Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saŋyutta Nikāya,
V: MahāVagga
51. Iddhipāda Saŋyutta

Sutta 10

Cetiya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][olds] Evam me sutaɱ:|| ||

Evam me sutaɱ ekaɱ samayam Bhagavā Vesāliyaɱ viharati Mahāvane Kūṭāgārasālāuaɱ.|| ||

2. Atha kho Bhagavā pubbaṇhasamayaɱ nīvāsetvā pattacīvaram ādāya Vesāliyaɱ piṇḍāya pāvisi.|| ||

Vesāliyaɱ piṇḍāya caritvā pacchāhattaɱ piṇḍapātapaṭikkanto āyasmantaɱ Ānandam āmantesi:|| ||

"Gaṇhāhi Ānanda, nisīdanaɱ yena Cāpālaɱ cetiyaɱ ten'upasaŋkamissāmi divāvihārāya." ti.|| ||

"Evaɱ bhante" ti kho āyasmā Ānando Bhagavato paṭissutvā nisīdanaɱ ādāya Bhagavantaɱ piṭṭhito piṭṭhito anubandhi.|| ||

3. Atha kho Bhagavā yena Cāpālaɱ cetiyaɱ ten'upasaŋkami.|| ||

Upasaŋkamitvā paññatte āsane nisīdi.|| ||

Āyasmā pi kho Ānando Bhagavantaɱ abhivādetvā eka-m-antaɱ nisīdi.|| ||

4. Eka-m-antaɱ nisinnaɱ kho āyasmantaɱ Ānandaɱ Bhagavā etad avoca:|| ||

Ramaṇīyā Ānanda, Vesālī,||
ramaṇīyaɱ Udenaɱ cetiyaɱ,||
ramaṇīyaɱ Gotamakaɱ cetiyaɱ,||
ramaṇīyaɱ Sattambaɱ cetiyaɱ,||
ramanīyaɱ Bahuputtaɱ cetiyaɱ,||
ramaṇīyaɱ Sārandadaɱ cetiyaɱ,||
ramaṇīyaɱ Cāpālaɱ cetiyaɱ.|| ||

Yassa kassaci Ānanda,||
cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā.|| ||

So ākaŋkhamāno kappaɱ vā tiṭṭheyya kappāvasesaŋ vā.|| ||

Tathāgatassa kho Ānanda,||
cattāro iddhipādā bhāvitā bahulīkatā yānīkatā vatthukatā anuṭṭhitā paricitā susāmāraddhā.|| ||

Ākaŋkhamāno Ānanda,||
Tathāgato kappaɱ vā tiṭṭheyya kappāvasesaŋ vā ti.|| ||

5. Evam pi kho āyasmā Ānando Bhagavatā o'ārike nimitte kayiramāne o'ārike obhāse kayiramāne nāsakkhi paṭivijjhituɱ.|| ||

"Na Bhagavantaɱ yāci tiṭṭhatu bhante, Bhagavā kappaɱ,||
tiṭṭhatu sugato kappavasesam,||
bahujanahitāya bahujanasukhāya lokānukampāya atthāya hitāya sukhāya deva-manussānan" ti.|| ||

Yathā taɱ mārena pariyuṭṭhitacitto.|| ||

 

§

 

6. Dutiyam pi kho Bhagavā āyasmantaɱ Ānandaɱ etad avoca:|| ||

Ramaṇīyā Ānanda, Vesālī,||
ramaṇīyaɱ Udenaɱ cetiyaɱ,||
ramaṇīyaɱ Gotamakaɱ cetiyaɱ,||
ramaṇīyaɱ Sattambaɱ cetiyaɱ,||
ramanīyaɱ Bahuputtaɱ cetiyaɱ,||
ramaṇīyaɱ Sārandadaɱ cetiyaɱ,||
ramaṇīyaɱ Cāpālaɱ cetiyaɱ.|| ||

Yassa kassaci Ānanda,||
cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā.|| ||

So ākaŋkhamāno kappaɱ vā tiṭṭheyya kappāvasesaŋ vā.|| ||

Tathāgatassa kho Ānanda,||
cattāro iddhipādā bhāvitā bahulīkatā yānīkatā vatthukatā anuṭṭhitā paricitā susāmāraddhā.|| ||

Ākaŋkhamāno Ānanda,||
Tathāgato kappaɱ vā tiṭṭheyya kappāvasesaŋ vā ti.|| ||

7. Evam pi kho āyasmā Ānando Bhagavatā o'ārike nimitte kayiramāne o'ārike obhāse kayiramāne nāsakkhi paṭivijjhituɱ.|| ||

"Na Bhagavantaɱ yāci tiṭṭhatu bhante, Bhagavā kappaɱ,||
tiṭṭhatu sugato kappavasesam,||
bahujanahitāya bahujanasukhāya lokānukampāya atthāya hitāya sukhāya deva-manussānan" ti.|| ||

