Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya
4. Saḷāyatana Vagga
35. Saḷāyatana Saɱyutta
§ III: Paññāsaka Tatiya
3. Gahapati Vagga

Sutta 132

Lohicca Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[116]

[1][pts][bodh] Evaɱ me sutaɱ:|| ||

Ekaɱ samayaɱ āyasmā Mahā Kaccāno Avantīsu viharati||
Makkarakaṭe Arañña-kuṭikāyaɱ.|| ||

[117] Atha kho Lohiccassa brāhmaṇassa sambahulā||
antevāsikā||
kaṭṭhahārakā||
māṇavakā||
yen'āyasmato Mahā Kaccānassa arañña-kuṭikā ten'upasankamiɱsu.|| ||

Upasankamitvā parito parito kuṭikāya anucaŋkamanti anuvicaranti uccā-saddā mahā-saddā kānici kānici selissakāni karontā.|| ||

Ime pana muṇḍakā samaṇakā ibbhā kiṇhā bandhu-pād'āpaccā,||
imesaɱ bharatakānaɱ sakkatā garukatā mānitā pūjitā apacitāti.|| ||

Atha kho āyasmā Mahā Kaccāno vihārā ni-k-khamitvā te māṇavake etad avoca:|| ||

"Mā vo māṇavakā saddam akattha,||
dhammaɱ vo bhāsissāmīti.|| ||

Evaɱ vutte te māṇavakā tuṇhī ahesuɱ.|| ||

Atha kho āyasmā Mahā Kaccāno te māṇavake gāthāhi ajjhabhāsi.|| ||

'Siluttamā pubbatarā ahesuɱ||
Te brāhmaṇā ye purāṇaɱ sarantī||
Guttāni dvārāni surakkhitāni||
Ahesuɱ tesaɱ Abhibhuyya ko'dhaɱ.|| ||

Dhamme ca jhāne ca ratā ahesuɱ||
Te brāhmaṇā ye purāṇaɱ saranti||
Ime ca vokkamma japāmaseti||
Gottena mattā visamaɱ caranti|| ||

Kodhābhibhūtā puthu attadaṇḍā||
Virajjhamānā tasathāvaresu||
Agutta-dvārassa bhavanti moghā||
Supin'eva laddhaɱ purisassa vittaɱ|| ||

[118] Anāsakā thaṇḍilasāyikā ca||
Pāto sitānañ ca tayo ca vedā.||
Kharājinaɱ jaṭā paŋko||
mantā sīla-b-bataɱ tapo|| ||

Kuhanā vaŋkaɱ daṇḍā ca||
udakā ca manāni ca||
Vaṇṇā ete brāhmaṇānaɱ||
kata kiñcikkhabhāvanā.|| ||

Cittaɱ ca susamāhitaɱ||
vi-p-pasannam anāvilaɱ||
Akhilaɱ sabbabhutesu||
so Maggo brahmapattiyā' ti.|| ||

Atha kho te māṇavakā kupitā anattamanā yena Lohicco brāhmaṇo ten'upasankamiɱsu.|| ||

Upasaŋkamitvā Lohiccaɱ brāhmaṇaɱ etad avocuɱ:|| ||

"Yagghe bhavaɱ jāneyya samaṇo Mahā Kaccāno brāhmaṇānaɱ mante ekaɱ-sena apavadati paṭikkosatī" ti.|| ||

Evaɱ vutte Lohicco brāhmaṇo kupito ahosi anatta-mano.|| ||

Atha kho Lohiccassa brāhmaṇassa etad ahosi:|| ||

"Na kho pana me taɱ patirūpaɱ yo haɱ aññadatthu māṇavakānaɱ yeva sutvā samaṇaɱ Mahā Kaccānaɱ akkoseyyaɱ paribhāseyyaɱ||
yaɱ nūnāhaɱ upasankamitvā puccheyyan" ti.|| ||

Atha kho Lohicco brāhmaṇo tehi māṇavakehi saddhiɱ yen'āyasmā Mahā Kaccāno ten'upasankami.|| ||

Upasaŋka- [119] mitvā āyasmatā Mahā Kaccānena saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho Lohicco brāhmaṇo āyasmantaɱ Mahā Kaccānaɱ etad avoca:|| ||

"Āgamaɱsu nu khvidha bho Kaccāna,||
amhākaɱ sambahūlā antevāsikā kaṭṭhahārakā māṇavakā" ti?|| ||

"Āgamaɱsu khvidha te brāhmaṇa sambahulā antevāsikā kaṭṭhahārakā māṇavakā" ti?|| ||

