Samyutta Nikaya Masthead


[Home]  [Sutta Indexes]  [Glossology]  [Site Sub-Sections]


 

Saɱyutta Nikāya,
V: Mahā-Vagga
48. Indriya Saɱyutta
V. Jarā-vagga

Sutta 42

Uṇṇābho Brāhmaṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][olds] Evam me sutaɱ:|| ||

Ekaɱ samayaɱ Bhagavā Sāvatthiyaɱ viharati Pubbārāme Migāra-mātu pāsāde.|| ||

Atha kho uṇṇābho brāhmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho uṇṇābho brāhmaṇo Bhagavantaɱ etad avoca:|| ||

"Pañc'imāni bho Gotama, indriyāni||
nānā-visayāni||
nānā-gocarāni||
na aññam aññassa gocara-visayam pacc'anubhonti.|| ||

Katamāni pañca?|| ||

Cakkhu'ndriyaɱ||
sot'indriyaɱ||
ghān'indriyaɱ||
jivh'indriyaɱ||
kāy'indriyaɱ.|| ||

[218] Imesaŋ nu kho bho Gotama, pañcannaɱ indriyānaɱ||
nānā-visayānaɱ||
nānā-gocarānaɱ||
na aññam aññassa gocara-visayam pacc'anubhontānaɱ||
kiɱ paṭisaraṇaɱ||
ko ca nesaŋ gocara-visayaɱ pacc'anubhotī" ti?|| ||

"Pañc'imāni brāhmaṇa, indriyāni||
nānā-visayāni||
nānā-gocarāni||
na aññam aññassa gocara-visayaɱ pacc'anubhonti.|| ||

Katamāni pañca?|| ||

Cakkhu'ndriyaɱ||
sot'indriyaɱ||
ghān'indriyaɱ||
jivh'indriyaɱ||
kāy'indriyaɱ.|| ||

Imesaɱ kho brāhmaṇa, pañcannaɱ indriyānaɱ||
nānā-visayānaɱ||
nānā-gocarānaɱ||
na aññam aññassa gocara-visayaɱ pacc'anubhontānaɱ||
mano paṭisaraṇaɱ||
mano ca nesaŋ gocara-visayaɱ pacc'anubhotī" ti.|| ||

"Manassa pana bho Gotama||
kiɱ paṭisaraṇaɱ||
ko ca nesaŋ gocara-visayaɱ pacc'anubhotī" ti?|| ||

"Manassa kho brāhmaṇa,||
sati paṭisaraṇan||
sati ca nesaŋ gocara-visayaɱ pacc'anubhotī" ti.|| ||

"Satiyā pana bho Gotama,||
kiɱ paṭisaraṇaɱ||
ko ca nesaŋ gocara-visayaɱ pacc'anubhotī" ti?|| ||

"Satiyā kho brāhmaṇa,||
vimutti paṭisaraṇan||
vimutti ca nesaŋ gocara-visayaɱ pacc'anubhotī" ti.|| ||

"Vimuttiyā pana bho Gotama||
kiɱ paṭisaraṇaɱ||
ko ca nesaŋ gocara-visayaɱ pacc'anubhotī" ti?|| ||

"Vimuttiyā kho brāhmaṇa,||
Nibbānaɱ paṭisaraṇan||
Nibbānaɱ ca nesaŋ gocara-visayaɱ pacc'anubhotī" ti.|| ||

"Nibbānassa pana bho Gotama,||
kiɱ paṭisaraṇaɱ||
ko ca nesaŋ gocara-visayaɱ pacc'anubhotī" ti?|| ||

"Accasarā brāhmaṇa, pañhaɱ.|| ||

Nāsakkhi pañhassa pariyan taɱ gahetuɱ.

Nibbān'ogadhaɱ hi brāhmaṇa Brahma-cariyaɱ vussati||
Nibbāna-parāyaṇaɱ||
Nibbāna-pariyosānan" ti.|| ||

Atha kho Uṇṇābho brāhmaṇo Bhagavato bhāsitaɱ abhinan'ditvā anumo-ditvā uṭṭhāy āsanā Bhagavantaɱ abhivādetvā padakkhiṇaɱ katvā pakkami.|| ||

Atha kho Bhagavā acira-pakkante Uṇṇābhe brāhmaṇe bhikkhu āmantesi:|| ||

"Seyyathā pi bhikkhave, kūṭāgāre vā||
kūṭā-gāra-sālāyaɱ vā||
pācīnavātapānā suriye uggacchante||
vātapānena rasmiyo pavisitvā kāya patiṭṭhitā" ti?|| ||

"Pacchimāya bhante bhittiyan" ti.|| ||

[219] "Evam eva kho, bhikkhave, Uṇṇābhassa brāhmaṇassa Tathāgate saddhā niviṭṭhā,||
mūlajātā||
patiṭṭhitā||
daḷhā||
asaŋhāriyā samaṇena vā||
brāhmaṇena vā||
devena vā||
mārena vā||
Brahmuṇā vā||
kenaci vā lokasmiɱ.|| ||

Imamhi ce bhikkhave, samaye Uṇṇābho brāhmaṇo kālaɱ kareyya,||
n'atthi taɱ saŋyojanaɱ yena saŋyojanena saŋyutto||
Uṇṇābho brāhmaṇo puna imaɱ lokaɱ āgaccheyyā" ti.|| ||

 


Contact:
E-mail
Copyright Statement