāya nandi sā nirujjhati.|| ||

Tassa nandinirodhā upādānanirodho,||
upādānanirodhā bhavanirodho,||
bhavanirodhā jātinirodho,||
jātinirodhā jarā-maraṇaɱ||
soka-parideva-dukkha-domanass'-upāyāsā nirujjhanti.|| ||

Evam etassa kevalassa dukkhakkhandhassa nirodho hoti.|| ||

16. Saɱkhāre nābhinandati nābhivadati nājjhosāya tiṭṭhati,||
tassa saɱkhāre anabhinandato anabhivadato anajjhosāya tiṭṭhato yā saɱkhāresu nandi sā nirujjhati.|| ||

Tassa nandinirodhā upādānanirodho,||
upādānirodhā bhavanirodho,||
bhavanirodhā jātinirodho,||
jātinirodhā jarā-maraṇaɱ||
soka-parideva-dukkha-domanass'-upāyāsā nirujjhanti.|| ||

Evam etassa kevalassa dukkhakkhandhassa nirodho hoti.|| ||

17. Viññāṇaɱ nābhinandati nābhivadati nājjhosāya tiṭṭhati||
tassa viññāṇaɱ anabhinandato anabhivadato anajjhosāya tiṭṭhato yā viññāṇe nandi sā nirujjhati.|| ||

Tassa nandinirodhā upādānanirodho,||
upādānirodhā bhavanirodho||
bhavanirodhā jātinirodho,||
jātinirodhā jarā-maraṇaɱ||
soka-parideva-dukkha-domanass'-upāyāsā nirujjhanti.|| ||

Evam etassa kevalassa dukkhakkhandhassa nirodho hoti.|| ||

18. Ayaɱ bhikkhave, rūpassa atthagamo,||
ayaɱ vedanāya atthagamo,||
ayaɱ saññāya atthagamo,||
ayaɱ saɱkhārānaɱ atthagamo,||
ayaɱ viññāṇassa atthagamo ti.|| ||

 


Contact:
E-mail
Copyright Statement   Webmaster's Page