"Ahu pana bhoto Kaccānassa tehi māṇavakehi saddhiɱ kocid eva kathā-sallāpo" ti?|| ||

"Ahu kho me brāhmaṇa tehi māṇavakehi saddhiɱ kocid eva kathā-sallāpo" ti.|| ||

"Yathā katham pana bhoto Kaccānassa tehi māṇavakehi saddhiɱ ahosi kathā-sallāpo" ti?|| ||

Evaɱ kho me brāhmaṇa tehi māṇavakehi saddhiɱ ahosi kathā sallāpo.|| ||

Siluttamā pubbatarā ahesuɱ||
Te brāhmaṇā, ye purāṇaɱ sarantī||
Guttāni dvārāni surakkhitāni||
Ahesuɱ tesaɱ Abhibhuyya ko'dhaɱ.|| ||

Dhamme ca jhāne ca ratā ahesuɱ||
Te brāhmaṇā ye purāṇaɱ saranti||
Ime ca vokkamma japāmaseti||
Gottena mattā visamaɱ caranti|| ||

Kodhābhibhūtā puthu attadaṇḍā||
Virajjhamānā tasathāvaresu||
Agutta-dvārassa bhavanti moghā||
Supin'eva laddhaɱ purisassa vittaɱ|| ||

Anāsakā thaṇḍilasāyikā ca||
Pāto sitānañ ca tayo ca vedā.||
Kharājinaɱ jaṭā paŋko||
mantā sīla-b-bataɱ tapo|| ||

Kuhanā vaŋkaɱ daṇḍā ca||
udakā ca manāni ca||
Vaṇṇā ete brāhmaṇānaɱ||
kata kiñcikkhabhāvanā.|| ||

Cittaɱ ca susamāhitaɱ||
vi-p-pasannam anāvilaɱ||
Akhilaɱ sabbabhutesu||
so Maggo brahmapattiyā' ti.|| ||

Evaɱ kho me brāhmaṇa tehi māṇavakehi saddhiɱ ahosi kathā sallāpoti:|| ||

"Agutta-dvāro" ti bhavaɱ Kaccāno āha|| ||

"Kittāvatā nu kho bho Kaccāna,||
agutta-dvāro hotī" ti?|| ||

"Idha brāhmaṇa ekacco cakkhunā rūpaɱ disvā piyarūpe rūpe adhimuccati,||
appiya-rūpe rūpe vyāpajjati,||
anupaṭṭhitaya sati ca viharati parittacetaso,||
tañ ca ceto-vimuttiɱ||
[120] paññā-vimuttiɱ yathā-bhūtaɱ na-p-pajānāti||
yatth'assa te uppannā pāpakā akusalā dhammā aparisesā na nirujjhanti.|| ||

Sotena saddaɱ sutvā piyarūpe sadde adhimuccati,||
appiya-rūpe sadde vyāpajjati||
anupaṭṭhitakāya sati ca viharati parittacetaso,||
tañ ca ceto-vimuttiɱ paññā-vimuttiɱ yathā-bhūtaɱ na-p-pajānāti||
yatth'assa te uppannā pāpakā akusalā dhammā aparisesā na nirujjhanti.|| ||

Ghānena gandhaɱ gāyitvā piyarūpe gandhe adhimuccati,||
appiya-rūpe gandhe vyāpajjati||
anupaṭṭhitakāya sati ca viharati parittacetaso,||
tañ ca ceto-vimuttiɱ paññā-vimuttiɱ yathā-bhūtaɱ na-p-pajānāti||
yatth'assa te uppannā pāpakā akusalā dhammā aparisesā na nirujjhanti.|| ||

Jivhāya rasaɱ sāyitvā piyarūpe rase adhimuccati,||
appiya-rūpe rase vyāpajjati||
anupaṭṭhitakāya sati ca viharati parittacetaso,||
tañ ca ceto-vimuttiɱ paññā-vimuttiɱ yathā-bhūtaɱ na-p-pajānāti||
yatth'assa te uppannā pāpakā akusalā dhammā aparisesā na nirujjhanti.|| ||

Kāyena phoṭṭhabbaɱ phusitvā piyarūpe phoṭṭhabbe adhimuccati,||
appiya-rūpe phoṭṭhabbe vyāpajjati||
anupaṭṭhitakāya sati ca viharati parittacetaso,||
tañ ca ceto-vimuttiɱ paññā-vimuttiɱ yathā-bhūtaɱ na-p-pajānāti||
yatth'assa te uppannā pāpakā akusalā dhammā aparisesā na nirujjhanti.|| ||

