Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya
V. Mahā Vagga
55. Sotāpatti Saŋyutta
III. Saraṇāni Vagga

Sutta 29

Bhaya or Bhikkhu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evam me sutaɱ:

Ekaɱ samayam Bhagavā Sāvatthiyaɱ viharati Jetavane Anāthapiṇḍikassa ārāme.|| ||

2. Atha kho sambahula bhikkhū yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho bhikkhū Bhagavā etad avoca:|| ||

"Yato kho bhikkhave ariyasāvakassa pañca bhayāni verāni vūpasantāni ca honti,||
catūhi ca sotipattiyaŋgehi samannāgato hoti,||
ariyo c'assa ñāyo paññāya sudiṭṭho hoti suppaṭividdho||
so ākaŋkhamāno attanā va attānaɱ vyākareyya:|| ||

'Khīṇa-nirayo mhi||
khīṇa-tiracchānayoniyo||
khīṇa-pettivisayo||
khīṇā-pāyaduggativinipāto,||
sotāpanno'ham asmi||
avinipāta-dhammo||
niyato||
sambodhi-parāyaṇo'.|| ||

 


 

Katamāni pañca bhayāni verāni vūpasantāni honti?|| ||

Yaɱ bhikkhave, pāṇātipātī pāṇātipātapaccayā diṭṭhadhammikam pi bhayaɱ veraɱ pasavati,||
samparāyikam pi [388] bhayaɱ veraɱ pasavati,||
cetasikam pi dukkhaɱ domanassaɱ paṭisaŋvediyati,||
pāṇātipātā paṭiviratassa evan taɱ bhayaɱ veraɱ vūpasannaɱ hoti.|| ||

Yaɱ bhikkhave, adinnādāyī||
adinnādānapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaŋvediyati,||
adinnādānā paṭiviratassa etaɱ bhayaɱ veraɱ vūpasannaɱ hoti.|| ||

Yaɱ bhikkhave, kāmesu micchācārī||
kāmesumicchācārapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaŋvediyati,||
kāmesumicchācārā paṭiviratassa etaɱ bhayaɱ veraɱ vūpasannaɱ hoti.|| ||

Yaɱ bhikkhave, musāvādī||
musāvādapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaŋvediyati,||
musā-vādā paṭiviratassa etaɱ bhayaɱ veraɱ vūpasannaɱ hoti.|| ||

Yaɱ bhikkhave, surāmerayamajjapamādaṭṭhāyi||
surāmerayamajjapamādaṭṭhānapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaŋvediyati,||
surāmerayamajjapamādaṭṭhānā paṭiviratassa evan taɱ bhayaɱ veraɱ vūpasannaɱ hoti.|| ||

Imāni pañca bhayāni verāni vūpasantāni honti.|| ||

 


 

Katamehi catūhi sotāpattiyaŋgehi samannāgato hoti?|| ||

Idha bhikkhave, ariyasāvako Buddhe avecca pasādena samannāgato hoti:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgato hoti:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ariyakantehi sīlehi samannāgato hoti:|| ||

Akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi.|| ||

Imehi catūhi sotāpattiyaŋgehi samannāgato hoti.|| ||

 


 

Katamo c'assa ariyo ñāyo paññāya sudiṭṭho hoti suppaṭividdho?|| ||

Idha bhikkhave, ariyasāvako paṭiccasamuppādaɱ yeva sādhukaɱ yoniso manasikaroti:|| ||

"Iti imasmiɱ sati idaɱ hoti,||
imassuppādā idaɱ upapajjati,|| ||

iti imasmiɱ asati idaɱ na hoti,||
imassa nirodhā idaɱ nirujjhati.|| ||

Yad idaɱ:|| ||

Avijjāpaccayā sankhārā,||
sankhārapaccayā viññāṇaɱ,||
viññāṇapaccayā nāmarūpaɱ||
nāmarūpapaccayā saḷāyatanaɱ,||
saḷāyatanapaccayā phasso,||
phassa-paccayā vedanā,||
vedanā paccayā taṇhā,||
taṇhā paccayā upādānaɱ,||
upādāna-paccayā bhavo,||
bhava-paccayā jāti,||
jāti-paccayā jarā-maraṇaɱ||
soka parideva||
dukkha-domanassupāyāsā||
sambhavanti.|| ||

Evam etassa kevalassa dukkhakkhandhassa samudayo hoti.|| ||

Avijjāya tv'eva asesavirāganirodhā sankhāranirodho,||
sankhāranirodhā viññāṇanirodho||
viññāṇanirodhā nāmarūpanirodhā,||
nimarūpanirodhā saḷāyatananirodhā,||
saḷāyatananirodhā phassanirodhā,||
phassanirodhā vedanānirodho,||
vedanānirodhā taṇhānirodho,||
taṇhānirodhā upādānanirodho,||
upādānanirodhā bhavanirodho,||
bhavanirodhā jātinirodho,||
jātinirodhā jarā-maraṇaɱ sokaparideva dukkhadomanassupāyāsā nirujjhanti.|| ||

Evam etassa kevalassa dukkhakkhandhassa nirodho hotī" ti.|| ||

Ayam assa ariyo ñāyo paññāya sudiṭṭho hoti suppaṭividdho.|| ||

Yato kho bhikkhave, ariyasāvakassa imāni pañca bhayāni verāni vūpasantāni honti,||
imehi catūhi sotipattiyaŋgehi samannāgato hoti||
ayam cassa ariyo ñāyo paññāya sudiṭṭho hoti suppaṭividdho||
so ākaŋkhamāno attanā va attānaɱ vyākareyya:|| ||

'Khīṇa-nirayo mhi||
khīṇa-tiracchānayoniyo||
khīṇa-pettivisayo||
khīṇā-pāyaduggativinipāto,||
sotāpanno'ham asmi||
avinipāta-dhammo||
niyato||
sambodhi-parāyaṇo'.|| ||

 


Contact:
E-mail
Copyright Statement   Webmaster's Page