Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
III. Khandha Vagga:
22: Khandha Saɱyutta
2.3. Khajjaniya Vagga

Sutta 78

Sīhopama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[84]

[1][pts][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

"Sīho bhikkhave, migarājā sāyaṇhasamayaɱ āsayā nikkhamati,||
āsayā nikkhamitvā vijambhati,||
vijambhitvā samantā catuddisā anuviloketi,||
samantā catuddisā anuviloketvā tikkhattuɱ sīhanādaɱ nadati,||
tikkhattuɱ sīhanādaɱ naditvā gocarāya pakkamati.|| ||

[85] Ye keci bhikkhave, tiracchānagatā pāṇā sīhassa migarañño nadato saddaɱ suṇanti,||
yebhuyyena bhayaɱ santāsaɱ saɱvegaɱ āpajjanti,||
bilaɱ bilāsayā pavisanti,||
dakaɱ dakāsayā pavisanti,||
vanaɱ vanāsayā pavisanti,||
ākāsaɱ pakkhino bhajanti.|| ||

Yepi te bhikkhave, rañño nāgā gāmanigamarājadhānīsu daḷhehi carattehi baddhā,||
te pi tāni bandhanāni sañchinditvā sampadā'etvā bhītā muttakarīsaɱ cajamānā yena vā tena vā palāyanti.|| ||

Evaɱ mahiddhiko kho bhikkhave,||
sīho migarājā tiracchānagatānaɱ pāṇānaɱ||
evaɱ mahesakkho||
evaɱ mahānubhāvo.|| ||

Evam eva kho bhikkhave, yadā Tathāgato loke uppajjati arahaɱ Sammā-sambuddho vijjā-caraṇa-sampanno sugato lokavidu anuttaro purisa-damma-sārathī satthā deva-manussānaɱ buddho Bhagavā, so dhammaɱ deseti:|| ||

Iti rūpaɱ,||
iti rūpassa samudayo,||
iti rūpassa atthaŋgamo.|| ||

Iti vedanā||
iti vedanassa samudayo,||
iti vedanassa atthagamo.|| ||

Iti saññā,||
iti saññassa samudayo,||
iti saññassa atthaŋgamo.|| ||

Iti sankhārā||
iti sankhārassa samudayo,||
iti sankhārassa atthaŋgamo.|| ||

Iti viññāṇaɱ||
iti viññāṇassa samudayo,||
iti viññāṇassa atthaŋgamo.|| ||

Yepi te bhikkhave, devā dīghayukā vaṇṇavanto sukhabahulā uccesu vimānesu ciraṭṭhitikā,||
te pi Tathāgatassa dhammadesanaɱ sutvā yebhuyyena bhayaɱ santāsaɱ saɱvegaɱ āpajjanti.|| ||

Aniccāva kira bho mayaɱ samānā nicc'amhāti amaññimha,||
addhuvāva kira bho mayaɱ samānā dhuvambhāti amaññimha,||
mayaɱ pi kira bho aniccā addhuvā asassatā sakkāyapariyāpannāti.|| ||

Evaɱ mahiddhiko kho bhikkhave, Tathāgato sadevakassa lokassa evaɱ mahesakkho evaɱ mahānubhāvo" ti.|| ||

Idam avoca Bhagavā idaɱ vatvā sugato athāparaɱ etad avoca satthā:|| ||

[86] yadā buddho abhiññāya dhammacakkaɱ pavattayi||
Sadevakassa lokassa satthā appaṭipuggalo,|| ||

Sakkāyañ ca nirodhañca sakkāyassa ca sambhavaɱ||
Ariyaɱ caṭṭhaŋgikaɱ maggaɱ dukkhūpasamagāminaɱ,|| ||

Yepi dīghāyukā devā vaṇṇavanto yasassino||
Bhītā santāsamāpāduɱ sīhassevitare migā.|| ||

Avītivattā sakkāyaɱ aniccā kira bho mayaɱ||
Sutvā arahato vākyaɱ vippamuttassa tādino" ti.|| ||

 


Contact:
E-mail
Copyright Statement   Webmaster's Page