Manasā dhammaɱ viññāya piyarūpe dhamme adhimuccati,||
appiya-rūpe dhamme vyāpajjati||
anupaṭṭhitakāya sati ca viharati parittacetaso,||
tañ ca ceto-vimuttiɱ paññā-vimuttiɱ yathā-bhūtaɱ na-p-pajānāti||
yatth'assa te uppannā pāpakā akusalā dhammā aparisesā na nirujjhanti.|| ||

Evaɱ kho brāhmaṇa, agutta-dvāro hotī" ti.|| ||

"Acchariyaɱ bho Kaccāna,||
abbhutaɱ bho Kaccāna,||
yāvañ cidaɱ bhotā Kaccānena agutta-dvāro va samāno gutta-dvāro ti akkhāto."|| ||

"'Guttadvāro gutta-dvāro' ti bhavaɱ Kaccāno āha||
kittāvatā nu kho bho Kaccāna gutta-dvāro hotī" ti?|| ||

Idha brāhmaṇa bhikkhu cakkhunā rūpaɱ disvā piyarūpe rūpe nādhi-muccati,||
appiya-rūpe rūpe na vyāpajjati,||
uppaṭṭhita sati ca viharati appamāṇacetaso,||
tañ ca ceto-vimuttiɱ paññā-vimuttaɱ yathā-bhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Sotena saddaɱ sutvā piyarūpe sadde nādhi-muccati,||
appiya-rūpe sadde na vyāpajjati,||
uppaṭṭhita sati ca viharati appamāṇacetaso,||
tañ ca ceto-vimuttiɱ paññā-vimuttiɱ yathā-bhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Ghānena gandhaɱ gāyitvā piyarūpe gandhe nādhi-muccati,||
appiya-rūpe gandhe na vyāpajjati,||
uppaṭṭhita sati ca viharati appamāṇacetaso,||
tañ ca ceto-vimuttiɱ paññā-vimuttaɱ yathā-bhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Jivhāya rasaɱ sāyitvā piyarūpe rase nādhi-muccati,||
appiya-rūpe rase na vyāpajjati,||
uppaṭṭhita sati ca viharati appamāṇacetaso,||
tañ ca ceto-vimuttiɱ paññā-vimuttaɱ yathā-bhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Kāyena phoṭṭhabbaɱ phusitvā piyarūpe phoṭṭhabbe nādhi-muccati,||
appiya-rūpe phoṭṭhabbe na vyāpajjati,||
uppaṭṭhita sati ca viharati appamāṇacetaso,||
tañ ca ceto-vimuttiɱ paññā-vimuttaɱ yathā-bhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Manasā dhammaɱ viññāya piyarūpe dhamme nādhi-muccati,||
appiya-rūpe dhamme na vyāpajjati,||
uppaṭṭhita sati ca viharati appamāṇacetaso,||
tañ ca ceto-vimuttiɱ paññā-vimuttaɱ yathā-bhūtaɱ pajānāti||
yatth'assa te uppannā pāpakā akusalā dhammā aparisesā nirujjhanti.|| ||

Acchariyaɱ bho Kaccāna,||
abbhutaɱ bho Kaccāna, [121] yāvañ cidaɱ bhotā Kaccānena gutta-dvāro ca samāno gutta-dvāro akkhāto.|| ||

Abhikkantaɱ bho Kaccāna,||
abhikkantaɱ bho Kaccāna.|| ||

Seyyathā pi bho Kaccāna,||
nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya,||
andha-kāre vā tela-pajjotaɱ dhāreyya cakkhu-manto rūpāni dakkhintī ti|| ||

Evam eva bhotā Kaccānena aneka-pariyāyena dhammo pakāsito.|| ||

Es'āhaɱ bho Kaccāna, taɱ Bhagavantaɱ saraṇaɱ gacchāmi||
Dhammañ ca||
bhikkhu-sanghañ ca.|| ||

Upāsakaɱ maɱ bhavaɱ Kaccāno dhāretu ajja-t-agge pāṇupetaɱ saraṇaɱ gataɱ.|| ||

Yathā ca bhavaɱ Kaccāno Makkarakaṭe upāsakakulāni upasankamati,||
evam evaɱ Lohiccakulaɱ upasankamatu.|| ||

Tattha ye māṇavakā vā māṇavikā vā Bhagavantaɱ Kaccānaɱ abhivādessanti pacc'upaṭṭhissanti āsanaɱ vā udakaɱ vā dassanti tesaɱ taɱ bhavissati dīgha-rattaɱ hitāya sukhāyā" ti.|| ||

 


Contact:
E-mail
Copyright Statement