Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
I. Veḷudvāra Vagga

Sutta 4

Paṭhama Sāriputta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:|| ||

Ekaɱ samayaɱ āyasmā ca Sāriputto||
āyasmā ca Ānando||
Sāvatthiyaɱ viharanti||
Jetavane Anāthapiṇḍikassa ārāme.|| ||

Atha kho āyasmā Ānando sāyanhasamayaɱ paṭisallāṇā vuṭṭhito yenāyasmā Sāriputto ten'upasaŋkami.|| ||

Upasaŋkamitvā āyasmatā Sāriputtena sadadhiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho āyasmā Ānando āyasmantaɱ Sāriputtaɱ etad avoca:|| ||

"Katinnaɱ nu kho āvuso Sāriputta||
dhammānaɱ samannā-gamana-hetu evam ayaɱ pajā Bhagavatā vyākatā sotāpannā avinipāta-dhammā niyatā sambodhi-parāyaṇā" ti?|| ||

[347] Catunnaɱ kho āvuso, dhammānaɱ samannā-gamana-hetu evam ayaɱ pajā Bhagavatā vyākatā sotāpannā avinipāta-dhammā niyatā sambodhi-parāyaṇā.|| ||

Katamesaŋ catunnaɱ?|| ||

Idh'āvuso, ariyasāvako buddhe avecca pasādena samannāgato hoti:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

"Ariyakantehi sīlehi samannāgato hoti||
akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi.|| ||

Imesaɱ kho āvuso, catunnaɱ dhammānaɱ samannā-gamana-hetu evam ayaɱ pajā Bhagavatā vyākatā sotāpannā avinipāta-dhammā niyatā sambodhi-parāyaṇā" ti.|| ||

 


Contact:
E-mail
Copyright Statement   Webmaster's Page