Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
IV. Saḷāyatana Vagga
35: Saḷāyatana Saɱyutta
Paññāsa Catutthaɱ
4. Āsīvisa Vagga

Sutta 205

Vīṇopama Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[195]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Tatra kho bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū bhagavato paccassosuɱ.|| ||

3. Bhagavā etad avoca:|| ||

"Yassa kassa ci bhikkhave bhikkhussa vā bhikkhuniyā vā cakkhu-viññeyyesu rūpesu uppajjeyya||
chando vā||
rāgo vā||
doso vā||
moho vā||
paṭighaɱ vā cetaso,||
tato cittaɱ nivāraye.|| ||

Sabhayo ceso maggo||
sappaṭibhayo ca||
sakaṇṭako ca||
sagahano ca||
ummaggo ca||
kummaggo ca||
dubhitiko ca,||
asappurisasevito ceso maggo||
na ceso maggo sappurisehi sevito,||
na tvaɱ arahasīti tato cittaɱ||
nivāraye cakkhu-viññeyyehi rūpehi.|| ||

Yassa kassa ci bhikkhave bhikkhussa vā bhikkhuniyā vā sota-viññeyyesu saddesu uppajjeyya||
chando vā||
rāgo vā||
doso vā||
moho vā||
paṭighaɱ vā cetaso,||
tato cittaɱ nivāraye.|| ||

Sabhayo ceso maggo||
sappaṭibhayo ca||
sakaṇṭako ca||
sagahano ca||
ummaggo ca||
kummaggo ca||
dubhitiko ca,||
asappurisasevito ceso maggo||
na ceso maggo sappurisehi sevito,||
na tvaɱ arahasīti tato cittaɱ||
nivāraye sota-viññeyyehi saddehi.|| ||

Yassa kassa ci bhikkhave bhikkhussa vā bhikkhuniyā vā ghāna-viññeyyesu gandhesu uppajjeyya||
chando vā||
rāgo vā||
doso vā||
moho vā||
paṭighaɱ vā cetaso,||
tato cittaɱ nivāraye.|| ||

Sabhayo ceso maggo||
sappaṭibhayo ca||
sakaṇṭako ca||
sagahano ca||
ummaggo ca||
kummaggo ca||
dubhitiko ca,||
asappurisasevito ceso maggo||
na ceso maggo sappurisehi sevito,||
na tvaɱ arahasīti tato cittaɱ||
nivāraye ghāna-viññeyyehi gandhesu.|| ||

Yassa kassa ci bhikkhave bhikkhussa vā bhikkhuniyā vā jivhā-viññeyyesu rasesu uppajjeyya||
chando vā||
rāgo vā||
doso vā||
moho vā||
paṭighaɱ vā cetaso,||
tato cittaɱ nivāraye.|| ||

Sabhayo ceso maggo||
sappaṭibhayo ca||
sakaṇṭako ca||
sagahano ca||
ummaggo ca||
kummaggo ca||
dubhitiko ca,||
asappurisasevito ceso maggo||
na ceso maggo sappurisehi sevito,||
na tvaɱ arahasīti tato cittaɱ||
nivāraye jivhā-viññeyyehi rasesu.|| ||

Yassa kassa ci bhikkhave bhikkhussa vā bhikkhuniyā vā kāya-viññeyyesu phoṭṭhabbesu uppajjeyya||
chando vā||
rāgo vā||
doso vā||
moho vā||
paṭighaɱ vā cetaso,||
tato cittaɱ nivāraye.|| ||

Sabhayo ceso maggo||
sappaṭibhayo ca||
sakaṇṭako ca||
sagahano ca||
ummaggo ca||
kummaggo ca||
dubhitiko ca,||
asappurisasevito ceso maggo||
na ceso maggo sappurisehi sevito,||
na tvaɱ arahasīti tato cittaɱ||
nivāraye kāya-viññeyyehi phoṭṭhabbehi.|| ||