Yathā taɱ mārena pariyuṭṭhitacitto.|| ||

 

§

 

8. Tatiyam pi kho Bhagavā āyasmantaɱ Ānandaɱ etad avoca:|| ||

Ramaṇīyā Ānanda, Vesālī,||
ramaṇīyaɱ Udenaɱ cetiyaɱ,||
ramaṇīyaɱ Gotamakaɱ cetiyaɱ,||
ramaṇīyaɱ Sattambaɱ cetiyaɱ,||
ramanīyaɱ Bahuputtaɱ cetiyaɱ,||
ramaṇīyaɱ Sārandadaɱ cetiyaɱ,||
ramaṇīyaɱ Cāpālaɱ cetiyaɱ.|| ||

Yassa kassaci Ānanda,||
cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā.|| ||

So ākaŋkhamāno kappaɱ vā tiṭṭheyya kappāvasesaŋ vā.|| ||

Tathāgatassa kho Ānanda,||
cattāro iddhipādā bhāvitā bahulīkatā yānīkatā vatthukatā anuṭṭhitā paricitā susāmāraddhā.|| ||

Ākaŋkhamāno Ānanda,||
Tathāgato kappaɱ vā tiṭṭheyya kappāvasesaŋ vā ti.|| ||

9. Evam pi kho āyasmā Ānando Bhagavatā o'ārike nimitte kayiramāne o'ārike obhāse kayiramāne nāsakkhi paṭivijjhituɱ.|| ||

"Na Bhagavantaɱ yāci tiṭṭhatu bhante, Bhagavā kappaɱ,||
tiṭṭhatu sugato kappavasesam,||
bahujanahitāya bahujanasukhāya lokānukampāya atthāya hitāya sukhāya deva-manussānan" ti.|| ||

Yathā taɱ mārena pariyuṭṭhitacitto.|| ||

10. Atha kho Bhagavā āyasmantaɱ Ānandaɱ āmantesi.|| ||

"Gaccha kho tvaɱ Ānanda,||
yassa dāni tvaɱ kālaɱ maññasī" ti.|| ||

"Evaɱ bhante" ti āyasmā Ānando Bhagavato paṭissutvā uṭṭhāy'āsanā Bhagavantaɱ abhivādetvā padakkhinaɱ katvā avidūre aññatarasmiɱ rukkhamūle nisīdi.|| ||

11. Atha kho Māro pāpimā acīrapakkante āyasmante Ānande yena Bhagavā ten'upasaŋkami.|| ||

Upasaŋkamitvā Bhagavantaɱ etad avoca:|| ||

"Parinibbātu dāni bhante,||
Bhagavā, parinibbātu dāni sugato,||
parinibbānakālo' dāni bhante Bhagavato.|| ||

"Bhāsitā kho panesā bhante,||
Bhagavatā vācā:|| ||

"Na tāvāhaɱ pāpīma,||
parinibbāyissāmi yāva me bhikkhū na sāvakā bhavissanti viyattā vinītā visāradā pattayogakkhemā bahussutā dhammadharā dhammānudhammapaṭipannā sāmīcipaṭipannā anudhammacārino sakaɱ ācariyakaɱ uggahetvā ācikkhissanti desissanti paññāpessanti paṭṭhapessanti vivarissanti vibhajissanti uttānīkarissanti uppannaɱ parappavādaɱ sahadhammena suniggahītaɱ niggahetvā sappāṭihāriyaɱ dhammaɱ desissantī" ti.|| ||

Santi kho pana bhante,||
etarahi bhikkhū Bhagavato sāvakā viyattā vinītā visāradā pattayogakkhemā bahussutā dhammadharā dhammānudhammapaṭinnā sāmīcipaṭipannā anudhammacārino,||
sakaɱ ācariyakaɱ uggahetvā ācikkhanti desenti paññāpenti vivaranti vibhajanti uttānīkaronti.|| ||

Uppannaɱ parappavādaɱ sahadhammena suniggahītaɱ niggahetvā sappāṭihāriyaɱ dhammaɱ desenti.|| ||

