Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Saɱyutta Nikāya:
V. MahāVagga
55. Sotapatti Saŋyuttaa
VI: Sappañña Vaggo

Sutta 53

Dhammadinna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts]Evam me sutaɱ:|| ||

Ekaɱ samayaɱ Bhagavā bāraṇasiyaɱ viharati Isipatane Migadāye.|| ||

[407] Atha kho Dhammadinno upāsako pañcahi upāsakasatehi saddhiɱ yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Dhammadinno upāsako Bhagavantaɱ etad avoca:|| ||

"Ovadatu no bhante, Bhagavā,||
anusāsatu no bhante,||
Bhagavā yaɱ amhākaɱ assa dīgha-rattaɱ hitāya sukhāyā" ti.|| ||

"Tasmā ti ha vo Dhammadinna, evaɱ sikkhitabbaɱ:|| ||

'Ye te suttantā Tathāgata-bhāsitā||
gambhīrā||
gambhīratthā||
lokuttarā||
suññatā paṭisaŋyuttā.|| ||

Te kālena kālaɱ upasampajja viharissamā' ti.|| ||

Evaɱ hi vo Dhammadinna, sikkhibban" ti.|| ||

"Na kho n'etaɱ bhante,||
sukaraɱ amhehi||
puttasambādhasayanaɱ||
ajjhāvasantehi||
Kāsikacandanaɱ||
paccanubhontehi||
mālagandhavilepanaɱ||
dhārayantehi||
jātarūparajataɱ||
sādiyantehi||
ye te suttantā Tathāgata-bhāsitā gambhīrā||
gambhīratthā||
lokuttarā||
suññatā paṭisaŋyuttā||
te kālena kālaɱ upasampajja viharituɱ.|| ||

Tesaŋ no bhante, Bhagavā amhākaɱ pañcasu sikkhāpadesu ṭhitānaɱ uttariɱ dhammaɱ desetū" ti.|| ||

"Tasmā ti ha vo Dhammadinna,||
evaɱ sikkhitabbaɱ:|| ||

Buddhe avecca pasādena samannāgatā bhavissāma:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
buddho||
Bhagavā' ti.|| ||

Dhamme avecca pasādena samannāgatā bhavissāma:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgatā bhavissāma:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ariyakantehi sīlehi samannāgato hoti||
akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi.|| ||

Evaɱ hi vo Dhammadinna, sikkhitabban" ti.|| ||

Yānimāni bhante, Bhagavatā cattāri sotāpattiyaŋgāni desitāni,||
saŋvijjante te dhammā amhesu,||
mayañca bhante, tesu dhammesu sandissāma.|| ||

Mayaɱ hi bhante, buddhe avecca pasādena samannāgatā:|| ||

'Iti pi so Bhagavā||
arahaɱ||
sammā sambuddho||
vijjā-caraṇa-sampanno||
sugato||
lokavidu||
anuttaro purisa-damma-sārathī||
satthā deva-manussānaɱ||
[408]buddho||
Bhagavā' ti.|| ||

Dhamme avecca pasādena samannāgatā:|| ||

'Svākkhāto Bhagavatā dhammo||
sandiṭṭhiko||
akāliko||
ehipassiko||
opanayiko||
paccattaɱ veditabbo viññūhī' ti.|| ||

Saŋghe avecca pasādena samannāgatā:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni||
aṭṭhapurisapuggalā,||
esa Bhagavato sāvakasaŋgho.|| ||

Āhuneyyo||
pāhuneyyo||
dakkhiṇeyyo||
añjalikaraṇīyo||
anuttaraɱ puññakettaɱ lokassā' ti.|| ||

Ariyakantehi sīlehi samannāgatā||
akhaṇḍehi||
acchiddehi||
asabalehi||
akammāsehi||
bhujissehi||
viññuppasatthehi||
aparāmaṭṭhehi||
samādhi-saɱvattanikehi" ti.|| ||

"Lābhā vo Dhammadinna,||
suladdhaɱ vo Dhammadinna,||
sotāpattiphalaɱ Dhammadinna, vyākatan" ti.|| ||

 


Contact:
E-mail
Copyright Statement   Webmaster's Page