Yassa kassa ci bhikkhave bhikkhussa vā bhikkhuniyā vā mano-viññeyyesu dhammesu uppajjeyya||
chando vā||
rāgo vā||
doso vā||
moho vā||
paṭighaɱ vā cetaso,||
tato cittaɱ nivāraye.|| ||

Sabhayo ceso maggo||
sappaṭibhayo ca||
sakaṇṭako ca||
sagahano ca||
ummaggo ca||
kummaggo ca||
dubhitiko ca,||
asappurisasevito ceso maggo||
na ceso maggo sappurisehi sevito,||
na tvaɱ arahasīti tato cittaɱ||
nivāraye mano-viññeyyehi dhammehi.|| ||

 


 

Seyyathā pi, bhikkhave, kiṭṭhaɱ sampannaɱ,||
kiṭṭharakkhako ca pamatto||
goṇo ca kiṭṭhādo aduɱ kiṭṭhaɱ [196] otaritvā yāvadatthaɱ madaɱ āpajjeyya.|| ||

Evam eva kho, bhikkhave, assutavā puthujjano chasu phassāyatanesu asaɱvutakārī pañcasu kāmaguṇesu yāvadatthaɱ madaɱ āpajjati.|| ||

Seyyathā pi, bhikkhave, kiṭṭhaɱ sampannaɱ kiṭṭharakkhako ca appamatto||
goṇo ca kiṭṭhādo aduɱ kiṭṭhaɱ otareyya.|| ||

Tam enaɱ kiṭṭharakkhako nāsāya suggahītaɱ gaṇheyya,||
nāsāya suggahītaɱ gahetvā upari ghaṭāyaɱ suniggahitaɱ niggaṇheyya,||
upari ghaṭāyaɱ suniggahitaɱ niggahetvā daṇḍena sutāḷitaɱ tāḷeyya,||
daṇḍena sutāḷitaɱ tāḷetvā ossajeyya.|| ||

Dutiyam pi kho bhikkhave goṇo kiṭṭhādo aduɱ kiṭṭhaɱ otareyya,||
tam enaɱ kiṭṭharakkhako nāsāya suggahitaɱ gaṇheyya,||
nāsāya suggahitaɱ gahetvā upari ghaṭāyaɱ suniggahitaɱ niggaṇaheyya,||
upari ghaṭāyaɱ suniggahitaɱ niggahetvā daṇḍena sutāḷitaɱ tāḷeyya,||
daṇḍena sutāḷitaɱ tāḷetvā ossajyeya.|| ||

Tatiyam pi kho bhikkhave goṇo kiṭṭhādo aduɱ kiṭṭhaɱ otareyya,||
tam enaɱ kiṭṭharakkhako nāsāya suggahitaɱ gaṇheyya,||
nāsāya suggahitaɱ gahetvā upari ghaṭāyaɱ suniggahitaɱ niggaṇaheyya,||
upari ghaṭāyaɱ suniggahitaɱ niggahetvā daṇḍena sutāḷitaɱ tāḷeyya,||
daṇḍena sutāḷitaɱ tāḷetvā ossajyeya.|| ||

Evaɱ hi so bhikkhave goṇo kiṭṭhādo gāmagato vā araññagato vā ṭhāna bahulo vā assa nisajjabahulo,||
na taɱ kiṭṭhaɱ puna otareyya||
tam eva purimaɱ daṇḍasamphassaɱ samanussaranto.|| ||

Evam eva kho bhikkhave yato bhikkhuno chasu phassāyatanesu cittaɱ udujjitaɱ hoti sudujjitaɱ ajjhattaɱ eva santiṭṭhati sannisīdati ekodi hoti samādhiyati.|| ||

Seyyathā pi, bhikkhave, rañño vā||
rājamahāmattassa vā||
vīṇāya saddo assutapubbo assa,||
so vīṇāsaddaɱ suṇeyya,||
so evaɱ vadeyya:|| ||