12. Parinibbātu dāni bhante,||
Bhagavā parinibbātu dāni sugato,||
parinibbānakālo dāni bhante, Bhagavato.|| ||

Bhāsitā kho panesā bhante,||
Bhagavatā vācā:|| ||

Na tāvāhaɱ pāpīma,||
parinibbāyissāmi yāva me bhikkhūni na sāvakā bhavissanti viyattā vinītā visāradā pattayogakkhemā bahussutā dhammadharā dhammānudhammapaṭipannā sāmīcipaṭipannā anudhammacārino sakaɱ ācariyakaɱ uggahetvā ācikkhissanti desissanti paññāpessanti paṭṭhapessanti vivarissanti vibhajissanti uttānīkarissanti uppannaɱ parappavādaɱ sahadhammena suniggahītaɱ niggahetvā sappāṭihāriyaɱ dhammaɱ desissantī" ti.|| ||

Santi kho pana bhante,||
etarahi bhikkhūni Bhagavato sāvakā viyattā vinītā visāradā pattayogakkhemā bahussutā dhammadharā dhammānudhammapaṭinnā sāmīcipaṭipannā anudhammacārino,||
sakaɱ ācariyakaɱ uggahetvā ācikkhanti desenti paññāpenti vivaranti vibhajanti uttānīkaronti.|| ||

Uppannaɱ parappavādaɱ sahadhammena suniggahītaɱ niggahetvā sappāṭihāriyaɱ dhammaɱ desenti.|| ||

13. Yāva me upāsakā na sāvakā bhavissanti.|| ||

Yāva me upāsakā na sāvakā bhavissanti viyattā vinītā visāradā pattayogakkhemā bahussutā dhammadharā dhammānudhammapaṭipannā sāmīcipaṭipannā anudhammacārinyo.|| ||

Sakaɱ ācariyakaɱ uggahetvā ācikkhissanti desissanti paññāpessanti paṭṭhapessanti vivarissanti vibhajissanti uttānīkarissanti uppannaɱ parappavādaɱ sahadhammena suniggahītaɱ niggahetvā sappāṭihāriyaɱ dhammaɱ desissantī" ti.|| ||

Santi kho pana bhante,||
etarahi upāsakā.|| ||

Upāsakā Bhagavato sāvakā viyattā vinītā visāradā pattayogakkhemā bahussutā dhammadharā dhammānudhammapaṭinnā sāmīcipaṭipannā anudhammacārinyo,||
sakaɱ ācariyakaɱ uggahetvā ācikkhanti desenti paññāpenti paṭṭhapenti vivaranti vibhajanti uttānīkaronti.|| ||

Uppannaɱ parappavādaɱ sahadhammena suniggahītaɱ niggahetvā sappāṭihāriyaɱ dhammaɱ desenti.|| ||

14. Parinibbātu dāni bhante,||
Bhagavā parinibbātu dāni sugato.|| ||

Parinibbānakālo dāni bhante, Bhagavato.|| ||

Bhāsitā kho panesā bhante,||
Bhagavatā vācā:|| ||

"Na tāvāhaɱ pāpīma,||
parinibbāyissāmi yāva me idaɱ brahmacariyaɱ na iddhaɱ c'eva bhavissati,||
phītaɱ ca vitthāritaɱ bāhujaññaɱ puthubhūtaɱ yāva deva-manussehi suppakāsitan" ti.|| ||

Ta-y-idam bhante Bhagavato brahmacariyam iddhaɱ c'eva phitañ ca vitthāritam bahujaññam puthubhūtaɱ yāvad eva manussehi supakāsitam.|| ||

Parinibbātu'dāni bhante,||
Bhagavā parinibbātu sugato,||
parinibbānakālo'dāni bhante, Bhagavato ti.|| ||

15. Evaɱ vutte Bhagavā Māraɱ pāpimantaɱ etad avoca:|| ||

"Appossukko tvaɱ pāpima hohi.|| ||

Na ciraɱ Tathāgatassa parinibbānaɱ bhavissati.|| ||

Ito tiṇṇaɱ māsānaɱ accayena Tathāgato parinibbāyissatī" ti.|| ||

16. Atha kho Bhagavā cāpāle cetiye sato samapjāno āyusankhāraɱ ossaji.|| ||

Ossaṭṭhe pana Bhagavatā āyusankhāre mahābhumicālo ahosi bhiɱsanako lomahaɱso.|| ||

Devadundubhiyo ca caliɱsu.|| ||

17. Atha kho Bhagavā etam atthaɱ viditvā tāyaɱ velāyaɱ imaɱ udānaɱ udānesi.|| ||

"Tulamatulañca sambhavaɱ||
bhavasankhāramavassajī muni||
ajjhattarato samāhito||
abhidā kavacamivattasambhavan ti.|| ||

Cāpālavaggo paṭhamo.|| ||

Tatruddānaɱ:|| ||

Apāro ca viruddho cāriyo nibbidā padesaŋ,||
Samanto ca bhikkhu ca arahaɱñāṇacetiyāti.|| ||


Contact:
E-mail
Copyright Statement   Webmaster's Page