'Ambho kissa nu kho eso saddo||
evaɱ rajanīyo||
evaɱ kamanīyo||
evaɱ mada- [197] nīyo||
evaɱ mucchanīyo||
evaɱ bandhanīyo' ti?|| ||

Tam enaɱ evaɱ vadeyyuɱ:|| ||

'Esā kho bhante vīṇā nāma yassā eso sadde||
evaɱ rajanīyo||
evaɱ kamanīyo||
evaɱ madanīyo||
evaɱ mucchanīyo||
evaɱ bandhanīyo' ti.|| ||

So evaɱ vadeyya:|| ||

'Gacchatha me bho taɱ vīṇaɱ āharathā' ti.|| ||

Tassa taɱ vīṇaɱ āharayyeɱ,||
tam enaɱ evaɱ vadeyyuɱ:|| ||

'Ayaɱ kho sā bhante vīṇā yassā eso saddo||
evaɱ rajanīyo||
evaɱ kamanīyo||
evaɱ mucchanīyo||
evaɱ bandhanīyo' ti.|| ||

So evaɱ vadeyya:|| ||

'Alaɱ me bho tāya vīṇāya,||
tam eva me saddaɱ āharathā' ti.|| ||

Tam enaɱ evaɱ vadeyyuɱ:|| ||

'Ayaɱ kho bhante vīṇā nāma||
anekasambhārā||
mahāsambhārā,||
anekehi||
sambhārehi||
samāraddhā vada' ti.|| ||

Seyyathīdaɱ?|| ||

Doṇiñ ca||
paṭicca cammañ ca||
paṭicca daṇḍañ ca||
paṭicca upaveṇañ ca||
paṭicca tantiyo ca||
paṭicca koṇañ ca||
paṭicca purisassa ca||
tajjaɱ vāyāmaɱ paṭicca evāyaɱ bhante vīṇā nāma||
anekasambhārā||
mahāsambhārā,||
anekehi sambhārehi||
samāraddhā vadatī' ti.|| ||

So taɱ vīṇaɱ dasadhā vā||
satadhā vā phāleyya,||
dasadhā vā||
satadhā tam vā phāletvā||
sakalikaɱ sakalikaɱ kāreyya||
sakalikaɱ sakalikaɱ karitvā agginā ḍaheyya,||
agginā ḍahetvā masiɱ kareyya,||
masiɱ karitvā mahāvāte vā opuneyya,||
nadiyā vā sīghasotāya pavāheyya.|| ||

So evaɱ vadeyya:|| ||

'Asakirāyaɱ bho vīṇā nāma,||
yathevaɱ yaɱ kiñci vīṇā nāma,||
ettha ca mahājano ativelaɱ pamatto palāḷito ti.|| ||

Evam eva kho bhikkhave bhikkhu||
rūpaɱ samantesati yāvatā rūpassa gati.|| ||

Vedanā samantesati yāvatā vedanāya gati.|| ||

Saññaɱ samantesati yāvatā saññāya gati.|| ||

Sankhāre samantesati yāvatā sankhārānaɱ gati.|| ||

Viññāṇaɱ samantesati yāvatā viññāṇassa gati.|| ||

Tassa rūpaɱ samantesato yāvatā rūpassa gati.|| ||

Vedanaɱ samantesato yāvatā vedanassa gati.|| ||

Saññaɱ samantesato yāvatā saññāṇassa gati.|| ||

Sankhāre samantesato yāvatā sankhārassa gati.|| ||

Viññāṇaɱ samannesato yāvatā viññāṇassa gati.|| ||

Yam pissa taɱ [198] hoti:||
'Ahan' ti vā||
'maman' ti vā||
'asamī' ti vā||
tam pi tassa na hotī" ti.|| ||

 


Contact:
E-mail
Copyright Statement   Webmaster's Page